PHALLO 11

₁Joale Morena a re ho Moshe: “Ke sa tla tlisa seoa se seng hape holim'a Faro le holim'a Egepeta; kamorao ho moo o tla le lokolla, le tsamaee. Ha a le lokolla, o tla hle a le leleke ho hang. ₂Joale bua moo batho ba utloang, hore monna e mong le e mong, le mosali e mong le e mong a kōpe ho ea ahelaneng le eena lintho tse entsoeng ka silefera, le tse entsoeng ka khauta.” ₃Morena a etsa hore Baegepeta ba hlomphe Baiseraele. Le eena Moshe ea e-ba motho e moholo naheng ea Egepeta, le mahlong a bahlanka ba Faro, le mahlong a sechaba.

₄Moshe a re ho Faro: “Morena o re: ka seroko, ke tla tsamaea har'a Egepeta eohle. ₅Matsibolo 'ohle a naheng ea Egepeta a tla shoa; ho qala ka letsibolo la Faro, lona le tla lula teroneng ea hae, ho isa ho letsibolo la lekhabunyane le khumameng kamora' leloala, le matsibolo 'ohle a liphoofolo. ₆Ho tla ba le sello sa phohomela naheng eohle ea Egepeta, seo ho e-s'ong ho be se kang sona, 'me se ke keng sa hlola se e-ba teng. ₇Empa har'a bana ba Iseraele bohle, ha ho le ntja e tla ke e rorele motho kapa phoofolo, e le hore le tle le tsebe hore Morena o khetholla Baegepeta ho Baiseraele. ₈Bahlanka bana ba hao bohle, ba tla tla ho 'na, 'me ba nkhumamele, ba re: ‘Tsamaea, uena le batho bohle ba u setseng morao,’ 'me kamorao ho moo le 'na ke tla tsamaea.” Moshe a tloha ho Faro, khalefo ea Faro e tlōkōma.

₉Joale Morena a re ho Moshe: “Faro ha a ka ke a u mamela, e le hore mehlolo ea ka e tle e ate naheng ea Egepeta.” ₁₀Moshe le Arone ba etsa mehlolo ena eohle moo Faro a bonang, empa Morena a 'na a thatafatsa pelo ea Faro, a se ke a lokolla bana ba Iseraele hore ba tsoe naheng ea hae.