Samaria le Jerusalema ke liotsoa
1Lentsoe la Morena la boela la fihla ho 'na, la re: 2“Uena ngoan'a motho, ho ne ho le teng basali ba babeli, e le barali ba mosali a le mong. 3Ba ile ba fetoha liotsoa naheng ea Egepeta, ba ineela bootsoa ho tloha bocheng ba bona. Naheng eo litlhōkō tsa matsoele a bona li ile tsa tsikinyetsoa, le lifuba tsa bona tsa phōlloa. 4Lebitso la e moholo e ne e le Ohola, moen'a hae eena e le Oholeba. E ne e le basali ba ka, ba ileng ba ntsoalla bara le barali. Ohola ke Samaria, Oholeba eena ke Jerusalema.
5“Ohola o hlile a ineela bootsoa e sa le oa ka; a chachehela baratuoa ba hae, e leng Baasiria ba ahelaneng le eena. 6E ne e le babusi le balaoli ba bahlabani, ba apere liaparo tse putsoa, kaofela ha bona e le bahlankana ba litjaka, ba palamang lipere. 7A ineela bootsoa le mokhetho oohle oa Baasiria, a itšilafatsa ka melingoana eohle ea bohata, ea e mong le e mong oa bao a neng a ba chachehela. 8Ha aa ka a tlohela bootsoa boo a bo qalileng Egepeta, ha banna ba ne ba robala le eena a sa le mocha, ba tsikinyetsa litlhōkō tsa matsoele a hae, ba tšollela litakatso tsa bona holim'a hae.
9“Ka baka lena, ke ile ka neelana ka eena matsohong a baratuoa bao ba hae ba Baasiria, bao a neng a ba chachehela. 10Ba ile ba mo tsolisa, ba nka bara le barali ba hae, eena ba 'molaea ka sabole. O ile a fetoha pale har'a basali, 'me kotlo ea mo oela holimo.
11“Leha ngoan'abo, Oholeba, a bona hona, litakatso tsa hae tsa tlōka ho feta tsa Ohola, le bootsoa ba hae ba fetella. 12Le eena a chachehela Baasiria ba ahelaneng le eena, e leng babusi le balaoli ba bahlabani, ba apereng tse majabajaba, ba palamang lipere, kaofela ha bona e le bahlankana ba litjaka. 13Ka bona hore Oholeba le eena o silafetse; bobeli ba bona ba tsamaea tsela e le 'ngoe.
14“Empa a 'na a fetella ka bootsoa ba hae. A bona litšoantšo tsa banna ba Bakalatiea leboteng, li entsoe ka khokhotsi. 15Mathekeng ba ne ba itlamme ka linyepa, lihloohong ba roetse likatiba tse ebeselang, kaofela ha bona ba ne ba ka mahosana a Bakalatiea, matsoalloa a Babilona. 16Hang-hang ha a ba bona a ba chachehela, a ba a rōmela maqosa ho bona, Babilona. 17Bakalatiea ba tla, ba kena likobong tsa hae, ba mo silafatsa ka bootsoa ba bona. Ha ba se ba mo silafalitse o ile a ba nyonya, a ba a ba furalla. 18Ha a ntse a tsoela pele ho etsetsa bootsoa ba hae pepeneneng, a pepesa bofeela ba hae, ke ile ka mo nyonya, ka ba ka mo furalla, joalokaha ke ile ka furalla ngoan'abo. 19Empa a 'na a feteletsa bootsoa ba hae, ha a hopola bocha ba hae, e sa le seotsoa naheng ea Egepeta. 20Hona moo Egepeta o ne a chachehela baratuoa ba hae, bao botona ba bona bo neng bo tšoana le maqōbō a litonki; bao peō ea bona ea bonna e neng e hōshōha joaloka ea lipere tsa lipoho. 21Uena Oholeba, u ile ua hlōlōheloa bokhopo ba bocha ba hao, ha Baegepeta ba ne ba phōlla sefuba sa hao, ba tsikinyetsa litlhōkō tsa matsoele a hao.
Molimo o ahlōla Oholeba
22“Ka baka lena, uena Oholeba, Morena Molimo o bua tjena: Ke tla u qabanya le baratuoa ba hao, bao u ba nyonyang, u ba furaletseng; ke tla etsa hore ba u futuhele ba e-tsoa hohle. 23Bao ke bara ba Babilona, le Bakalatiea bohle, banna ba Pekode le Shōoa le Kōoa, le Baasiria bohle ba nang le bona. Ke bahlankana ba litjaka, babusi le balaoli le bahlabani le mahosana a tummeng, bao kaofela ha bona ba palamang lipere. 24Ba tla u futuhela ka libetsa le ka likariki tsa ntoa, le ka makoloi, le ka lebōtho la bahlabani; ba u futuhele ka lithèbè le ka lithejana, ba roetse likatiba tsa tšepe, ba e-tsoa hohle. Ke tla ba nea matla a ho ahlōla, 'me ba tla u ahlōla ho ea ka likahlōlo tsa bona. 25Ke tla u halefela haholo, 'me le bona ba tla u halefela haholo. Ba tla u shōqōla linko le litsebe, masalla a hao ba a bolaee ka sabole. Ba tla thōpa bara le barali ba hao, ba chese masalla a hao ka mollo. 26Ba tla u hlobolisa liaparo tsa hao, ba nke le mabenyane a hao. 27Ka mokhoa o joalo ke tla felisa bokhopo ba hao, le bootsoa boo u bo qalileng naheng ea Egepeta. Ha u sa tla hlola u bona lintho tsena, leha e le hona ho hlōlōheloa Egepeta hape.
28“Morena Molimo o bua tjena: Ke se ke tla neelana ka uena matsohong a bao u ba hloileng, u ba nyonyang, 'me u ba furaletseng. 29Ba tla u phelisa ka lehloeo, ba u amohe tsohle tseo u itšebelelitseng tsona, ba u siee u tsotse, u le feela, 'me lihlong tsa bootsoa ba hao li bonahale. Bokhopo le bootsoa ba hao 30ke tsona tse u lihetseng, hobane u ile ua chachehela balichaba, ua itšilafatsa ka melingoana ea bona ea bohata. 31Kaha u ile ua etsisa ngoan'eno, ke tla u nea mohope oa hae letsohong, u o noe.
32“Morena Molimo o bua tjena:
“U tla noa mohope oa ngoan'eno,
mohope o moholo,
mohope o mothamo;
ba tla u soma, ba u tlepe litšeho,
hoba mohope oo o tletse likenkeng.
33U tla noa mohope oa tšabo
le oa timelo,
mohope oa ngoan'eno, oa Samaria,
u be letahoa, u be 'malitsietsi.
34U tla o ngapetsa, u o minyeletse,
u o bjaramanye,
u o etse maqhetsoana;
ka maqhetsoana
u itlepolake matsoele.
“'Na ke buile joalo, ho rialo Morena Molimo.
35“Ka baka lena, Morena Molimo o bua tjena: Kahobane u ile ua ntebala, ua mphuralla, u tla jara molato oa bohlola ba hao le bootsoa ba hao.”
Molimo o ahlōla Ohola le Oholeba
36Morena a re ho 'na: “Uena ngoan'a motho, na u tla ahlōla Ohola le Oholeba? Ba hlokomelise liketso tsa bona tse manyala. 37Ba entse bohlola, ba khanathetse mali matsohong. Ba entse bohlola le melingoana ea bona ea bohata; ba bile ba etselitse melingoana eo mahlabelo a secheso ka bana bao ba ntsoaletseng bona. 38Le 'na ba nkentse tjena: Ka lona tsatsi leo ba silafalitse Sehalaleko sa ka, ba hlompholla Lisabatha tsa ka. 39Hona mohla ba neng ba etsetsa melingoana ea bohata mahlabelo a secheso ka bana ba bona, ba ile ba kena ka Sehalalelong sa ka, ba se silafatsa. Sena ke sona seo ba se entseng ka Tempeleng ea ka.
40“Ba bile ba rōma maqosa ho lata banna ba tsoang hōle, 'me ha ba fihla u ile ua ea tola, ua khabisa lintši tsa hao, ua nt'o roala mabenyane a hao. 41Ua lula betheng e butša-butša, kapele ho eona ho beiloe tafole e nang le mokubetso le ole ea ka.
42“Lerata la letšoele le iketlileng le ne le hlabile holimo, ho latiloe le matahoa a tsoang lehoatateng, ho tla kopana le banna ba motse. Ba fihla ba roesa mosali le ngoan'abo lipetja matsohong le meqhaka e metle lihloohong. 43Eaba ke bua ka ea tsofaletseng bohloleng, ke re: ‘A ba ke ba mo etse seotsoa, hobane efela e le sona!’ 44Eaba ba robala le eena, ba robala le basali bao ba khopo, e leng Ohola le Oholeba, joalokaha banna ba robala le mosali oa seotsoa. 45Empa banna ba lokileng ba tla ba ahlōla ka kotlo ea basali ba lifebe le babolai, kahobane baa feba, 'me matsoho a bona a khanathetse mali.
46“Morena Molimo o bua tjena: Ba bitsetse letšoele le tl'o ba tšosa, le be le ba falatse. 47Letšoele leo le tla ba tlepetsa ka majoe, le ba bolaee ka lisabole; le bolaee bara le barali ba bona, le chese le matlo a bona.
48“Ke tla felisa bokhopo naheng ena, e le hore basali ba tle ba hlokomele, esere ba le etsisa. 49Le tla otleloa bokhopo ba lōna, le jare melato ea libe tsa lōna tsa ho khumamela melingoana ea bohata. Ka hona le tla tseba hore ke 'na Morena Molimo.”
