Tšebeletso e khahlisang Molimo
1Le 'ne le ratane joalokaha bana ba motho ba ratana. 2Se lebaleng ho amohela baeti, hobane, ka ho etsa joalo, ba bang ba amohetse mangeloi ba sa lemohe. 3Hopolang ba litlamong, joaloka hoja le le litlamong le bona; esita le ba hlekefetsoang, hobane le lōna le sa phela lefatšeng.
4Bohle ba hlomphe lenyalo, 'me likano tsa lona li bōlōkoe ka botšepehi. Molimo o tla ahlōla lihlola le lifebe. 5Bophelo ba lōna bo se ke ba busoa ke ho rata chelete. Le khotsofalle seo le nang le sona, hobane Molimo ka boeena o itse:
“Ha nka ke ka u lahla,
kapa ka u furalla.”
6Ke ka baka leo re leng sebete ho re:
“Morena ke mothusi oa ka,
nke ke ka tšaba letho.
Motho a ka nketsa'ng?”
7Hopolang batsamaisi ba lōna ba le boleletseng lentsoe la Molimo. Talimang tsela eo ba phetseng ka eona, eo ba shoeleng ka eona, 'me le ba etsise tumelong ea bona. 8Le kajeno Jesu Kreste e ntse e le eena oa maobane, 'me e tla 'ne e be eena kamehla eohle.
9Se khelosoeng ke lithuto lisele, tsa mefuta-futa. Ke ntho e ntle ha pelo ea motho e matlafatsoa ka mohau oa Molimo, e seng ka melao e amanang le lijo, e se nang molemo ho ba e latelang. 10Re na le aletare, eo basebeletsi ba Tente ba se nang tokelo ea ho jela ho eona.
11Moprista e Moholo o tlisa mali a liphoofolo Sehalalelong e le nyehelo ka baka la sebe, empa litōpō tsa tsona li chesetsoa kantle ho liahelo. 12Ke ka lebaka lena Jesu a ileng a hlōkōfaletsoa kantle ho khoro ea motse, e le hore a tle a halaletse sechaba ka mali a hae. 13Kahoo a re mo khahlanyetseng kantle ho liahelo, re ntse re jere sekhobo sa hae. 14Mona lefatšeng ha re na motse oa kamehla, empa re ipatlela motse o tlang ho tla.
15Ka baka leo, ka Jesu, a re se phetseng ho nyehella Molimo ka sehlabelo sa thoriso e tsoang melomong e rokang lebitso la hae. 16Se lebaleng ho ba mosa le ho thusana, hobane ana ke 'ona mahlabelo a khahlisang Molimo.
17Mamelang batsamaisi ba lōna, le ipee tlas'a bona. Baa le hlokomela, kaha ba tla ikarabella ka lōna. Etsang hore ba phethe hoo ka thabo, e seng ka masoabi, hobane ha ba etsa ka masoabi, hoo ho ke ke ha le tsoela molemo oa letho.
18Re rapelleng. Re kholisehile hore matsoalo a rōna a khutsitse, hobane re rata ho ba le metsamao e metle linthong tsohle. 19Haholo-holo ke ipiletsa ho lōna hore le etse joalo, e le hore Molimo a tle a nkhutlisetse ho lōna kapele.
Tlhohonolofatso le litumeliso tsa ho qetela
20Molimo ea re fang khotso, ea tsositseng Morena oa rōna Jesu bafung, eena Jesu ea ileng a etsoa molisa e moholo oa linku ka mali a selekane se sa feleng, 21a ke a le fe tsohle tse molemo, tseo le li hlokang ho phetha thato ea hae. Tse mo khahlisang a ke a li bōpe ka lipelong tsa rōna, ka Jesu Kreste, ea lokeloang ke tlōtla kamehla le mehla. A ho be joalo!
22Bana beso, ke ipiletsa ho lōna hore le mamelle mantsoe ana a khothatso, leha ke le ngoletse hakhutšoanyane.
23Tsebang hore ngoan'abo rōna Timothea o lokolotsoe. Haeba a ka fihla ka nako, re tla tla le eena ho le hloela.
24Lumelisang batsamaisi bohle ba lōna le balumeli bohle. Ba Italia baa le lumelisa.
25Mohau o ke o be le lōna bohle.
