Khosi ea Egepeta e tšoantšoa le khanyapa
1Ka letsatsi la pele la khoeli ea leshome le metso e 'meli selemong sa leshome le metso e 'meli, lentsoe la Morena la fihla ho 'na, la re: 2“Uena ngoan'a motho, binela Faro, khosi ea Egepeta, koli-ea-malla, u re:
“ ‘U tšoana le taoana har'a lichaba,
athe u ka khanyapa
e phelang maoatleng,
e thalang kahar'a linōka tsa eona,
e tuluanyang metsi ka maoto a eona,
e lukang linōka e be likhotlela.’
3“Morena Molimo o bua tjena:
“ ‘Ka matšoele a lichaba tse ngata,
ke tla akhela letlōoa la ka,
ke le akhele holima hao,
ka letlōoa lena a u hulele kantle.
4Ke tla u akhela holim'a lefatše,
ke u akhele har'a 'manana,
ke etse hore nonyana
li lule holim'a hao,
batana tsohle tsa naha
li je setōpō sa hao.
5Ke tla lahla nama ea hao,
ke e lahlele holim'a lithaba,
ke tlatse likhohlo
ka mosohlo oa hao.
6Hohle-hohle ho ea fihla lithabeng,
ka mali a hao ke tla noesetsa naha,
likhohlo tsona li tlale nama ea hao.
7Etlare ha ke u timetsa
maholimo ke a koahele,
linaleli tsa 'ona ke li fifatse.
Letsatsi le tla koaheloa ke maru,
khoeli e se ke ea e-ba le ngoeli.
8Maseli 'ohle
a phatsimang a leholimo
ke tla a fifatsa ka baka la hao,
naha ea hao e apareloe ke lefifi,
ho rialo Morena Molimo.
9“ ‘Ha ke li behela
tsa ho timetsoa ha hao,
chaba tse ngata li tla ba tlokotsing,
li le naheng tseo u sa k'a li tseba.
10Ke tla etsa hore
chaba tse ngata li u makalle,
khosi tsa tsona
li thōthōmele ke tšabo,
ha ke tsokotsa sabole ea ka
kapele ho tsona.
Mohl'a tsatsi la timelo ea hao,
batho ba tla thōthōmela
ka nako tsohle,
motho ka mong
a thōthōmele ke tšabo,
a thōthōmele
ke ho tšaba lefu la hae.
11“ ‘Kahoo Morena Molimo o bua tjena:
“ ‘Khosi ea Babilona
e tla le futuhela,
e le futuhele e nkile sabole.
12Mabōtho a hao ke tla a etsa mofela,
ke a bolaee ka sabole
tsa natla tsa banna,
banna ba sehlōhō
ho feta lichaba tsohle.
Bokhabane ba Egepeta
ba tla bo felisa,
mabōtho 'ohle a eona ba a ripitle.
13Khomo tsa hao tsohle
ke tla li bolaea,
khomo tse pel'a motlaputlapu,
motlaputlapu oa metsi;
ha a sa tla lukoa ke leoto la motho,
ha a sa tla lukoa ke tlhako ea khomo.
14Ke tla hloekisa metsi, maluke a fele,
linōka tsa teng li phalle joaloka ole,
ho rialo Morena Molimo.
15“ ‘Mohla ke fetolang Egepeta,
ke e fetola nanaola,
ke felisa tsohle tse teng ho eona,
ke bolaea bohle ba ahileng ho eona,
ke hona ba tla tseba
hore ke 'na Morena.’
16“Ena ke koli-ea-malla eo ba tla e binela Egepeta. Basali ba balichaba ba tla e bina, ba llele Egepeta le sechaba sohle sa eona, ho rialo Morena.”
Qalo ea Bafu
17Ka letsatsi la leshome le metso e mehlano la khoeli selemong sa leshome le metso e 'meli, lentsoe la Morena la fihla ho 'na, la re: 18“Uena ngoan'a motho, llela sechaba sa Egepeta, ebe u se rōmela Qalong ea Bafu 'moho le barali ba lichaba tse ling tse matla, tse theohetseng mohohlong. 19E-re ho tsona:
“ ‘Eo le mo fetang ka botjaka
ke mang?
Theohelang,
le e'o rapalla har'a maqai!’
20“Sechaba sa Egepeta se tla shoela har'a ba bolailoeng ka sabole. Se abetsoe sabole, kahoo se hulele ho eona le mabōtho 'ohle a sona. 21Linatla tsa bahlabani ba Qalong ea Bafu li tla bua ka Faro le ba thusanang le eena, li re: ‘Ba theohetse mona, 'me ba rapaletse le maqai a bolailoeng ka sabole.’
22“Asiria e teng le mabōtho 'ohle a eona, e teetsoe hare ke mabitla a bahlabani bohle ba eona, ba bolailoeng ka sabole. 23Mabitla a bona a likhocheletsaneng tsa mohohlo, a teetse lebitla la Asiria hare. Bohle ba bolailoeng ka sabole, ke bona ba kileng ba tšosa batho ba phelang lefatšeng.
24“Elame le eona e teng, mabōtho a eona a teetse lebitla la eona hare. Kaofela ha bona ba bolailoe ka sabole, ba theohela Qalong ea Bafu e nts'e le maqai; bona ba kileng ba tšosa batho ba phelang lefatšeng; joale ba jere sekhobo sa bona 'moho le ba theohetseng mohohlong. 25Elame e abetsoe liphate har'a ba bolailoeng le mabōtho 'ohle a eona. E teetsoe hare ke mabitla a bona; kaofela ha bona ke maqai a bolailoeng ka sabole. Le hoja ba ile ba tšosa batho ba phelang lefatšeng, joale ba jere sekhobo sa bona 'moho le ba theohetseng lebitleng. Elame e beiloe har'a ba bolailoeng.
26“Mesheke le Tubale le tsona li teng, 'moho le mabōtho 'ohle a tsona. Li teetsoe hare ke mabitla a bahlabani ba tsona; kaofela ha bona ke maqai a bolailoeng ka sabole, le hoja ba ile ba tšosa batho ba phelang lefatšeng. 27Empa ha baa epeloa le bahlabani ba maqai ba bolailoeng, ba theohetseng Qalong ea Bafu le lihlomo tsa bona tsa ntoa, ba ileng ba sama lisabole tsa bona, litōpō tsa bona tsa koaheloa ka lithèbè tsa bona, le hoja ba ile ba tšosa linatla tse phelang lefatšeng.
28“Le uena Faro, u tla robokeloa, u rapalle har'a maqai le ba ileng ba bolaoa ka sabole.
29“Edomo le eona e teng, le likhosi tsa eona le mahosana a eona. Le hoja batho bana e ne e le linatla, ba rapaletse le ba bolailoeng ka sabole. Ba tla rapalla joalo le maqai le ba theohelang mohohlong.
30“Ho teng le mahosana 'ohle a lebōea, le Basidone bohle ba teng ba theohetseng mohohlong le ba bolailoeng ka sabole. Le hoja ba ne ba tšajoa haholo, bonatla ba bona bo ba hlabisitse lihlong, ba shoele e nts'e le maqai, ba rapaletse le ba bolailoeng ka sabole, ba jere sekhobo sa bona le ba theohetseng mohohlong.
31“Faro o tla bona batho bana bohle ba bolailoeng ka sabole, 'me o tla tšeliseha, eena le mabōtho 'ohle a hae, ho rialo Morena Molimo.
32“Le hoja ke ile ka etsa hore Faro a tšajoe haholo ke batho ba phelang lefatšeng, o tla rapalla har'a maqai le ba bolailoeng ka sabole; eena Faro le mabōtho 'ohle a hae, ho rialo Morena Molimo.”
