PHALLO 22

₁“Ha motho a utsoa khomo kapa nku, 'me a e hlaba, kapa a e rekisa, o tla lefa khomo eo ka likhomo tse hlano, 'me a lefe nku eo ka linku tse 'ne.

₂“Haeba lesholu le fumanoa le thua, 'me le otloa, le bolaoa, ea le bolaileng a ke ke a ba le molato oa ho tšolla mali. ₃Haeba a ka le bolaea motšeare, o tla fumanoa a le molato oa ho tšolla mali.

“Lesholu le tla lefisoa. Haeba lesholu le se na letho, le tla rekisoa ho lefella bosholu ba lona.

₄“Ha phoofolo e utsoitsoeng e fumanoa matsohong a lesholu e ntse e phela, e ka ba khomo, kapa tonki, kapa nku, le tla e lefa habeli.

₅“Ha motho a fulisa liphoofolo tšimong, kapa serapeng sa morara, 'me a tlohella likhomo tsa hae ho fula tšimong ea e mong, o tla lefa ka tse ntle tse tsoang tšimong ea hae, le ka tse ntle tse tsoang serapeng se hae sa morara.

₆“Ha hlaha e e-cha, 'me e fihla meutloeng kapa qubung ea mangata, kapa korong e e-s'o heloe, ruri ea chesitseng hlaha o tla lefa tšenyo eo.

₇“Ha motho a nea e mong chelete, kapa liphahlo hore a li bōlōke, 'me tsena li utsuoa ka tlung ea motho eo; haeba lesholu le fumanoa, le tla lefisoa habeli. ₈Haeba lesholu le sa fumanoe, mong'a ntlo o tla isoa moo ho rapeloang Molimo teng, ho hlapanya hore ha aa ka a isa letsoho linthong tsena tsa motho e mong. ₉Tabeng e 'ngoe le e 'ngoe ea tlōlo ea molao, e amanang le khomo, kapa tonki, kapa nku, kapa liaparo, kapa eng le eng e lahlehileng eo ho thoeng: ‘Ke eona ena,’ taba ea bao ba babeli e tla tlisoa moo ho rapeloang Molimo teng. Eo Molimo a mo fumanang a le molato, o tla lefela mong'a ntho habeli.

₁₀“Ha motho a siela motho e mong tonki, kapa pholo, kapa nku, kapa phoofolo efe kapa efe, 'me eba ea shoa, kapa ea robeha, kapa e utsuoa ho se ea bonang; ₁₁batho bao ba babeli ba tla hlapantšoa pel'a Molimo, ho fumana hore na ha aa ka a isa letsoho linthong tsa e mong. Mong'a ntho o tla amohela tlhapantšo eo, 'me a ke ke a buseletsoa letho. ₁₂Haeba phoofolo ena e hlile e utsoitsoe ho eena, o tla buseletsa mong'a eona. ₁₃Haeba ruri e harotsoe, o tla e hlahisa e le bopaki, 'me a ke ke a lefisoa se harotsoeng.

₁₄“Ha motho a alimile phoofolo ho e mong, eba phoofolo eo e hlaha kotsi, kapa ea shoa, mong'a eona a le sieo, ruri motho eo o tla e lefa. ₁₅Ha hona ho etsahala mong'a eona a le teng, eo a ke ke a e lefa. Empa haeba e ne hiriloe, e tla lefelloa ka chelete ea khiro ea eona.”

₁₆“Ha monna a robala le moroetsana ea sa qeloang, 'me a mo senya, o tla mo ntšetsa bohali hore e be mosali oa hae. ₁₇Empa haeba ntat'a moroetsana a hana ho mo nea eena, o tla mo lefa ka chelete e lekanang bohali ba baroetsana.

₁₈“Mosali ea loeang o tla bolaoa.

₁₉“Ea robalang phoofolo ruri a bolaoe.

₂₀“Ea etsetsang melimo esele mahlabelo, o lokela ho timetsoa.

₂₁“U se ke ua sotla kapa ua hatella mojaki, hobane le lōna le ne le le bajaki naheng ea Egepeta.

₂₂“Le se ke la hlekefetsa mohlolohali, kapa khutsana. ₂₃Ha le fela le mo hlekefetsa, ruri ke tla utloa sello sa hae, ha a ipiletsa ho 'na. ₂₄Khalefo ea ka e tla tuka, 'me ke tla le bolaea ka sabole; basali ba lōna ba tla fetoha bahlolohali, 'me bana ba lōna ba fetohe likhutsana.

₂₅“Ha u alima mofutsana e mong oa sechaba sa ka chelete, u se be joaloka baalimani ba chelete, ua batla tsoala ea eona. ₂₆Ha u nka seaparo sa e mong u se bea paneng, u tle u se busetse ho eena letsatsi le e-s'o likele, ₂₇hobane ke sona seaparo sa hae feela, ke sona se mo futhumatsang. A ka robala ka'ng? Ha a ka ipiletsa ho 'na ke tla mo utloa, hobane ke mohau.

₂₈“U se ke ua nyefola Molimo, 'me u se ke ua rohaka 'musi oa sechaba sa heno.

₂₉“U se ke ua lieha ho 'ntšetsa karolo ea tseo u li kotutseng, le tseo u li ritetseng ka morara.

“U tle u nkhethele bana ba hao ba matsibolo. ₃₀U tla etsa joalo le ka likhomo tsa hao, le ka linku tsa hao; matsibolo a tla nyanya ka matsatsi a supileng, 'me ka letsatsi la borobeli u tla nkhethela 'ona.

₃₁“Le tla ba batho ba halalelang ho 'na. Le se ke la ja nama ea phoofolo eo le fumanang e harotsoe naheng, le mpe le e akhelle lintja.”