Aborahama o fallela Gerare
1Ho tloha moo Aborahama a fallela naheng e ka nq'a boroa, a aha lipakeng tsa Kadeshe le Shure, a jaka Gerare. 2Kaha Aborahama a ne a ee a re mosali oa hae, Sara, ke khaitseli ea hae, kahoo Abimeleke, khosi ea Gerare, a rōmela maqosa ho nka Sara.
3Empa Molimo a etela Abimeleke ka toro, bosiu, a re ho eena: “Bona, u lekhatheng la ho shoa ka baka la mosali eo u mo nkileng, hobane ke mosali oa motho.”
4Abimeleke o ne a e-s'o kene likobong tsa hae; joale a re: “Morena, na u tla bolaea batho ba se nang molato? 5Na hase eena ea ileng a re ho 'na: ‘Ke khaitseli ea ka’? Le eena mosali a re: ‘Ke ngoan'eso’? 'Na ke entse hona ka letsoalo le khutsitseng, le ka matsoho a se nang molato.”
6Molimo a re ho eena torong eo: “E, kea tseba hore hona u ho entse ka tsoalo le khutsitseng, 'me ke 'na ea ileng a u thibela hore u se ke ua ntšiteloa. Ka baka leo, ha kea ka ka u lumella hore u mo ame. 7Joale he, khutlisa mosali enoa oa motho, hobane monna oa hae ke moporofeta, o tla u rapella, me u tla phela. Empa haeba u sa mo khutlise, tseba hore ruri u tla shoa, uena le bohle ba heno.”
8Eaba Abimeleke o tsoha ka malungoalungoana, o bitsa bahlanka ba hae bohle, o ba bolella tsena tsohle. Banna bao ba tšoha haholo. 9Joale Abimeleke a bitsa Aborahama, a re ho eena: “Ke eng ee, eo u e entseng ho rōna? Ke u sitetsoe ka eng, hore ebe u tliselitse 'na, le 'muso oa ka, sebe se seholo hakaale? U nketselitse lintho tse sa tšoanelang ho etsoa.” 10A boela a re ho Aborahama: “U ne u hopotse eng, ha u tla etsa ntho ee?”
11Aborahama a re: “Ke e entse hobane ke ne ke nahana hore sebakeng sena Molimo ha a tšajoe, 'me ba tla mpolaea ka baka la mosali oa ka. 12Le hona e hlile e ntse e le khaitseli ea ka; ke morali oa ntate, feela hase morali oa 'mè, 'me e ile ea e-ba mosali oa ka. 13Joale eitse ha Molimo a etsa hore ke falle tlung ea ntate, ka re ho mosali: ‘Molemo oo u tla nketsetsa oona ke ona: hohle moo re fihlang teng, ha u bua ka 'na, u n'u re: Enoa ke khaitseli ea ka!’ ”
14Eaba Abimeleke o nka mehlape ea linku le ea likhomo, le makhoba a banna le a basali, a li nea Aborahama, a mo khutlisetsa mosali oa hae, Sara. 15Abimeleke a re: “Bona, naha ea ka ke eo; ikhahele moo u ratang teng.”
16Ho Sara a re: “Bona, ke neile ngoan'eno silefera e etsang boima ba likilo tse leshome le motso o mong le halofo; hona ke ho u hlomphisa bohle ba nang le uena, 'me mahlong a bohle u lokafalitsoe.”
17Eba Aborahama o rapela Molimo, 'me Molimo a folisa Abimeleke le mosali oa hae, le makhoba a basali, 'me ba tsoala bana. 18Molimo o ne a koetse lipōpelo tsa ba lelapa la Abimeleke ka baka la Sara, mosali oa Aborahama.
