ESEKIELE 2

₁Lentsoe la re ho 'na: “Uena ngoan'a motho, ema ka maoto, 'me ke tla bua le uena.” ₂Ha lentsoe le ntse le bua, Moea oa kena ka ho 'na, oa mphahamisa, ka ema ka maoto, ka utloa le bua ho 'na.

₃La re ho 'na: “Uena ngoan'a motho, ke u rōma ho bana ba Iseraele, e leng sechaba sa bafetoheli, se ileng sa mphetohela; sona le bo-ntat'a sona haesale se mphetohela ho fihlela kajeno. ₄Sechaba seo ke u rōmang ho sona se manganga, se pelo li thata. E-re ho sona: ‘Morena Molimo o bua tjena.’ ₅Ebang sea u mamela kapa ha se u mamele, hobane ke sechaba se mphetohetseng, feela se tla tseba hore moporofeta o bile teng har'a sona. ₆Ha e le uena ngoan'a motho, u se ke ua se tšaba, kapa ua tšoha lipolelo tsa sona. U se ke ua se tšaba leha u ka teeloa hare ke tšehlo le meutloa, ua phela har'a liphepheng. U se ke ua tšaba seo se se buang kapa sa u tšosa, le hoja e le sechaba sa bafetoheli. ₇U se bolelle mantsoe a ka, ebang sea mamela kapa ha se mamele, hobane ke sechaba sa bafetoheli. ₈Empa uena ngoan'a motho, u mamele seo ke u bolellang sona. U se ke ua mphetohela joaloka sechaba seo se mphetohetseng. Ahlama, u je seo ke tla u nea sona.”

₉Eare ha ke talima ka bona letsoho le otlolletsoe ho 'na. Le ne le tšoere buka ₁₀eo le ileng la e phetla kapele ho 'na. Ka mahlakoreng a eona a mabeli ho ne ho ngotsoe mantsoe a koli-ea-malla, a bofifi le a bomalimabe.