Bajuda ba timetsa lira tsa bona
1Ka letsatsi la leshome le metso e meraro la khoeli ea leshome le metso e 'meli, e leng khoeli ea Hlakubele, taelo le molao oa khosi o ne o lokela ho phethahatsoa. Ka letsatsi lena, lira tsa Bajuda li ne li tšepile hore li tla ba hlōla, empa litaba tsa fetoha, ea e-ba Bajuda ba hlōlang lira tsa bona. 2Bajuda ba khobokanela metseng ea bona, linaheng tsohle tse busoang ke khosi Ahashuerushe, hore ba futuhele ba neng ba rerile ho ba timetsa. Ha ho motho ea kileng a ba ema kapele, hobane lichaba tsohle li ne li ba tšaba. 3Mahosana 'ohle a linaha, le baokameli ba mabōtho, le babusisi, le bahlanka ba khosi, ba ne ba thusa Bajuda, hobane ba ne ba tšaba Moredekai. 4Moredekai o ne a le moholo lapeng la khosi, 'me botumo ba hae ba phatlalla le linaha tsohle, hobane Moredekai enoa o ne a ntse a matlafala le ho feta.
5Bajuda ba bolaea lira tsohle tsa bona ka sabole, ba li rinya, ba li timetsa, 'me ba iketsetsa borata ka ba neng ba hloile Bajuda. 6Motseng oa khosi, oa Shushane, Bajuda ba bolaea batho ba makholo a mahlano. 7Ba bolaea Parashanedata, le Dalefone, e Asapata, 8le Porata, le Adaleea, le Aridata, 9le Paramasheta, le Arisai, le Aridai, le Fajesata, 10e leng bara ba leshome ba Hamane, mora oa Hamedata, sera sa Bajuda, empa ba se ke ba hapa thepa ea babolauoa bohle.
11Ka lona letsatsi leo, khosi ea tlisetsoa palo ea batho ba bolailoeng motseng oa khosi oa Shushane.
12Joale khosi ea re ho mofumahali Esetere: “Bajuda ba bolaile banna ba Shushane ba makholo a mahlano, le bara ba leshome ba Hamane. Linaheng tse ling tsa khosi teng ba entse'ng? Thapeli ea hao ke efe? E tla ananeloa. Kōpo ea hao ke efe hape? E tla phethathatsoa.”
13Eaba Esetere o re: “Haeba e le ntho e ka khahlang khosi, a ho ke ho lumelloe Bajuda ba Shusane, hore hosasane le bona ba etse seo taelo ena ea kajeno e se bolelang, le hore bara ba Hamane ba leshome ba fanyehoe sefateng seo ho fanyehoang batho ho sona.”
14Eaba khosi e laela hore ho etsoe joalo. Ha ntšoa taelo Shushane, 'me bara ba Hamane ba leshome ba fanyehoa. 15Ka letsatsi la leshome le metso e mene la khoeli ea Hlakubele, Bajuda ba Shushane ba khōbōkana, 'me ba bolaela batho ba makholo a mararo hona moo Shushane, empa ba se ke ba hapa thepa ea bona.
16Bajuda ba bang ba linaheng tsa khosi, ba khōbōkana, ba itšireletsa, ba phomola lireng tsa bona. Ba bolaea lira tsa bona tse likete tse mashome a supileng a metso e mehlano, empa ba se ke ba hapa thepa ea tsona. 17Tsena li etsahetse ka letsatsi la leshome le metso e meraro la eona khoeli eo, 'me ka letsatsi la leshome le metso e mene ba phomola, ea e-ba letsatsi la mokete le la thabo.
Mokete oa Purime
18Ka letsatsi la leshome le metso e meraro, le la leshome le metso e mene, la eona khoeli eo, Bajuda ba Shushane ba khōbōkana. Ka letsatsi la leshome le metso e mehlano la eona khoeli eo, ba phomola, ea e-ba letsatsi la mokete le la thabo.
19Kahoo Bajuda ba ahileng metsaneng e ka mathoko ba etsa hore letsatsi la leshome le metso e mene la khoeli ea Hlakubele, e be letsatsi la thabo le la mokete, letsatsi le monate, la ho abelana limpho.
20Moredekai a ngola mangolo ao ho 'ona a ngotseng lintho tsena, 'me a a rōmela ho Bajuda bohle ba linaheng tsohle tse haufi le tse hōle, tse busoang ke khosi Ahashuerushe, 21hore ka selemo le selemo ba hopole letsatsi la leshome le metso e mene, le la leshome le metso e mehlano, la khoeli ea Hlakubele; 22ba hopole matsatsi ao e le matsatsi ao Bajuda ba ileng ba phomola ho lira tsa bona ka 'ona. Ba hopole khoeli eo e le khoeli eo ka eona mahlomola a Bajuda a ileng a fetoha thabo, le lillo tsa bona li ileng tsa fetoha mokete oa thabo. Matsatsi ao ba a hopole e le matsatsi a mokete le a thabo. Ka matsatsi ao ba abelane limpho, ba be ba li abele le mafutsana.
23Bajuda ba itlama ho 'na ba etsa joalokaha ba ne ba se ba qalile, le kamoo Moredekai a ba ngoletseng kateng.
24Hamane, mora oa Hamedata oa Moakake, e ne e le sera sa Bajuda bohle. O ne a rerile ho ba timetsa, a laotse ka Pure, e leng lōtho, hore na o tla ba ripitla, a ba timetse neng. 25Empa eitse ha Esetere a fihla kapele ho khosi, eaba khosi e laela ka mangolo hore morero oa Hamane o khopo, oo a o reretseng Bajuda, o boeane le eena, le hore eena le bara ba hae ba fanyehoe sefateng seo ho fanyehoang batho ho sona. 26Ka baka lena, matsatsi ao a bitsoa hore ke a Purime, ho latela lebitso lena la Pure. Lipolelo tsa lengolo lena, le tseo ba li boneng, le tse ba hlahetseng, 27tsena tsa etsa hore Bajuda ba itlame, bona le bana ba bona, le bohle ba tla ipitsa Bajuda, hore ba tla hopola matsatsi ao a mabeli, ho latela kamoo ho ngotsoeng kateng, le ho latela nako e beiloeng ka selemo le selemo. 28Ba itlama hape hore matsatsi ana a Purime a tla hopoloa ke melōko eohle, le ke malapa 'ohle, linaheng tsohle, le metseng eohle, le hore a ke ke a lebaloa ke Bajuda le ke litlōhōlō tsa bona.
29Joale mofumahali Esetere, morali oa Abihaele, le Moredekai oa Mojuda, ka matla 'ohle ao ba a neiloeng, ba ngola lengolo lena la bobeli la Purime, ba le tiisa. 30Moredekai a rōmela mangolo ana ho Bajuda bohle ba linaheng tse lekholo le mashome a mabeli a metso e supileng, tse busoang ke Ahashuerushe; a a felehetsa ka mantsoe a khotso le a 'nete. 31Hona e ne e le ho tiisa matsatsi ana a Purime, ho ea kamoo Moredekai oa Mojuda le mofumahali Esetere ba neng ba laetse kateng, le kamoo Bajuda ba neng ba itlamme kateng, ba ba ba tlama le litlōhōlō tsa bona tabeng ea ho itima lijo, le tabeng ea sello sa bona.
32Taelo ea Esetere ea tiisa litaba tsena tsa Purime, 'me ea ngoloa bukeng.
