Molimo o nyatsa melimo ea bohata
1Baholo ba bang ba sechaba sa Iseraele ba tla ho 'na, ba lula kapele ho 'na. 2Lentsoe la Morena la fihla ho 'na, la re: 3“Uena ngoan'a motho, batho bana ba rapela melingoana ea bohata ka lipelong tsa bona. Ba beile sekhōpi sa libe tsa bona kapele ho lifahleho tsa bona. Na nka lumela hore ba tl'o mpotsa?
4“Ka lebaka lena, bua le bona, u re: ‘Morena Molimo o bua tjena: Ha Moiseraele ofe kapa ofe ea rapelang molingoana oa bohata ka pelong ea hae, ea beang sekhōpi sa libe tsa hae kapele ho sefahleho sa hae, a e-tla ho moporofeta, ke 'na Morena ea tla mo arabela, ho latela bongata ba melingoana ea hae ea bohata. 5Ke tla etsa hona e le ho hapa lipelo tsa bana ba Iseraele, hobane bohle ba mphuraletse ka baka la melingoana ea bona ea bohata.’
6“Ka baka lena, e-re ho bana ba Iseraele: ‘Morena Molimo o bua tjena: Bakang, le furalle melingoana ea lōna ea bohata, le furalle le mesebetsi ea lōna eohle e manyala!
7“ ‘Ha motho ofe kapa ofe oa sechaba sa Iseraele, kapa ofe le ofe oa balichaba, ea jakileng naheng ea Iseraele, ea ikarohanyang le 'na, ea rapelang melingoana ea bohata ka pelong ea hae, a bea sekhōpi sa sebe sa hae kapele ho sefahleho sa hae, 'me a e-ea ho moporofeta ho ea 'motsa, ke 'na Morena ka sebele ea tla mo araba. 8Motho ea joalo ke tla mo loantša, ke mo etse setsoto le sesomo, ke mo khaole sechabeng sa ka, 'me le tla tseba hore ke 'na Morena.
9“ ‘Haeba moporofeta a ka thetsoa hore a porofete, ke hobane ke 'na Morena ea thetsitseng moporofeta eo, 'me ke tla otlollela letsoho la ka holim'a hae, ke mo timetse sechabeng sa ka sa Iseraele. 10Moporofeta eo le ea 'motsang ba tla jara kotlo ea bokhopo ba bona. Kotlo ea moporofeta e tla tšoana le kotlo ea ea 'motsitseng. 11Kahoo bana ba Iseraele ha ba sa tla hlola ba mphuralla, 'me ha ba sa tla hlola ba silafatsoa ke litšito tsa bona; e tla ba sechaba sa ka, 'me 'na ke be Molimo oa sona, ho rialo Morena Molimo.’ ”
Nōoe, Daniele le Jobo
12Lentsoe la Morena la boela la fihla ho 'na, la re: 13“Uena ngoan'a motho, ha sechaba sa naha se ntšiteloa haholo ka ho ntlhokela botšepehi, ke tla otlollela letsoho la ka holim'a naha eo, ke felise lijo tsa naha eo, ke e tlisetse sekoboto, ke bolaee baahi ba eona, le liphoofolo tsa eona. 14Leha eba banna bana ba bararo: Nōoe, Daniele le Jobo, ba ne ba phela naheng eo, ho loka ha bona ho ne ho tla lopolla bona feela, ho rialo Morena.
15“Ha nka rōmela liphoofolo tse hlaha ho feta har'a naha eo, 'me li bolaea batho, naha e sala e se na motho, ho se le motho ea ka fetang har'a eona; 16haeba banna bana ba bararo ba ne ba le naheng eo, kea ikana, ho rialo Morena Molimo, ba ne ba ke ke ba lopolla bara ba bona kapa barali ba bona naheng eo. E ne e tla ba bona feela ba ka pholosoang, empa naha eona e ne e tla fetoha nanaola.
17“Kapa ha nka bolaea baahi ba naha eo ka sabole, 'me ka re: ‘Sabole a e ke e bolaee baahi ba naha ena!’ ebe ke bolaea batho ka eona le liphoofolo tsa eona; 18haeba banna bana ba bararo ba ne ba le naheng eo, kea ikana, ho rialo Morena, ba ne ba ke ke ba lopolla bara ba bona kapa barali ba bona naheng eo.
19“Kapa ha nka rōmela lefu la seoa naheng eo, khalefo ea ka ka e hlatsetsa naheng eo ka ho tšōlla mali, ka bolaea batho le liphoofolo; 20haeba Nōoe le Daniele le Jobo ba ne ba phela naheng eo, kea hlapanya, ho rialo Morena Molimo, ba ne ba ke ke ba lopolla mora kapa morali; ho loka ha bona ho ne ho tla lopolla bona feela.
21“Morena Molimo o bua tjena: Ho tla tšabeha hakaakang Jerusalema ha ke e rōmela likotlo tsa ka tse 'ne, e leng sabole, sekoboto, libatana le lefu la seoa, ho bolaea baahi ba naha eo le liphoofolo tsa eona! 22Empa ho tla ba le masalla, e leng bara le barali ba tla ntšoa Jerusalema. Ba tla tla ho lōna, 'me etlare ha le bona boitšoaro ba bona le liketso tsa bona le tšelisehe mabapa le koluoa eo ke e lihetseng holim'a Jerusalema, e leng likoluoa tsohle tseo ke li lihetseng holim'a eona. 23Le tla tšeliseha ha le bona boitšoaro ba bona, le liketso tsa bona, hobane le tla be le tseba hore tsena li entsoe ke 'na ka mabaka, ho rialo Morena Molimo.”
