Jakobo o hlohonolofatsoa ke ntat'ae Isaka
1Eare ha Isaka a se a tsofetse, mahlo a hae a se a fokola, hoo a neng a se a sa bone, a bitsa Esau, mora oa hae oa matsibolo, 'me a re ho eena: “Ngoan'a ka!”
Eena a arabela, a re: “Ke 'na enoa.”
2Isaka a re: “Bona, ke tsofetse; ha ke tsebe letsatsi leo ke tla shoa ka lona. 3Ak'u nke libetsa tsa hao hle, le sehlajoa sa hao, le seqha sa hao, u ee naheng, u e'o ntsomela phoofolo. 4Joale u mphehele nama e hlabosang, ka mokhoa oo ke o ratang, u ntlisetse eona ke tl'o ja, e le hore ke tle ke u hlohonolofatse ke e-s'o shoe.”
5Rebeka o ne a ntse a utloa ha Isaka a bua le Esau, mora oa hae. Esau a ea naheng ho ea tsoma phoofolo, hore a tle a e tlise.
6Rebeka a bua le mora oa hae Jakobo, a re: “Ke utloile ntat'ao a bua le moholoane oa hao Esau, a re: 7‘Ntlisetse phoofolo, 'me u mphèhèle nama e hlabosang, e le hore ke tle ke je, 'me ke u hlohonolofatse mahlong a Morena ke e-s'o shoe.’ 8Joale, ngoan'a ka, mamela kamoo ke u laelang kateng. 9E-ea mohlapeng hona joale, u e'o ntlisetsa lipotsanyane tse peli, tse ntle, 'me ka tsona ke tla phehela ntat'ao nama e hlabosang, ka mokhoa oo a o ratang. 10U tla e isetsa ntat'ao hore a je, a tle a u hlohonolofatse a e-s'o shoe.”
11Empa Jakobo a re ho Rebeka, 'm'ae: “Bona, moholoane oa ka Esau ke motho ea mohoètè, athe 'na ke motho ea lehoētē. 12Mohlomong ntate o tla mphōphōletsa, 'me mahlong a hae ke tla bonahala ke le mothetsi, ebe ke itlisetsa thohako e seng tlhohonolofatso.”
13'M'ae a re ho eena: “Thohako ea hao e tla ba holim'a ka, ngoan'a ka. Uena, u mamele feela, 'me u tsamaee, u e'o ntatela tsona.”
14Eaba oa tsamaea, oa li nka, o li tlisetsa 'm'ae; 'm'ae a pheha nama e hlabosang, ka mokhoa oo ntat'ae a o ratang. 15Joale Rebeka a nka liaparo tse ntle tsa Esau, mora oa hae oa matsibolo, tse neng li le ho eena ka tlung, a li apesa Jakobo mora oa hae e monyenyane. 16Eaba o thata matsoho a hae, le molala oa hae o lehoētē, ka matlalo a lipotsanyane. 17Nama e hlabosang le bohobe, tseo a ileng a li lokisa, a li neela mora oa hae Jakobo, matsohong.
18Eaba Jakobo o ea ho ntat'ae, o fihla, a re: “Ntate!”
Eena a arabela, a re: “Ke 'na enoa! U mang, ngoan'a ka?”
19Jakobo a re ho ntat'ae: “Ke 'na Esau, matsibolo a hao, 'me ke entse kamoo u ntaetseng kateng. Ak'u tsohe hle, u lule, u je nama ea tseo ke tsoa li tsoma, u tle u ntlhohonolofatse.”
20Empa Isaka a re ho mora oa hae: “U e fumane kapele hakaakang, ngoan'a ka?”
Jakobo a araba, a re: “Ke hobane Morena, Molimo oa hao, o ile a nkatlehisa.”
21Eaba Isaka o re ho Jakobo: “Ak'u atamele hle, ke u phōphōletse ngoan'a ka, ke utloe hore na efela e le uena mora oa ka Esau, kapa che.”
22Joale Jakobo a atamela ho ntat'ae Isaka; eena a mo phōphōletsa, 'me a re: “Lentsoe ke lentsoe la Jakobo, empa matsoho ke matsoho a Esau.” 23A se ke a ba a mo tseba, hobane matsoho a hae a ne a e-na le mohoètè joaloka matsoho a moholoane oa hae Esau. Eaba oa mo hlohonolofatsa. 24A re: “Na u fela u le mora oa ka Esau?”
Jakobo a arabela, a re: “Ke eena!”
25Joale a re: “Ntlisetse eona, ke je nama ea tse tsomiloeng ke mora oa ka, 'me ke u hlohonolofatse.”
Eaba o e tlisa ho eena, 'me a ja; a mo tlisetsa le veine, 'me a noa. 26Joale ntat'ae Isaka a re ho eena: “Atamela joale, ngoan'a ka, u nkake.”
27Eaba oa atamela, oa mo aka; Isaka a utloa monko oa liaparo tsa hae, 'me a mo hlohonolofatsa, a re:
“Bona, monko oa mora oa ka
o joaloka monko oa tšimo,
tšimo eo
Morena a e hlohonolofalitseng!
28Molimo a ke a u nee phōka
ea leholimo,
le monono oa lefatše,
le chai ea koro le ea veine.
29Lichaba li ke li u sebeletse,
'me merabe e ke e u khumamele.
E-ba morena oa bana beno,
bana beno ba u khumamele.
Bohle ba u rohakang
ba ke ba rohakehe,
'me bohle ba u hlohonolofatsang
ba hlohonolofale.”
30Eitse hoba Isaka a qete ho hlohonolofatsa Jakobo, 'me e e-s'o be le motsotsoana Jakobo a tsoile ka ho ntat'ae Isaka, moholoane oa hae Esau a fihla ho tsoa tsoma. 31Le eena a pheha nama e hlabosang, 'me a e tlisetsa ntat'ae. Eaba o re ho ntat'ae: “Ntate, ak'u tsohe, 'me u je nama ea tse tsomiloeng ke mora oa hao, u tle u ntlhohonolofatse.”
32Ntat'ae Isaka a re ho eena: “U mang?”
A arabela, a re: “Ke 'na mora oa hao, matsibolo a hao, Esau.”
33Isaka a thōthōmela haholo, a re: “E ne e le mang he, ea ileng a ea tsoma phoofolo, 'me a e tlisa ho 'na, ka e ja eohle, u e-s'o fihle, 'me ka ba ka mo hlohonolofatsa? E, o tla hlohonolofala!”
34Ha Esau a utloa mantsoe a ntat'ae a lla sello se seholo, se bohlōkō, 'me a re ho ntat'ae: “Le 'na ak'u ntlhohonolofatse hle ntate!”
35Empa ntat'ae a re: “Moena oa hao o tlile ka bolotsana, 'me o nkile mahlohonolo a hao!”
36Eaba Esau o re: “Na ha a ea bitsoa Jakobo ka nepo? Hobane o nqhekanyelitse habeli. O ile a nka litokelo tsa boholo ba ka, 'me joale bona, o nkile le mahlohonolo a ka!” A tsoela pele, a re: “Na 'na ha ua ntšiela lehlohonolo?”
37Isaka a arabela Esau, a re: “Bona, ke mo entse morena oa hao, le bana babo bohle ke mo neile bona ho ba bahlanka ba hae, 'me ka 'maballa ka koro le ka veine. Ebe joale, ngoan'a ka, nka u etsetsa eng?”
38Eaba Esau o re ho ntat'ae: “Na ha u sa na le lehlohonolo le le leng ntate? Le 'na ntlhohonolofatse hle, ntate!” Esau a bokolla habohlōko.
39Eaba ntat'ae Isaka oa arabela, o re ho eena:
“Bona, leaho la hao
le tla ba hōle le monono oa lefatše,
le be hōle le phōka ea leholimo
e tsoang holimo.
40U tla phela ka sabole ea hao,
'me u tla sebeletsa moen'a hao,
empa ha nako ea ho itokolla e fihla,
u tla mōnyōla molala oa hao
jokong ea hae.”
41Joale Esau a hloea Jakobo ka baka la tlhohonolofatso eo ntat'ae a mo hlohonolofalitseng ka eona. Esau a re ka pelong ea hae: “Matsatsi a bofifi ba ntate a atametse, 'me ke tla bolaea Jakobo, moena oa ka.”
42Empa Rebeka a bolelloa mantsoe ana a Esau, mora oa hae oa matsibolo; eaba Rebeka o laela hore ho bitsoe Jakobo, mora oa hae e monyenyane, 'me a re ho eena: “Bona, moholoane oa hao Esau o tla iphetetsa ka ho u bolaea. 43Ka baka leo, ngoan'a ka, mamela: tsamaea, u balehele ha malom'ao Labane, ea Harane. 44U hlole le eena litšiu li se kae, ho fihlela khalefo ea moholoane oa hao e kokobela. 45Ha khalefo ea moholoane oa hao e se e kokobetse, 'me a lebetse seo u mo entseng sona, 'na ke tla rōmela motho ho u lata teng. Hobane'ng nka shoelloa ke lōna ba babeli ka tsatsi le le leng?”
46Joale Rebeka a re ho Isaka: “Ke tennoe ke bophelo ka baka la basali bana ba Bahete. Haeba Jakobo a ka nyala e mong oa banana ba Bahete ba joaloka bana, bophelo ba ka bo tla ba le molemo ofe ho 'na?”
