PHALLO 35

₁Eaba Moshe o bōkella sechaba sohle sa bana ba Iseraele, o re ho sona: “Tsena ke tseo Morena a laetseng hore le li etse: ₂‘Le ka sebetsa ka matsatsi a tšeletseng, empa letsatsi la bosupa le tla halalela ho lōna; ke Sabatha, letsatsi la phomolo ea Morena; mang kapa mang ea tla sebetsa ka letsatsi leo o tla bolaoa. ₃Malapeng 'ohle a lōna le se ke la besa mollo ka letsatsi lena la Sabatha.’ ”

₄Moshe a bua le sechaba sohle sa bana ba Iseraele, a re: “Sena ke seo Morena a se laetseng, a re: ₅'Ntšetsang Morena limpho tsa lōna; e mong le e mong a ntšetse Morena ka pelo e tšoeu: khauta, le silefera, le lethose; ₆masela a maputsoa, le a perese, le a mafubelu, le a lene, le ka boea ba lipoli; ₇le matlalo a lipheleu a 'masa, le matlalo a liqibi, le lithupa tsa sefate sa mositsane; ₈le ole e bonesang, le linōko tsa ole e tlotsang, le tsa mokubetso o monko o monate; ₉le majoe a bohlokoa a kareneleane, le mahakoe a rokelloang setipeng, le mokhabisong oa sefuba.

₁₀“ ‘Bohle ba bohlale har'a lōna ba ke ba tle, ba tl'o etsa tsohle tseo Morena a li laetseng: ₁₁e leng Leaho, tente ea lona, le marulelo a lona, le lihokelo tsa lona, le lithupa tsa lona, le maballo a lona, le litšiea tsa lona, le liluloana tsa tsona; ₁₂le areka, le mefeng ea eona, le sekoahelo sa tefelo ea sebe, le lesira le sireletsang areka; ₁₃le tafole, le mefeng ea eona, le lijana tsohle tsa eona, le bohobe bo halalelang; ₁₄le seluloana sa lebone le bonesang, le tsohle tsa sona, le mabone a sona, le ole e bonesang; ₁₅le aletare ea mokubetso, le mefeng ea eona, le ole e tlotsang, le mokubetso o monko o monate, le lesira la monyako, le monyakong oa Leaho; ₁₆le aletare ea secheso, le mokhabiso oa eona oa lethose o kang letlōoa, le mefeng ea eona, le tsohle tsa eona, le sekotlolo sa ho itlhatsoetsa, le seluloana sa sona; ₁₇le masela a seotloana, le litšiea tsa sona, le liluloana tsa tsona, le lesira la monyako oa seotloana; ₁₈le limapo tsa Tente, le limapo tsa seotloana, le mehala ea tsona; ₁₉le liaparo tse lōhiloeng tsa ho sebeletsa ka Sehalalelong, le liaparo tse halalelang tsa moprista Arone, le liaparo tsa bara ba hae, ha ba sebeletsa e le baprista.’ ”

₂₀Sechaba sohle sa bana ba Iseraele sa tloha kapele ho Moshe. ₂₁Batho ba boela ba tla; bohle bao pelo tsa bona li ratang, le bohle ba pelo li tšoeu, ba tlisetsa Morena limpho bakeng sa ho etsa Tente ea Morena, le bakeng sa tšebeletso e tla etsetsoa ka ho eona, le bakeng sa ho etsa liaparo tse halalelang. ₂₂Ha kena le basali, bohle bao pelo tsa bona li ratang; ba tlisa lipetja, le masala a roaloang linkong, le mefitšane, le lipèlè, le tsohle tse entsoeng ka khauta; bohle ba nang le hona ba tlisetsa Morena limpho tsa khauta. ₂₃Bohle ba neng ba e-na le masela a maputsoa, le a perese, le a mafubelu, le a entsoeng ka lene, a lōehileng; le boea ba lipoli, le matlalo a lipheleu a 'masa, le matlalo a liqibi, baa tlisa. ₂₄Bohle ba fanang ka silefera, le ka lethose, ba tlisetsa Morena limpho tseo. Le bohle ba neng ba e-na le lithupa tsa sefate sa mositsane tse ka sebelisoang, ba li tlisa. ₂₅Basali bohle ba bohlale ba ohla ka matsoho a bona; ba tlisa likhoele tsa ohliloeng tse putsoa, le tse perese, le tse khubelu, le tsa lene.

₂₆Basali bohle ba ratang, ba bohlale, ba ohla boea ba lipoli. ₂₇Baokameli ba tlisa majoe a bohlokoa a kareneleane, le mahakoe a rokelloang setipeng, le a mokhabiso oa sefuba; ₂₈le linōko, le ole e bonesang, le ole e tlotsang, le mokubetso o monko o monate. ₂₉Banna bohle le basali bohle ba bana ba Iseraele, ba pelo li tšoeu, ba tlisa lintho tsa mosebetsi oo Morena a neng a laetse Moshe hore o etsoe, ba tlisetsa Morena limpho tsa boithaopo.

₃₀Eaba Moshe o re ho bana ba Iseraele: “Bonang, Morena o bitsitse Besalele ka lebitso; ke mora oa Uri, mora oa Hure, oa lelōko la Juda. ₃₁O mo file Moea oa Molimo, le bohlale, le kelello, le tsebo ea mesebetsi eohle: ₃₂ho rala litšoantšo tsa mesebetsi e etsoang, le ho sebetsa ka khauta, le ka silefera, le ka lethose; ₃₃le ho betla majoe a tla kenngoa mekhabisong, le ho betla lithupa, le ho etsa mesebetsi eohle, ho latela setšoantšo se raliloeng. ₃₄Eena le Oholeabe, mora oa Ahimasake, oa lelōko la Dane, ba neiloe bohlale ba ho ruta. ₃₅Morena o ba neile lipelo tse bohlale, ba tle ba etse mesebetsi eohle ea bolala, le mesebetsi eohle e etsoeng ke litsebi, le ea lihōmi tsa masela a maputsoa, le a perese, le a mafubelu, le a lene; le mesebetsi ea lilōhi. Bana ke litsebi tsa mesebetsi ena eohle, le lirali tsa litšoantšo tsa mesebetsi.