Molimo o hlohonolofatsa Iseraele
1“Uena ngoan'a motho, porofetela lithaba tsa Iseraele, u re: ‘Lōna lithaba tsa Iseraele, mamelang lentsoe la Morena. 2Morena Molimo o bua tjena: Lira li ile tsa tšeha, tsa re: “Aha! Lihlaba tsa boholo-holo re li hapile!” ’
3“Ka baka leo, porofeta, u re: ‘Morena Molimo o bua tjena: Ba ile ba le ripitla, ba le hapa kahohle hore le tle le be lefa le masalla a balichaba, ba le bua hampe, ba le soma. 4Joale lōna lithaba tsa Iseraele, mamelang lentsoe la Morena Molimo: Morena Molimo o bua tjena ho lithaba, le ho maralla, le ho linōka, le ho likhohlo, le ho lithako tseo e seng e le masupi, le ho metse e setseng e le feela, e ileng ea fetoha lelobelo le sesomo ho masalla a balichaba a le pota-potileng.
5“ ‘Ka baka leo, Morena Molimo o bua tjena: Ka baka la poulelo ea ka e kholo, ke buile ke halefetse lichaba tse ling le Edomo eohle, hobane ka monyaka le ka ho tella ho hoholo ba ikhapetse naha ea ka, e le hore ba tle ba inkele makhulo a eona.’
6“Ka baka leo, porofetela naha ea Iseraele, 'me u bue ho lithaba, le ho maralla, le ho linōka, le ho likhohlo, u re: ‘Morena Molimo o bua tjena: Ke bua ka khalefo le ka lefufa, hobane le ile la nyefoloa ke balichaba. 7Kahoo Morena Molimo o bua tjena: Kea hlapanya, ke re lichaba tse le pota-potileng le tsona li tla nyefoloa.
8“ ‘Empa lōna, lithaba tsa Iseraele, le tla hlōmela makala, le behele sechaba sa ka sa Iseraele litholoana, hobane se haufi se khutlela ha habo sona. 9Ke na le lōna, ke tla le rekolohela; le tla lemeloa, 'me le jalloe. 10Ke tla ngatafatsa sechaba sa lōna, ke ngatafatse le ntlo eohle ea Iseraele. Metse e tla boela e e-ba le baahi, le lithako li tsosoe. 11Ke tla ngatafatsa batho le liphoofolo tsa bona, 'me ba tla tsoala bana, ba ate. Le tla boela le haha litšeng tsa lōna tsa khale, 'me le atlehe ho feta pele. Kahoo le tla tseba hore ke 'na Morena. 12Ke tla etsa hore sechaba sa ka sa Iseraele se boele se tsamaee litseleng tsa lōna. Se tla le hapa, le be lefa la sona; le ke ke la hlola le se bolaela bana.
13“ ‘Morena Molimo o bua tjena: Batho ba re ho uena: “U seja-batho, 'me u jele bana ba sechaba sa hao,” 14ka baka leo, u ke ke ua hlola u e-ja batho, leha e le ho ja bana ba sechaba sa hao, ho rialo Morena Molimo. 15Ha nka ke ka hlola ke etsa hore u utloe balichaba ba u soma, kapa lichaba li u nyefola, kapa ka etsa hore sechaba sa heno se oe, ho rialo Morena Molimo.’ ”
Bophelo bo bocha ba Iseraele
16Lentsoe la Morena la fihla ho 'na hape, la re: 17“Uena ngoan'a motho, ha sechaba sa Iseraele se ne se sa phela naheng ea habo sona, se ile sa e silafatsa ka boitšoaro ba sona le ka liketso tsa sona. Ho 'na boitšoaro ba sona bo ne bo ka sesila sa mosali ea nang le lehatlelo. 18Kahoo ke ile ka hlatsetsa khalefo ea ka holim'a sona ka baka la mali ao se ileng sa a tšolla kahar'a naha, le ka baka la melingoana ea sona, eo se silafalitseng naha ka eona. 19Ke ile ka se qhalanyetsa har'a balichaba, 'me sa qhalanngoa har'a linaha; ka se ahlōlela boitšoaro ba sona, le liketso tsa sona. 20Hohle moo se ileng sa ea teng har'a balichaba, se ile sa silafatsa lebitso la ka le halalelang, hobane ho ile ha buuoa ka sona, ha thoe: ‘Sena ke sechaba sa Morena, empa se ile sa tlameha ho tsoa naheng ea hae.’ 21Empa ke ile ka boulela lebitso la ka le halalelang, leo ba ntlo ea Iseraele ba ileng ba le silafatsa har'a lichaba tseo ba neng ba ile ho tsona.
22“Ka baka leo, e-re ho ba ntlo ea Iseraele: Morena Molimo o bua tjena: Hase ka baka la lōna, lōna ba ntlo ea Iseraele, ke etsang sena, empa ke ka baka la lebitso la ka le halalelang, leo le le silafalitseng har'a lichaba tseo le ileng ho tsona. 23Ke tla bonahatsa khalalelo ea lebitso la ka le leholo, leo le le silafalitseng har'a lichaba, lebitso leo le le silafalitseng har'a tsona. Ha ke se ke bonahalitse khalalelo ea ka ka lōna, moo balichaba ba ntseng ba bona, ba tla tseba hore ke 'na Morena, ho rialo Morena Molimo.
24“Ke tla le ntša har'a balichaba, ke le phuthe linaheng tsohle, ke le khutlisetse naheng ea habo lōna. 25Ke tla le fafatsa ka metsi a hloekileng, 'me le tla hloeka; ke le hloekise litšileng tsohle tsa lona, le melingoana eohle ea lōna ea bohata ke e tlose. 26Ke tla le nea pelo e ncha le moea o mocha, ke felise pelo tse thata sa lejoe tse ka ho lōna, ke le nee pelo tse ikokobelitseng. 27Ke tla le nea Moea oa ka, ke etse hore le tsamaee ho ea ka litaelo tsa ka, le boloke melao ea ka, le e phethe. 28Le tla aha naheng eo ke neng ke e nee bo-ntat'a lōna. Le tla ba sechaba sa ka, 'me 'na ke be Molimo oa lōna. 29Ke tla le lopolla ho tsohle tse le silafatsang, ke le tlisetse chai ea koro, le se ke la hlola le bolaoa ke sekoboto. 30Ke tla etsa hore lifate tsa lōna li behe haholo, masimong le chaee lijo tse ngata, e le hore le se hlole le jara sekhobo sa sekoboto har'a balichaba. 31Kahoo le tla hopola metsamao ea lōna e mebe le liketso tsa lōna tse khopo, 'me le inyonye ka baka la makhopo a lōna le manyala a lōna. 32Le ke le tsebe hore hase ka baka la lōna ke etsang sena, ho rialo Morena Molimo. Lōna ba ntlo ea Iseraele, hlajoang ke lihlong, le soabele boitšoaro ba lōna!
33“Morena Molimo o bua tjena: Mohla ke seng ke le hloekisitse makhopong 'ohle a lōna, ke tla boela ke le ahisa metseng ea lōna, le lithako li tsosoe. 34Naha e fetohileng nanaola e tla lengoa hape, e se ke ea lula e le thite mahlong a bohle ba fetang ka tsela. 35Ba tla re: ‘Naha ena e neng e le nanaola, e se e tšoana le tšimo ea Edene; metse e neng e setse e le lithako, e senyehile, e le masupi, joale e hahelelitsoe, e na le baahi.’ 36Kahoo balichaba ba setseng ba le pota-potile ba tla tseba hore ke 'na Morena, ea tsositseng masupi, a lema masimo a neng a se a letse. 'Na Morena, ke buile joalo, 'me ke tla phethahatsa.
37“Morena Molimo o bua tjena: Seo ke tla boela ke lumella ba ntlo ea Iseraele ho nkōpa sona, 'me ke ba etsetse sona, ke sena: Ke tla ba atisetsa thari, ba be joaloka mohlape oa linku, 38ba ngatafale joaloka mehlape ea linku eo ho nyeheloang ka eona Jerusalema, mohl'a mekete e halalelang. Ka mokhoa o joalo metse e fetohileng masupi e tla tlala matšoele-tšoele a batho, 'me ba tsebe hore ke 'na Morena.”
