Matlapa a bobeli a Molao
1Morena a re ho Moshe: “Ipetlele matlapa a mabeli a Molao a tšoanang le a pele. Holim'a matlapa ao ke tla ngola mantsoe a neng a ngotsoe holim'a matlapa a pele, ao u a pshatlileng. 2Itokisetse hore hosasane, e sa le hoseng, u nyolohele thabeng ea Sinai, u itlhahise kapele ho 'na kaholim'a tlhōrō ea thaba. 3Ho se be motho ea tla nyoloha le uena; ho se be motho ea ka bonoang kae kapa kae thabeng eo. Mehlape ea linku le ea likhomo e se ke ea fula thabeng eo.”
4Moshe a betla matlapa a mabeli a tšoanang le a pele, a tsoha ka malungoalungoana, a nyolohela thabeng ea Sinai, joalokaha Morena a ne a mo laetse, a nkile matlapa a mabeli.
5Morena a theoha a le kahar'a leru, a ema le Moshe hona moo, 'me Moshe a bitsa lebitso la Morena. 6Eaba Morena o feta kapele ho eena, 'me a hōoa, a re: “Ke 'na Morena! Ke 'na Morena! Molimo ea nang le kutloelo-bohlōko, ea mosa, ea liehang ho halefa, ea nang le mohau o moholo le botšephi; 7ea hauhelang ba likete-kete ka ho ba tšoarela bokhopo ba bona le litlōlo tsa bona, le libe tsa bona, empa ea ke keng a tlohela ho otla ba molato; ea otlang bana, le litlōhōlō, ka baka la bokhopo ba bo-ntat'a bona, ho isa molōkong oa boraro le oa bone.”
8Moshe a inamela fatše ka potlako, a khumamela Morena. 9Eaba o re: “Haeba joale u nkhauhetse, ke rapela hore Morena a ke a tsamaee le rōna, le hoja re le sechaba se manganga. Ak'u re tšoarele bokhopo ba rōna le libe tsa rōna, 'me u re etse ba hao.”
Selekane sea nchafatsoa
10Morena a re: “Bona, ke etsa selekane. Mahlong a sechaba sohle sa heno, ke tla etsa limakatso tse e-s'ong ho etsoe lefatšeng lohle, le har'a lichaba tsohle. Sechaba sohle seo u phelang har'a sona se tla bona mosebetsi oa Morena, hobane seo ke leng lekhatheng la ho se etsa ka uena sea tšabeha. 11Ela hloko seo ke u laelang sona kajeno. Ke tla u tebella Baamore, le Bakanana, le Bahete, le Baperise, le Bahife, le Bajebuse. 12Hlokomela, u se ke ua etsa selekane le baahi ba naha eo u eang ho eona, esere selekane seo ea e-ba leraba har'a lōna. 13U heletse lialetare tsa bona, u thue lifika tsa bona tseo ba li khumamelang, u senye litšoantšo tsa bona tsa Ashera.
14“U se ke ua khumamela molimo osele, hobane Morena, eo lebitso la hae e leng Sebouleli, ke Molimo ea boulelang. 15U se ke ua etsa selekane le baahi ba naha eo, esere ha ba rapela melimo ea bona ea bohata, 'me ba e etsetsa mahlabelo, ba u mema, eaba u ja se hlabetsoeng melimo ea bona. 16U se ke ua nyalisa bara ba hao barali ba bona, esere ba ba khelosa, 'me ba hloka botšepehi ho 'na, ba rapela melimo ea bohata ea baahi ba moo.
17“U se ke ua iketsetsa melimo e bōpiloeng.
18“U bōlōke mokete oa bohobe bo sa lomosoang. Ka matsatsi a supileng u tla ja bohobe bo sa lomosoang, joalokaha ke u laetse, ka nako e beiloeng, ka khoeli ea 'Mesa, hobane u tsoile Egepeta ka khoeli eo ea 'Mesa.
19“Matsibolo 'ohle ke a ka; le liphoofolo tsa hao tsohle tse tona, tseo e leng matsibolo a likhomo kapa a linku. 20U tla lopolla letsibolo la tonki ka konyana; ha u sa le lopolle, u le sothe molala. Bara ba hao bohle ba matsibolo u tla ba lopolla.
“Batho ba se ke ba hlaha kapele ho 'na ba itsōlōkile.
21“U ka sebetsa ka matsatsi a tšeletseng, empa ka letsatsi la bosupa u phomole; u phomole ha ho lengoa le ha ho kotuloa.
22“U etse le mokete oa libeke, oa lilopotsiea tsa ha ho heloa koro; le mokete oa tsohle tse bōkeletsoeng ha ngoaha o roba.
23“Hararo ka selemo, bohle ba lōna ba batona ba tla hlaha kapele ho Morena Morena Molimo oa Iseraele. 24Ke tla falatsa lichaba tse tseleng ea lōna, ke atise naha ea lōna, 'me ha ho ea tla hōnōhela naha ea lōna, ha le il'o hlaha kapele ho Morena Molimo oa lōna, hararo ka selemo.
25“U se ke ua 'nyehella ka mali a sehlabelo sa ka le bohobe bo lomositoeng, 'me sehlabelo sa mokete oa Paseka se se ke sa sieloa la hosasane.
26“Lilopotsiea tse ntle-ntle tsa masimo a hao u li ise tlung ea Morena, Molimo oa hao.
“U se ke ua pheha potsanyane ka lebese la 'm'a eona.”
27Morena a re ho Moshe: “Ingolle mantsoe ana, hobane ke ka mantsoe ana ke etsang selekane sa ka le uena, le Iseraele.”
28Moshe a hlola moo le Morena ka matsatsi a mashome a mane, le ka masiu a mashome a mane, a sa je, a sa noe. Morena a ngola mantsoe a selekane matlapeng, e leng melao e leshome.
Moshe o theoha thabeng ea Sinai
29Moshe a theoha thabeng ea Sinai, matsohong a nkile matlapa a mabeli a ngotsoeng Molao. Ha a theoha thabeng, o ne a sa tsebe hore sefahleho sa hae sea khanya, ka baka la ho buisana le Molimo. 30Eare ha Arone le bana bohle ba Iseraele ba talima Moshe, 'me ba bona hore sefahleho sa hae sea khanya, ba tšaba ho atamela ho eena. 31Eaba Moshe oa ba bitsa; Arone le baokameli bohle ba sechaba ba khutlela ho eena, 'me Moshe a bua le bona. 32Hamorao bana bohle ba Iseraele ba atamela, 'me a ba bolella tsohle tseo Morena a li buileng ho eena, ha a le thabeng ea Sinai.
33Ha Moshe a qetile ho bua le bona, a ikhurumeta sefahleho ka lesira. 34Empa ha Moshe a kena ho ea bua le Morena, o ne a ee a tlose lesira ho fihlela a be a e-tsoa. Ha se a tsoile, o ne a ee a bolelle bana ba Iseraele seo a se laetsoeng. 35Bana ba Iseraele ba ne ba ee ba bone hore sefahleho sa Moshe sea khanya; ebe Moshe o boela a ikhurumetsa sefahleho ka lesira, ho fihlela a kena hape ho ea bua le Morena.
