1Efraime eena o itšepetse lelea,
o kalakatisa moea oa bochabela,
letsatsi ka leng
le mo ekeletsa leshano,
letsatsi ka leng
le mo ekeletsa tšenyeho.
Ba etsa selekane le naha ea Asiria,
ole e rōmeloe naheng ea Egepeta.
2Morena o na le qōso
e tobaneng le Juda,
o tla otla Jakobo,
a mo otlele boitšoaro ba hae,
a 'museletse
ho ea ka liketso tsa hae.
3Ka popelong
o n'a tšoere ngoan'abo serethe,
ha e s'e le monna
a kōlōkōchana le Molimo.
4A kōlōkōchana le lengeloi, a le hlōla,
a b'a le kōpa tlhohonolofatso,
a le kopa eona ka likeleli.
A teana le Molimo a le Bethele,
a bua le eena a le hona moo.
5Morena ke Molimo oa mabōtho,
Morena ke lona lebitso la hae.
6Uena, khutlela ho Molimo oa hao,
u be le lerato, u be le toka,
u tšepe Molimo oa hao,
u mo tšepe kamehla eohle.
Kahlōlo e ntšetsoa pele
7Mohoebi o sebelisa sekala
kala sa bolotsana,
o bile o rata le ho qhekanyetsa.
8Efraime eena oa ithorisa, o re:
“Ke ruile haholo,
ke bokeletse matlotlo,
ha ho na sebe, ha ho na bokhopo,
ha ho na seo ba ka nqōsang ka sona.”
9Empa Morena o re:
“Ke 'na Morena Molimo oa hao,
ho tloha
ha u n'u le naheng ea Egepeta;
ke tla etsa hore
u boele u phele litenteng,
u phele teng
sa mohl'a mekete e halalelang.
10'Na ke buile le baporofeta,
ka ba hlahisetsa lipono,
pono tse ngata-ngata,
ka bua le bona ka ho etsa lipapiso.”
11Na bokhopo bo teng Gileade?
Batho ba teng ke mafeela-feelane!
Ba etsa mahlabelo ka lipohoana,
ba a etse Gilegale,
lialetare tsa bona li tla heletsoa,
li ke mekōlōkōtoane har'a masimo.
12Jakobo o balehetse naheng,
naheng ea Baarame,
Iseraele a sebeletsa ho nyala mosali,
hore a tl'a mo nyale, a alosa linku.
13Ka moporofeta,
Morena a ntša Iseraele Egepeta,
'me ka moporofeta, a b'a 'maballa.
14Efraime o phephelitse
Moren'a hae haholo,
kahoo molato oa ho tšolla mali
e tla ba oa hae,
Morena a mo otlele nyefōlo
eo a nyefotseng ka eona.
