ESERA 7

₁Kamora' tsena, mehleng ea puso ea Aretaseresese, khosi ea Peresiea, ho ne ho e-na le monna ea bitsoang Esera, ea tsoetsoeng ke Seraea, Seraea ea tsoetsoeng ke Asariea, Asariea ea tsoetsoeng ke Hilekiea, ₂Hilekiea ea tsoetsoeng ke Shalome, Shalome ea tsoetsoeng ke Sadoke, Sadoke ea tsoetsoeng ke Ahitube, ₃Ahitube ea tsoetsoeng ke Amariea, Amariea ea tsoetsoeng ke Asariea, Asariea ea tsoetsoeng ke Meraoke, ₄Meraoke ea tsoetsoeng ke Seraea, Seraea ea tsoetsoeng ke Usi, Usi ea tsoetsoeng ke Buki, ₅Buki ea tsoetsoeng ke Abishua, Abishua ea tsoetsoeng ke Finease, Finease ea tsoetsoeng ke Eleasare, Eleasare ea tsoetsoeng ke Moprista e Moholo Arone. ₆Esera enoa ke eena ea ileng a nyoloha Babilona. E ne e le setsebi sa Molao oa Moshe, oo Morena Molimo oa Iseraele, a ileng a fana ka oona. Kahobane Morena Molimo oa hae, a ne a mo hlohonolofalitse, khosi Aretaseresese a mo nea tsohle tseo a neng a li kōpa. ₇Ka selemo sa bosupa sa puso ea khosi Aretaseresese, ba bang ba bana ba Iseraele, le baprista, le Balevi, le libini, le balebeli ba menyako, le basebeletsi ba Tempele, le bona ba nyolohela Jerusalema.

₈Ka khoeli ea bohlano ea selemo sa bosupa sa puso ea khosi Aretaseresese, Esera a fihla Jerusalema. ₉O ne a ile a tloha Babilona ka letsatsi la pele la khoeli ea pele, 'me ka letsatsi la pele la khoeli ea bohlano, a fihla Jerusalema, hobane Morena Molimo oa hae, o ne a mo hlohonolofalitse. ₁₀Esera o ne a ithutile Molao oa Morena, a o phetha, a ruta Baiseraele melao le litaelo tsa Morena.

₁₁Lena ke lengolo leo khosi Aretaseresese a ileng a le nea Esera eo e neng e le moprista le Setsebi sa Molao, e bile e le setsebi sa lipolelo tsa melao ea Morena, le litaelo tseo Morena a li neileng Baiseraele:

₁₂“Le tsoa ho Aretaseresese, khosi ea likhosi, le ea ho moprista Esera, Setsebi sa Molao oa Molimo oa maholimo: Khotso e be le uena!

₁₃“Mona ke etsa taelo ea hore ofe kapa ofe oa sechaba sa Iseraele, 'moho le baprista ba sona, le Balevi, ea pusong ea ka, ea ithaopelang ho nyolohela Jerusalema, a tsamaee le uena. ₁₄U rōmetsoe ke khosi le baeletsi ba eona ba supileng, ho ea fuputsa litaba tsa Juda le tsa Jerusalema, mabapa le Molao oa Molimo oa hao, o letsohong la hao. ₁₅U nke le silefera le khauta, eo ka eona khosi le baeletsi ba eona ba etsetsang Molimo oa Iseraele, eo Tempele ea hae e leng Jerusalema, mpho ea boithaopo. ₁₆U be u nke le silefera eohle, le khauta eohle, eo u ka e fumanang naheng eohle ea Babilona, 'moho le limpho tsa boithaopo tsa sechaba, le tsa baprista, tse etsetsoang Tempele ea Morena Molimo oa bona, e Jerusalema.

₁₇“Ka chelete ena u hlokomele hore u reke lipohoana, le lipheleu, le likonyana, 'moho le linyehelo tsa tsona tsa lijo, le linyehelo tsa tsona tsa lino, 'me ka tsena u etsetse nyehelo holim'a aletare ea Tempele ea Morena Molimo oa hao, e Jerusalema.

₁₈“Ka silefera le khauta e tla sala, uena le bana beno le etse ka eona seo le bonang se le molemo, ho phetha thato ea Molimo oa lōna. ₁₉Le thepa eo u e filoeng, ea ho sebeletsa ka Tempeleng ea Molimo oa hao, u neelane ka eona ho Molimo oa Jerusalema. ₂₀Lintho tse ling, tse ka hlokoang bakeng sa Tempele ea Molimo oa hao, tseo u lokelang ho fana ka tsona, u li nke letlōleng la matlotlo a khosi.

₂₁“'Na, khosi Aretaseresese, ke etsa taelo ho babōlōki bohle ba matlotlo, ba ka bophirimela ho nōka ea Euferatese, hore tsohle tseo moprista Esera, setsebi sa Molao oa Molimo oa maholimo, a tla li kōpa ho bona, ba mo nee tsona ntle ho tika-tiko. ₂₂Ba mo nee silefera e sa feteng boima ba likilo tse likete tse tharo le makholo a mane, le koro e sa feteng boima ba likilo tse likete tse leshome, le lilethara tsa veine tse sa feteng likete tse peli, le lilethara tsa ole ea mohloaare tse sa feteng likete tse peli, le letsoai le lengata hoo le ke keng la lekanngoa. ₂₃Tsohle tseo Molimo oa maholimo a laetseng hore li etsoe, li etsetsoe Tempele ea Molimo oa maholimo ka hloko, esere Molimo a halefela khosi le bara ba eona. ₂₄Hape re le tsebisa hore malebana le baprista, le Balevi, le libini, le balebeli ba menyako, le basebeletsi ba Tempele, kapa basebeletsi ba bang ba Tempele ea Molimo, molao ha o lumelle hore ba ntšisoe lekhetho, kapa sethabathaba, kapa lekhetho la thepa ea khoebo.

₂₅“Joale uena, Esera, ho ea ka bohlale boo Molimo oa hao a u neileng bona, u khethe babusi, le baahlōli, hore ba tle ba ahlōlele batho bohle ba ka bophirimela ho nōka ea Euferatese, e leng bohle ba tsebang Molao oa Molimo. Ba sa o tsebeng, u ba rute oona. ₂₆Mang kapa mang ea sa phetheng Molao oa Molimo oa hao, le molao oa khosi, a fele a ahlōloe; e ka ba ka ho mo ahlōlela lefu, kapa ka ho mo falatsa, kapa ka ho mo ja thepa, kapa ka ho mo kenya chankaneng.”

₂₇Eaba Esera o re: “Ho bokoe Morena Molimo oa bo-ntat'a rōna, ea rutileng khosi hore e lakatse ho khabisa Tempele ea Morena e Jerusalema, ₂₈ea entseng hore ke hauheloe ke khosi, le baeletsi ba eona, le mahosana 'ohle a eona, a matla. Ke ile ka matlafala, hobane Morena Molimo oa ka, o ile a ntlhohonolofatsa, 'me ka bokella banna ba Iseraele ba ka sehloohong, ba nyoloha le 'na.”