Senoelo se lahlehileng
1Joale Josefa a laela mookameli oa lelapa la hae, a re: “Tlatsa mekotla ea banna bana ka lijo tseo ba ka tsebang ho li nka, 'me u khutlisetse chelete ea e mong le e mong ka molomong oa mokotla oa hae. 2Ka molomong oa mokotla oa oa ho fela, u kenye senoelo sa ka sa silefera, 'moho le chelete e rekileng koro ea hae.” Mookameli a etsa kamoo Josefa a mo laetseng kateng.
3Ha ho qala ho èla, banna bana ba lumelloa hore ba tsamaee le litonki tsa bona. 4Eare ba sa tsoa tloha motseng, ba e-s'o ee hōle, Josefa a re ho mookameli oa lelapa la hae: “Tsamaea, u phallele banna bao. Ha u fihla ho bona u re: ‘Ho ea ka'ng ha le phetetsa botle ka bobe? 5Na ha le na senoelo seo mong'a ka a noelang ho sona; a bileng a laolang ka sona? Le entse bobe ka ho etsa joalo!’ ”
6Mookameli ha a fihla ho bona, a ba bolella mantsoe ana. 7Eaba ba re ho eena: “Ho ea ka'ng ha moren'a rōna a ka bua mantsoe a tjee? Hase ntho eo bahlanka ba hao ba ka e etsang e joalo! 8Bona hle, chelete eo re e fumaneng ka melomong ea mekotla ea rōna ha re le Kanana, re u khutliselitse eona. Joale re ka utsoa joang silefera kapa khauta tlung ea moren'a hao? 9Mang kapa mang oa bahlanka ba hao, eo senoelo seo se tla fumanoa ho eena, o tla shoa, 'me le rōna re tla ba makhoba a moren'a rōna.”
10Mookameli eo a re: “A ho be joalokaha le boletse. Eo se tla fumanoa ho eena e tla ba lekhoba la ka, 'me lōna ha le na ho ba le molato.”
11Ba potlaka, e mong le e mong a bofolla mokotla oa hae, a o qhaqholla. 12Eaba oa batla; a qala ka e moholo, a qetella ka oa ho fela, 'me senoelo sa fumanoa ka mokotleng oa Benjamine. 13Joale ba hahōla liaparo tsa bona, e mong le e mong a bofa tonki ea hae, 'me ba khutlela motseng.
14Ha Juda le bana babo ba fihla tlung ea Josefa, Josefa o ne a sa le teng, 'me ba itihela fatše kapele ho eena. 15Josefa a re ho bona: “Ke ketso 'ngoe ee, eo le e entseng? Na ruri ha le tsebe hore motho ea kang 'na a ka nōha?”
16Eaba Juda o re: “Re ka hlola re sa re'ng ho moren'a ka? Re ka bua eng? Hona re ka itlhakola joang? Molimo o senotse bokhopo ba bahlanka ba hao. Bona, re se re le makhoba a moren'a ka, rōna le eo senoelo se fumanoeng ho eena.”
17Empa Josefa a re: “Hase ntho eo nka e etsang! Motho eo senoelo se fumanoeng ho eena e tla ba eena lekhoba. Ha e le lōna, ipoelleng ka khotso ho ntat'a lōna.”
Juda o buella Benjamine
18Joale Juda a atamela ho eena, a re: “Oho, moren'a ka, ak'u lumelle mohlanka oa hao hle, a bue lentsoe le le leng feela ho moren'a ka, 'me u se mo halefele, hobane u tšoana le Faro. 19Moren'a ka, u botsitse bahlanka ba hao, ua re: ‘Na le na le ntat'a lōna, kapa moena oa lōna?’ 20Eaba re re ho moren'a ka: ‘Ntat'a rōna o teng, o se a hōlile; le moen'a rōna o teng, ngoana ea fumanetsoeng boqhekung. Moholoane oa hae o ne a shoe; ho bana ba 'm'ae ke eena feela ea setseng, 'me ntat'ae o mo rata haholo.’
21“Eaba u re ho bahlanka ha hao: ‘Ntlisetseng eena, ke tle ke 'mone.’ 22Ra re ho moren'a ka: ‘Ho thata hore mohlankanyana a ka tloha ho ntat'ae, hobane ha a ka tloha ntat'ae a ka shoa.’ 23Eaba u re ho bahlanka ba hao: ‘Ha le sa ntlele le moen'a lōna, le ke ke la hlola le bona sefahleho sa ka.’ 24Ha re se re khutletse ho mohlanka oa hao, ntat'a rōna, re ile ra 'molella mantsoe a moren'a rōna.
25“Eare ha ntat'a rōna a re: ‘Boelang Egepeta, le eo re sella,’ 26ra re: ‘Re sitoa ho theohela teng. Re tla ea feela haeba moen'a rōna a ka theoha le rōna, hobane re ke ke ra bona sefahleho sa monna eo ha re sitoa ho ea le moen'a rōna.’
27“Eaba mohlanka oa hao, ntat'a rōna, o re: ‘Lea tseba hore mohats'a ka o ntsoaletse bara ba le babeli. 28E mong o ntšiile, 'me ka re: ruri o tsekolotsoe ke libatana, 'me ha ke e-s'o 'mone ho fihlela joale. 29Joale ha le ka nka le enoa, a tloha ho 'na, 'me a hlaheloa ke kotsi, le tla theolela moriri oa ka o moputsoa Qalong ea Bafu ka masoabi.’
30“Joale ha nka ka fihla ho ntate, mohlanka oa hao, mohlankanyana a le sieo, kaha pelo ea ntate e mo khomaretse, 31ha a bona hore ha a eo, o tla shoa, 'me rōna e tla ba re theoletse moriri o moputsoa oa mohlanka oa hao, ntat'a rōna, Qalong ea Bafu ka masoabi. 32'Na, mohlanka oa hao, ke itlamile ho ntate ka mohlankanyana, ka re: ‘Haeba ke sa mo khutlisetse ho uena, ke tla ba molato ho ntate bophelong ba ka bohle.’
33“Kea u kōpa he, u mpe u lumelle mohlanka oa hao ho sala sebakeng sa mohlankanyana, e le lekhoba la moren'a ka, 'me u lese mohlankanyana a nyolohe le bana babo. 34Joale nka nyolohela joang ho ntate, ha mohlankanyana a le sieo? Ke tšaba ho bona bomalimabe bo tla hlahela ntate.”
