PHALLO 12

₁Morena a bua ho Moshe le ho Arone, ba le naheng ea Egepeta, a re: ₂“Ho lōna khoeli ena e tla ba khoeli ea pele ho likhoeli; e tla ba khoeli ea pele ea selemo. ₃Bolellang sechaba sohle sa Iseraele, le re: ‘Ka letsatsi la leshome la khoeli ena, e mong le e mong a inkele konyana, ho ea ka malapa a bo-ntat'a bona, lelapa ka leng le be le konyana. ₄Haeba lelapa le le lenyenyane haholo, hoo le ke keng la lekana ho ja konyana, le e kopanele le lelapa le bapileng le lona, e arolelanoe ho ea ka palo ea batho ba tla e ja. ₅E be konyana e tona, e se nang sepha, e nang le selemo. Le khethe konyana kapa potsanyane. ₆Le tla e bōlōka ho fihlela letsatsi la leshome le metso e mene la khoeli ena, e nt'o hlajoa ka shoalane, moo sechaba sohle se leng teng. ₇Batho ba nke mali a eona, 'me ka 'ona ba tlotse likosene tse peli tse mahlakoreng, le kosene e kaholimo ho monyako, matlung 'ohle ao ba tla e jella ho 'ona. ₈Ba je nama eo hona bosiung bona boo, e besitsoe, ba e jelelle le bohobe bo sa lomosoang, le ka moroho o babang. ₉Le se ke la e ja e le tala, kapa e phehiloe ka metsi, empa kaofela ha eona e besoe mollong, 'moho le hlooho ea eona, le litlhakoana tsa eona, le likahare tsa eona. ₁₀Ho se be letho leo le ka le sielang ho le ja ka la hosasane; ho ka salang ho chesoe mollong. ₁₁Le tle le e je tjena: le itlamile matheka, le roetse meqathatso, le tšoere melamu ea lōna; le e je le potlakile. Ke eona Paseka ea Morena.

₁₂“ ‘Ka bona bosiu boo ke tla tsamaea naheng eohle ea Egepeta, ke bolaee matsibolo 'ohle a naha ea Egepeta, a batho le a liphoofolo, 'me ke tla ahlola melimo eohle ea Egepeta. Ke 'na Morena. ₁₃Mali ana e tla ba letšoao la lōna, matlung ao le leng ho 'ona; etlare ha ke bona mali ke fete, 'me ha ho seoa se tla le oela holimo ho le timetsa, ha ke otla naha ea Egepeta. ₁₄Letsatsi lena e tla ba la khopotso ho lōna, 'me le tla le tlotlisa ka ho etsetsa Morena mokete. Melōko eohle ea lōna e tla le bōlōka e le taelo ea mehla eohle.’ ”

₁₅“ ‘Ka matsatsi a supileng le tla ja bohobe bo sa lomosoang. Ka letsatsi la pele le tla tlosa litomoso matlung a lōna, hobane motho ea tla ja bohobe bo lomositsoeng, ka matsatsi ana a supileng, o tla khaoloa sechabeng sa Iseraele. ₁₆Ka letsatsi la pele ho tla ba le phutheho e halalelang, le ka letsatsi la bosupa e tla ba teng; ho se be mosebetsi oo le tla o etsa ka matsatsi ao, haese feela ho lokisa ho ka jeoang; hoo ke hona feela hoo le ka ho etsang.

₁₇“ ‘Le tla 'ne le etse mokete oa bohobe bo sa lomosoang, hobane ke ka letsatsi lena ke ntšitseng mabōtho a lōna naheng ea Egepeta; kahoo lōna le melōko eohle ea lōna le tla bōlōka letsatsi lena e le taelo ea mehla eohle. ₁₈Ka khoeli ea pele, ka letsatsi la leshome le metso e mene la khoeli, ka shoalane, le tla ja bohobe bo sa lomosoang ho fihlela ka shoalane ea letsatsi la mashome a mabeli a motso o mong la khoeli. ₁₉Ka matsatsi a supileng ho se be litomoso tse tla fumanoa matlung a lōna, hobane motho ea tla ja se lomositsoeng o tla khaoloa sechabeng sa Iseraele; e ka ba mojaki, kapa letsoalloa la naha ea lōna. ₂₀Le se ke la ja letho le lomositsoeng; liahelong tsa lōna tsohle le tla ja bohobe bo sa lomosoang!’ ”

₂₁Eaba Moshe o bitsa baholo bohle ba Iseraele, o re ho bona: “Tsamaeang le e'o nkela malapa a lōna likonyana, 'me le li hlabele mokete oa Paseka. ₂₂Le nke le mahlaku a hisopa, le a ine maling a ka sekotlolong, le tlotse kosene e kaholimo ho monyako, le tse peli tse ka mahlakoreng, ka mali a tsoang ka sekotlolong. Ho se be motho ea tla tsoa ka tlung ea hae ho fihlela hosasane. ₂₃Morena o tla tsamaea har'a Egepeta, a bolaee Baegepeta, empa ha a bona mali koseneng e kaholimo, le ho tse peli tse ka mahlakoreng, Morena o tla feta monyako, a se lumelle Motimetsi hore a kene ka matlung a lōna, ho le bolaea.

₂₄“Le tla bōlōka taelo ena, e be molao ho lōna le ho bana ba lōna kamehla eohle. ₂₅Etlare ha le fihla naheng eo Morena a tla le nea eona, joalokaha a boletse, le bōlōke tšebeletso ena. ₂₆E tle ere ha bana ba lōna ba le botsa, ba re: ‘Tšebeletso ee e bolela'ng?’ ₂₇le tle le re: ‘Ke sehlabelo sa Paseka ea Morena, ea ileng a feta matlo a bana ba Iseraele, ha ba ne ba le Egepeta, mohla a neng a otla Egepeta, 'me a sireletsa malapa a rōna.’ ” Sechaba sa itihela fatše, sa rapela.

₂₈Eaba bana ba Iseraele baa ea, ba etsa kamoo Molimo a ileng a laela Moshe le Arone kateng.

₂₉Joale ka seroko, Morena a bolaea matsibolo 'ohle a naha ea Egepeta; ho qala ka letsibolo la Faro, lona le tla lula teroneng ea hae, ho isa ho letsibolo la motšoaruoa ea koaletsoeng chankaneng, le matsibolo 'ohle a liphoofolo. ₃₀Eaba Faro o tsoha bosiu, eena le bahlanka ba hae, le Baegepeta bohle, 'me ha e-ba le seboko sa phohomela Egepeta, hobane ho ne ho se lelapa le se nang ea shoeleng.

₃₁Faro a bitsa Moshe le Arone, har'a bosiu, 'me a re: “Tsamaeang, le tsoe har'a sechaba sa ka, lōna ba babeli hammoho le bana ba Iseraele, le tsamaee, le e'o sebeletsa Morena ho ea kamoo le boletseng kateng! ₃₂Le nke mehlape ea lōna ea linku, le mehlape ea lōna ea likhomo, joalokaha le ile la bolela; le tsamaee, 'me le 'na le ntlhohonolofatse!”

₃₃Baegepeta ba sututsa sechaba sa Iseraele ka matla, ho se potlakisa hore se tsoe naheng ea bona, hobane ba ne ba re: “Kaofela ha rōna re lekhatheng la ho shoa!” ₃₄Baiseraele ba nka hlama ea bona e e-s'o lomosoe, le lijana tsa bona tse lubelang, ba li phutha ka liaparo tsa bona, ba li jara mahetleng a bona. ₃₅Bana ba Iseraele ba etsa ho ea kamoo Moshe a neng a ba laetse kateng, ba kōpa Baegepeta hore ba ba fe lintho tse entsoeng ka silefera, le tse entsoeng ka khauta, le liaparo. ₃₆Morena a etsa hore Baegepeta ba hlomphe sechaba sa Iseraele, 'me ba se nea seo se se kōpang. Ba siea Baegepeta ba se na letho.

₃₇Bana ba Iseraele ba tsamaea ho tloha Ramesese ho ea fihla Sukote, e le banna ba litaaso ba likete tse makholo a tšeletseng, ho sa baloe bana. ₃₈Letšoelehali la merabe-rabe la ea le bona, le mehlape e mengata haholo ea linku, le ea likhomo. ₃₉Hlama eo ba tlileng le eona Egepeta ba e pheha, ba etsa likuku tse sa lomosoang, hobane e ne e sa ka ea lomosoa. Kaha ba ne ba tsoile Egepeta ka ntšoe-li-sa-fǒhloa, 'me ba ne ba ke ke ba lieha, ba sitoa le ho iphehela mofao.

₄₀Nako eo bana ba Iseraele ba ileng ba aha Egepeta ka eona e bile lilemo tse makholo a mane le mashome a mararo. ₄₁Kamora' lilemo tse makholo a mane le mashome a mararo, ka lona letsatsi leo, mabōtho 'ohle a Morena a tsoa naheng ea Egepeta. ₄₂Ea e-ba bosiu ba ho lebella Morena ha a ne a tla ba ntša naheng ea Egepeta; kahoo bosiu bona boo e tla ba bosiu ba ho lebella Morena sechabeng sohle sa Iseraele, le melōkong eohle ea sona.

₄₃Morena a re ho Moshe le ho Arone: “Litaelo tsa Paseka ke tsena:

“Ho se be molichaba ea tla e ja. ₄₄Empa lekhoba le rekiloeng ka chelete le ka e ja, ha feela le bōlōlitsoe. ₄₅Molichaba le mohlanka ea hiriloeng ba ke ke ba e ja.

₄₆“E tla jeloa ka tlung e le 'ngoe, nama ea eona le se ke la e ntšetsa kantle ho ntlo, 'me le se ke la roba masapo a eona. ₄₇Sechaba sohle sa Iseraele se tla etsa mokete ona.

₄₈“Ha le ahisane le molichaba, 'me a rata ho etsetsa Morena Paseka, eka khona ba batona bohle ba lelapa la hae ba bōlotsoe, e be hona ba ka tlang ho keteka le lōna, 'me ba tla tšoana le matsoalloa a naha eo. Empa maqai a ke ke a e ja. ₄₉Molao o tla ba mong ho letsoalloa la naha le ho molichaba ea jakileng har'a lōna.”

₅₀Bana bohle ba Iseraele ba etsa joalokaha Morena a ne a laetse Moshe le Arone. ₅₁Ka lona letsatsi leo Morena a ntša bana ba Iseraele naheng ea Egepeta ka mabōtho a bona.