Bana babo Josefa ba etela Egepeta khetlo la pele
1Eitse ha Jakobo a utloa hore koro e teng Egepeta, a re ho bara ba hae: “Ke'ng ha le shebana?” 2Eaba o re: “Bonang, ke utloile hore koro e teng Egepeta; theohelang teng, le e'o re sella, re tle re phele re se ke ra shoa.”
3Joale bana babo Josefa ba leshome, ba theohela Egepeta ho ea reka koro. 4Empa Jakobo a se ke a rōmela Benjamine, ngoan'abo Josefa, hore a theohe le bana babo, hobane a ne a re: “Mohlomong a ka tšoha a hlaheloa ke kotsi.” 5Kahoo bara ba Iseraele ba ea reka koro, joaloka bohle, hobane tlala e ne e oele naheng ea Kanana.
6Josefa e ne e le 'musi oa naha; e le eena ea rekisetsang batho bohle ba lefatše koro. Bana babo Josefa le bona ba tla, ba inama, kapele ho eena. 7Josefa a bona bana bao babo, 'me a ba tseba, empa a itimeletsa bona, a ba kharumela hampe, a re: “Le tsoa kae?”
Ba re: “Re tsoa naheng ea Kanana, re tlil'o sela.”
8Eaba Josefa o tseba bana babo, empa bona ba se ke ba mo tseba. 9Josefa a hopola litoro tseo a kileng a li lora ka bona, 'me a re ho bona: “Le lihloela tse tlil'o lekola bofokoli ba naha eo le e etetseng.”
10Ba re ho eena: “Che, morena, bahlanka ba hao ba tlil'o sela. 11Bohle re bara ba motho, re batho ba 'nete; bahlanka ba hao hase lihloela.”
12Josefa a boela a re ho bona: “Che, le tlil'o lekola bofokoli ba naha.”
13Eaba ba re: “Rōna, bahlanka ba hao, re leshome le metso e 'meli, re bara ba motho, naheng ea Kanana. Bona, hona joale oa ho fela o setse le ntat'a rōna, athe e mong o se a shoele.”
14Empa Josefa a re ho bona: “Ho joalokaha ke le boleletse; le lihloela. 15Le tla nkholisa tjena: Ke hlapanya ka Faro ea phelang, ha le ka ke la tloha mona, haese haeba moen'a lōna oa ho fela a ka tla mona. 16Rōmelang e mong oa lōna, a e'o lata moen'a lōna; lōna le tla sala chankaneng, ho tle ho bonahale bonnete ba mantsoe a lōna; ho seng joalo, ke hlapanya ka Faro ea phelang, ruri le lihloela!” 17Eaba o ba kenya chankaneng matsatsi a mararo.
18Ka letsatsi la ka boraro, Josefa a re ho bona: “Etsang tjena, le tle le phele, hobane ke tšaba Molimo: 19haeba le batho ba 'nete, sieang e mong oa lōna chankaneng, lōna le tsamaee, le ise lijo malapeng a lōna a lapang. 20Joale le ntlisetse moen'a lōna, mantsoe a lōna a tle e netefale, 'me ha le ka ke la shoa.” Eaba ba etsa joalo.
21Joale ba buisana tjena: “Ruri re molato ka baka la ngoan'abo rōna, eo leha re ne re bona mahlomola a moea oa hae ha a re rapela, re sa kang ra mamela; ke ka hona mahlomola ana a re hlahetseng.”
22Eaba Rubene oa ba araba, o re: “Na ke n'e se ke ke le bolella hore le se ke la siteloa mohlankanyana, empa la se ke la mamela? Bonang joale, mali a hae a batloa ho rōna.” 23Ba ne ba sa tsebe hore Josefa oa ba utloa, kaha a ne a bua le bona ka mofetoleli.
24Eaba Josefa oa ba furalla, oa lla. A boela a retelehela ho bona, a buisana le bona, eaba o nka Simeone, o mo tlama ba ntse ba bona.
25Josefa a laela hore mekotla ea bona e tlatsoe koro; le hore ho khutlisetsoe chelete ea e mong le e mong ka mokotleng oa hae; le hore ba fuoe mofao. Ba etsetsoa joalo.
26Joale ba bofa koro ea bona litonking tsa bona, ba tsamaea. 27Moo ba robalelitseng teng, ha e mong oa bona a qhaqholla mokotla oa hae, ho fepa tonki ea hae, a fumana chelete ea hae e le teng ka molomong oa mokotla oa hae. 28Eaba o re ho bana babo: “Chelete ea ka e khutlisitsoe; ke ena ka mokotleng oa ka!”
Ba sehoa ke letsoalo, 'me ba buisana ba tšohile, ba re: “Ke eng ee, eo Molimo a e entseng ho rōna?”
29Mohla ba fihlang ho ntat'a bona, naheng ea Kanana, ba mo phetela tse ba hlahetseng, ba re: 30“Monna eo e leng 'musi oa naha o ile a re kharumela hampe, a hopola hore re lihloela tse tlil'o lekola naha. 31Empa ra re ho eena: ‘Re batho ba 'nete, ha re lihloela. 32Re bara ba motho ba leshome le metso e 'meli; e mong o se a shoele, athe hona joale oa ho fela o ho ntat'a rōna, naheng ea Kanana.’
33“Joale monna eo, 'musi oa naha, a re ho rōna: ‘Ke tla tseba hore le batho ba 'nete ha le ka la siea e mong oa lōna mona ho 'na la itsamaela, la isa lijo malapeng a lōna a lapang. 34Le ntlisetse moen'a lōna oa ho fela, ke tle ke tsebe hore ha le lihloela, le batho ba 'nete. Ke tla le lokollela ngoan'abo lōna, le itsamaele naheng ena ka bolokolohi.’ ”
35Ha ba tšolla mekotla ea bona, bonang, e mong le e mong a fumana sephutheloana sa chelete ea hae ka mokotleng oa hae; taba ena ea ba tšosa 'moho le ntat'a bona. 36Ntat'a bona Jakobo a re ho bona: “Le nkamohile bana; Josefa o shoele, Simeone ha a eo, joale le tlil'o nkamoha Benjamine. Tsena tsohle lia ntuba.”
37Eaba Rubene o re ho ntat'ae: “U tle u bolaee bara ba ka ba babeli ha ke sa mo khutlisetse ho uena. 'Nee eena matsohong, 'me ke tla mo khutlisetsa ho uena.”
38Jakobo a re: “Mora oa ka a ke ke a theoha le lōna; moholoane oa hae o shoele, 'me ke eena feela ea setseng. Haeba a ka hlaheloa ke kotsi leetong lena la lōna, le tla theolela moriri oa ka o moputsoa Qalong ea Bafu ka masoabi.”
