Bajuda ba laeloa hore ba iphetetse
1Ka lona letsatsi leo, khosi Ahashuerushe a nea mofumahali Esetere lintho tsohle tsa Hamane, sera sa Bajuda. Moredekai a fihla a ema kapele ho khosi, hobane Esetere o ne a ile a e bolella hore na o amana joang le eena. 2Khosi ea nka lesale la eona la monoana, leo e ileng ea le rōlisa Hamane, ea le roesa Moredekai. Eaba Esetere o bea Moredekai hore e be mookameli oa lintho tsohle tsa Hamane.
3Esetere a boela a bua le khosi, a itihela maotong a eona, a ipiletsa ho eona ka likhapha, hore e felise bobe bo reriloeng ke Hamane oa Moakake, le morero oa hae oo a neng a o reretse Bajuda. 4Eaba khosi e supa Esetere ka lere la eona la khauta. Esetere a atamela, a ema kapele ho khosi, 5'me a re: “Haeba e le ntho e ka khahlang khosi, 'me eba khosi e nkhauhetse, le ntho ena e bonahala e le molemo ho khosi, 'me eba le 'na ke khahla khosi, a ho ke ho ngoloe mangolo a hlakolang seo Hamane, mora oa Hamedata oa Moakake, a ileng a se ngola hore ho timetsoe Bajuda ba linaheng tsohle tsa khosi. 6Nka tiisetsa joang ho bona bobe bo tla etsoa ho sechaba sa heso? Kapa nka tiisetsa joang ho bona bang ka 'na ba timetsoa?”
7Eaba khosi Ahashuerushe o re ho mofumahali Esetere le ho Moredekai oa Mojuda: “Bonang mona, ke neile Esetere lintho tsohle tsa Hamane, 'me Hamane eena ba se ba mo fanyehile sefateng seo ho fanyehoang batho ho sona, hobane o ne a rerile ho timetsa Bajuda. 8Le lōna le ngolle Bajuda kamoo le ratang kateng, le ngole lengolo lena lebitsong la khosi, le be le le tiise ka lesale la khosi la tiiso, hobane lengolo leo le tla ngoloa lebitsong la khosi, 'me le tiisoe ka tiiso ea lesale la khosi la monoana, le ke ke la fetoloa ke motho.”
9Ka letsatsi la mashome a mabeli a metso e meraro la khoeli ea boraro, e leng khoeli ea Phuptjane, bangoli ba khosi ba bitsoa. Eaba ho ngoloa ho latela sohle seo Moredekai a ileng a se laela. Ha ngolloa Bajuda le baokameli ba mabōtho, le batlatsi ba bona, le babusi le mahosana a linaha, ho tloha India ho ea fihla Kushe, e leng babusi ba linaha tse lekholo le mashome a mabeli a metso e supileng. Ha ngolloa naha e 'ngoe le e 'ngoe ka mongolo oa eona le sechaba se seng le se seng ka puo ea sona, le Bajuda ba ngolloa ka mongolo oa bona le ka puo ea bona. 10Moredekai a ngola lebitsong la khosi Ahashuerushe, 'me mangolo ao a a tiisa ka tiiso ea lesale la khosi la monoana. Mangolo ana a rōmelloa ka maqosa a palameng lipere tsa khosi, tsa mali, tse lebelo.
11Mangolong ana khosi ea fana ka tumello ea hore Bajuda ba metseng eohle ba khōbōkane, 'me ba itšireletse ka ho felisa, le ho bolaea, le ho ripitla mabōtho a sechaba sefe kapa sefe, le naha efe kapa efe e ka ba futuhelang. Ba timetse masea le basali, ba ikhapele maruo a batho bao. 12Hona ho etsahale ka letsatsi le le leng, linaheng tsohle tse busoang ke khosi Ahashuerushe; letsatsi leo e be la leshome le metso e meraro la khoeli ea leshome le metso e 'meli, e leng khoeli ea Hlakubele. 13Kopi ea taelo ena eo e tla ba molao, e phatlalletsoe lichaba tsohle linaheng tsohle e le hore Bajuda ba itokisetse ho iphetetsa ho lira tsa bona ka lona letsatsi leo.
14Maqōsa a palameng lipere tsa khosi, tsa mali, tse lebelo, a palama ka potlako, a khannoa ke taelo ea khosi. Taelo ena ea phatlalatsoa le Shushane, tlung ea khosi.
15Eaba Moredekai o tloha kapele ho khosi, a apere seaparo sa bohosana se 'mala o moputsoa le o mosoeu, a roetse mofapahlooho o moholo oa khauta; a apere le seaparo se entsoeng ka lesela le lohehileng, le perese. Motse oa Shushane oa thaba, oa nyakalla. 16Bajuda ba hlaheloa ke leseli, le thabo, le nyakallo, le tlōtla. 17Naheng e 'ngoe le e 'ngoe le motseng o mong le o mong, moo taelo ea khosi le molao oa eona o ileng oa fihla teng, Bajuda ba thaba, ba nyakalla, ba keteka, ea e-ba letsatsi le monate. Baahi ba bangata ba naha eo ba ipitsa Bajuda, hobane ba ne ba tšaba Bajuda.
