Tsoalo ea Isaka
1Morena a etela Sara joalokaha a ne a boletse, 'me Morena a mo etsetsa joalokaha a ne a mo tšepisitse. 2Sara a ithoala, a tsoalla Aborahama mora boqhekung ba hae, ka nako eo Molimo a neng a buile ho eena ka eona. 3Aborahama a rea mora eo a mo tsoaletsoeng ke Sara lebitso la Isaka. 4Aborahama a bōlōtsa mora oa hae Isaka ha a e-na le matsatsi a robeli, joalokaha Molimo a ne a mo laetse. 5Ha mora oa hae Isaka a tsoaloa, Aborahama o ne a e-na le lilemo tse lekholo.
6Sara a re: “Morena o nketselitse letšeho; e mong le e mong ea utloang o tla ntšeha.” 7A boela a re:
“Ke mang
ea neng a ka re ho Aborahama:
‘Sara o tla ke a nyantše bana’?
8Empa ke mo tsoaletse mora
boqhekung ba hae.”
Ngoana a hōla, a ba a khoesoa, 'me Aborahama a etsa pitiki e kholo mohla ngoana a khoesoang.
Hagare oa lelekoa
9Sara a bona mora eo Aborahama a mo tsoaletsoeng ke Hagare oa Moegepeta a ntse a tšeha Isaka ka mokhoa o somang. 10Kahoo a re ho Aborahama: “Leleka mosali enoa oa lekhoba le mora oa hae, hobane mora oa mosali enoa oa lekhoba e ke ke ea e-ba mojalefa le mora oa ka Isaka.” 11Ntho ena ea utloisa Aborahama bohlōkō haholo, ka baka la mora oa hae.
12Empa Molimo a re ho Aborahama: “U se ke ua utloa bohlōkō ka baka la moshanyana, le ka baka la mosali oa hao oa lekhoba. Mamela tsohle tseo Sara a u bolellang tsona, hobane ke litlōhōlō tsa Isaka tse tla bitsoa bana ba hao. 13Le ka eena mora oa mosali oa lekhoba ke tla etsa sechaba, hobane ke ngoana oa hao.”
14Eaba Aborahama o tsoha ka malungoalungoana, o nka bohobe, le lekuka la metsi; o li nea Hagare ka ho li bea holim'a lehetla la hae, a mo leleka 'moho le moshanyana. Eena a tsamaea, a 'na a lelera lehoatateng la Beeresheba.
15Ha metsi a ka lekukeng a se a felile, eaba Hagare o bea moshanyana katlas'a sehlahla se seng. 16Joale a tloha, a ea lula a lebane le eena, a le bohōle bo lekanang le ba ho béba ha motsu oa seqha ha o betsoa, hobane o ne a re: “Ha ke rate ho bona ha moshanyana a e-shoa.” Ha a ntse a lutse malebana le eena joalo, moshanyana a bokolla habohlōkō. 17Eaba Molimo o utloa lentsoe la moshanyana, 'me lengeloi la Molimo la hōoeletsa Hagare le le leholimong, la re ho eena: “U tšoenngoa ke'ng, Hagare? Se tšohe, hobane Molimo o utloile lentsoe la moshanyana moo a leng teng. 18Phahama, u emise moshanyana, u mo tšoare ka letsoho, hobane ke tla mo etsa sechaba se seholo.”
19Joale Molimo a tutubolla mahlo a Hagare, eaba o bona seliba; a ea ho sona, a tlatsa lekuka ka metsi, a le nea moshanyana, a noa.
20Molimo a ba le moshanyana, 'me a hōla; a phela lehoatateng, ea e-ba setsebi sa ho fula ka seqha. 21A aha lehoatateng la Parane, 'me 'm'ae a mo nyalisa mosali ea tsoang naheng ea Egepeta.
Selekane sa Aborahama le Abimeleke
22Ka eona nako eo, Abimeleke le Pikole, molaoli oa mabōtho a hae, ba bua ho Aborahama, ba re: “Molimo o na le uena linthong tsohle tseo u li etsang. 23Ka baka leo he, ntlhapanyetse mona ka lebitso la Molimo, hore 'na, le bana ba ka, le litlōhōlō tsa ka, uena u ke ke ua re etsetsa bolotsana; le hore ho ea kamoo ke u hauhetseng kateng, le uena u tla nkhauhela, esita le eona naha eo u jakileng ho eona.”
24Aborahama a re: “Kea hlapanya.”
25Eare ha Aborahama a ipelaetsa ho Abimeleke ka baka la seliba seo bahlanka ba Abimeleke ba mo amohileng sona ka likhōka, 26Abimeleke a re: “Ha ke tsebe hore na ke mang ea entseng ntho ena. Ha u e-s'o ka u mpolella eona, le ho e utloa ke qala ho e utloa kajeno.”
27Eaba Aborahama o nka mehlape ea linku le ea likhomo, o e nea Abimeleke, 'me banna bao ba babeli ba etsa selekane. 28Aborahama a khetha le likonyana tse supileng, tse tšehali, mohlapeng oa hae, a li beela kathōko. 29Abimeleke a re ho Aborahama: “Likonyana tsee tse supileng, tse tšehali, tseo u li khethetseng kathōko, li bolela eng?”
30Aborahama a re: “Likonyana tsena tse supileng, tse tšehali, u tla li amohela li e-tsoa matsohong a ka, e ba bopaki ba hore seliba sena se chekiloe ke 'na.”
31Ka baka leo, sebaka seo sa bitsoa Beeresheba, hobane ke moo bobeli ba bona ba ileng ba hlapanyetsana teng.
32Ba etsa selekane Beeresheba joalo. Eaba Abimeleke le Pikole, molaoli oa mabōtho a hae, baa tsamaea, ba khutlela naheng ea Bafilesita. 33Aborahama a lema sefate sa tamarisika moo Beeresheba, 'me hona teng a rapela Morena, Molimo oa mehla eohle. 34Aborahama a jaka naheng eo ea Bafilesita ka litšiu tse ngata.
