Molao kapa tumelo?
1Lithoto ting tsa Bagalata! Le loiloe ke mang, lōna ba hlaloselitsoeng ka mokhoa o tōtōbetseng tsa ho thakhisoa ha Jesu Kreste? 2A le ke le mpolelleng taba ena e le 'ngoe feela: Na le amohetse Moea oa Molimo ka ho phetha Molao, kapa ka ho lumela molaetsa oo le o utloileng? 3Le thotofetse hakaakang! Ere le qalile ka tsa Moea, joale le qetella ka tsa botho? 4Na lintho tse kaalo-kaalo le li tsebetse lefeela, haeba e hlile e le lefeela? 5Ha ho le joalo, ea le abelang Moea, ea etsang liketso tse matla har'a lōna, na o etsa joalo kahobane le phetha Molao kapa kahobane le lumetse molaetsa oo le o utloileng?
6Le Aborahama o ile a lumela ho Molimo, 'me hoo a ho balloa e le ho loka.
7Tsebang ke hona hore balumeli ke bona bao e leng bana ba Aborahama. 8Ka ho tseba e sa le pele hore Molimo o tla lokafatsa balichaba ka tumelo, Mangolo a ile a bolella Aborahama molaetsa o molemo e sa le pele, a re: “Ka uena lichaba tsohle li tla hlohonolofatsoa.” 9Kahoo balumeli ba hlohonolofatsoa hammoho le Aborahama ea ileng a lumela.
10Empa bohle ba itšepisitseng ka ho phetha Molao ba rōhakehile, hobane ho ngotsoe, ho thoe: “Mang le mang ea sa tiisetseng ho etsa tsohle tse ngotsoeng bukeng ea Molao o rōhakehile.” 11Joale ho pepenene hore mahlong a Molimo motho ha a lokafatsoe ka baka la Molao, hobane, “Ea lokileng o tla phela ka tumelo.” 12Ha e le Molao hase taba ea tumelo, empa ea phethang tsa Molao o tla phela ka tsona. 13Kreste o re lopolotse thōhakong ea Molao, ka hore a fetohe ea rōhakehileng ka baka la rōna, hobane ho ngotsoe, ho thoe: “Mang le mang ea fanyehiloeng sefateng o rōhakehile.” 14Hona ho entsoe hore tlhohonolofatso e neiloeng Aborahama e tle e neoe balichaba ka Kreste Jesu; e le hore, ka tumelo, re tle re amohele Moea o tšepisitsoeng ke Molimo.
Molao ha oa nyōpisa tšepiso
15Bana beso, a nke ke le nee mohlala oa se etsoang ke batho. Ha ho ananetsoe selekane le motho, ha ho ea ka se etsollang kapa a eketsa ho hong ho sona. 16Joale litšepiso li ile tsa etsetsoa Aborahama le setlōhōlō sa hae. Mangolo ha a re “litlōhōlō”, e leng ho bolela batho ba bangata, empa a re “le setlōhōlō sa hao”, e leng ho bolela motho a le mong feela, Kreste. 17Seo ke se bolelang ke sena: Molao o ileng oa etsoa kamora' lilemo tse makholo a mane le mashome a mararo, o ke ke oa etsolla selekane se ananetsoeng pele ke Molimo, 'me oa nyōpisa tšepiso. 18Haeba lefa re le fumana ka Molao, ha e sa le ka tšepiso; athe Aborahama o le filoe ke Molimo ka tšepiso.
19Ha ho le joalo, Molao o sebetsa'ng? O ile oa etsetsoa ho tōtōbatsa litlōlo tsa molao, hore o sebelisoe ho fihlela ho e-tla setlōhōlō sa Aborahama se etselitsoeng tšepiso, 'me oa phatlalatsoa ke mangeloi, ka 'moelanyi. 20Joale 'moelanyi ha a hlokehe ha motho a le mong, 'me Molimo o mong.
Ha le makhoba, le bana ba Molimo
21Ha ho le joalo, na Molao a hanana le litšepiso tsa Molimo? Le khale! Hoja batho ba ne ba neiloe Molao o nang le matla a ho ba phelisa, ba ne ba ka lokafatsoa ka Molao oo. 22Empa Mangolo a boletse hore batho bohle ba matleng a sebe, e le hore, ka ho lumela ho Jesu Kreste, ba lumelang ba neoe tseo ba li tšepisitsoeng.
23Pele tumelo e e-ba teng, re ne re le matleng a Molao oa Moshe, re le litlamong tsa oona, ho fihlela re ba re senoleloa tumelo. 24Ka baka leo, Molao oo ea e-ba mohlokomeli oa rōna, ho fihlela Kreste a fihla, 'me re lokafatsoa ka tumelo. 25Empa erekaha tumelo e se e le teng, ha re sa le kalosong ea mohlokomeli eo.
26Bohle le bana ba Molimo ka ho lumela ho Kreste Jesu, 27hobane lōna bohle ba kolobelelitsoeng ho Kreste le apere Kreste. 28Joale ha ho sa le Mojuda kapa molichaba, ha ho sa le lekhoba kapa molokolloa, ha ho sa le monna kapa mosali, hobane lōna bohle le ntho e le 'ngoe ho Kreste Jesu. 29Ha e le mona le le ba Kreste, le litlōhōlō tsa Aborahama, 'me le majalefa ka ho ea ka tšepiso.
