ESEKIELE 25

₁Lentsoe la Morena la fihla ho 'na, la re: ₂“Uena ngoan'a motho, talima Baamone, 'me u ba porofetele. ₃E-re ho bona: ‘Mamelang lentsoe la Morena Molimo. Morena Molimo o bua tjena: Kahobane le ile la tšeha ha Sehalalelo sa ka se silafatsoa, le ha naha ea Iseraele e ripitloa, le ha ba ntlo ea Juda ba isoa bothōpuoeng; ₄ka baka lena, ke tla neelana ka lōna ho banna ba tsoang Bochabela, le be bahlanka ba bona. Ba tla hloma litente tsa bona har'a lōna, ba hahe teng. Ba tla ja litholoana tsa lōna, ba noe lebese la lōna. ₅Raba ke tla e fetola lekhulo la likamele, metse ea Amone eona ke e fetole mapatlelo a linku, 'me le tla tseba hore ke 'na Morena. ₆Morena Molimo o bua tjena: Le ile la opa liatla, la tila-tila fatše ka maoto, 'me la nyelisa naha ea Iseraele ka lipelo tsa lōna tsohle; ₇ka baka leo, ke tla otlollela letsoho la ka holim'a lōna, ke neelane ka lōna ho balichaba. Ke tla le ripitla hore le se hlole le e-ba sechaba har'a lichaba tse ling le hore le se hlole le e-ba le naha, ke le timetse le tle le tsebe hore ke 'na Morena.’ ”

₈Morena Molimo o bua tjena: “Erekaha ba Moabe le ba Seire ba itse: ‘Bonang, ba ntlo ea Juda ba tšoana le lichaba tse ling tsohle,’ ₉ke tla etsa hore metse ea Moabe e meeling, metse ea Bete-Jeshimote le Baale-Meone le Kiriataime, eo e leng tlōtla ea naha eo, ₁₀e futuheloe ke banna ba tsoang Bochabela. Ke tla neelana ka Bamoabe hammoho le Baamone sechabeng sa Bochabela, hore e be bahlanka ba sona, e le hore Baamone ba se hlole ba hopoloa har'a lichaba. ₁₁Ke tla otla Bomoabe, 'me ba tla tseba hore ke 'na Morena.”

₁₂Morena Molimo o bua tjena: “Erekaha Edomo e iphetelitse ho ba ntlo ea Juda, 'me ea e-ba molato o moholo ka ho etsa joalo, ₁₃Morena Molimo o bua tjena: ‘Ke tla otlollela letsoho la ka holim'a Edomo, ke bolaee baahi ba eona, le liphoofolo tsa bona, ke e fetole nanaola; ho tloha Temana ho ea fihla Dedane ke ba bolaee ka sabole. ₁₄Ke tla iphetetsa holim'a Edomo ka letsoho la sechaba sa ka sa Iseraele. Se tla otla Baedomo ho ea ka bohale ba ka le khalefo ea ka, 'me bao ba tla tseba boiphetetso ba ka, ho rialo Morena.’ ”

₁₅Morena Molimo o bua tjena: “Kaha Bafilesita ba iphetelitse ka lipelo tse lōnya, 'me ka baka la bora ba bona ba khale ba ne ba rata ho timetsa Juda, ₁₆Morena Molimo o bua tjena: ‘Ke tla otlollela letsoho la ka holim'a Bafilesita, ke bolaee Bakerete, ke timetse le masalla a ba phelang lebōpong la leoatle. ₁₇Ke tla iphetetsa haholo ka bona, ka likotlo tse tšabehang. Mohla ke iphetetsang ka bona ke hona ba tla tseba hore ke 'na Morena.’ ”