Esetere o memela khosi le Hamane moketeng oa lijo
1Ka letsatsi la boraro Esetere a apara seaparo sa hae sa bofumahali, 'me a ea ema kahare ho seotloana sa ntlo ea khosi, a tobana le ntlo ea khosi. Khosi e ne e lutse teroneng ea eona, ka tlung ea bokhosi, kapele ho monyako oa ntlo. 2Ha khosi e bona Esetere a eme ka seotloaneng, ea mo hauhela, eaba e mo supa ka lere la eona la khauta, leo e neng e le tšoere. Esetere a atamela, a ama ntlha ea lere la khosi.
3Khosi ea re ho eena: “Oho, mofumahali Esetere, u batla ho etsetsoa eng? U lakatsa'ng? Seo u se lakatsang u tla se neoa, leha e ka ba halofo ea 'muso oa ka.”
4Esetere a araba, a re: “Haeba e le ntho e ka khahlang khosi, hona kajeno, khosi le Hamane ba ke ba tle moketeng oo ke o lokiselitseng khosi.”
5Eaba khosi e re: “Potlakang le bitse Hamane, re phethe seo Esetere a se boletseng!” Khosi le Hamane ba ea moketeng oo Esetere a neng a o lokisitse.
6Ha ho ntse ho nooa veine, khosi ea re ho Esetere: “Thapeli ea hao ke efe? E tla ananeloa. Kōpo ea hao ke efe? E tla phethahatsoa, leha e ka ba halofo ea 'muso oa ka.”
7Eaba Esetere oa araba, o re: “Thapeli ea ka, le kōpo ea ka, ke ena: 8Haeba khosi e nkhauhetse, 'me eba ke ntho e khahlang khosi ho phethahatsa thapeli le kōpo ea ka, khosi le Hamane ba ke ba tle moketeng oo ke tla be ke ba lokiselitse oona hosasane, 'me teng ke tla araba potso ea khosi.”
Hamane o rera ho bolaea Moredekai
9Ka tsatsi leo Hamane a tsamaea a thabile, a nyakaletse. Empa eitse ha Hamane a bona Moredekai monyakong oa ntlo ea khosi, 'me a lemoha hore Moredekai ha a eme, ha a mo tšohe, a mo halefela haholo. 10Leha ho le joalo Hamane a itšoara, a ba a ea fihla ha hae, a bitsa metsoalle ea hae, le Sereshe mosali oa hae. 11Hamane a ba phetela tsa bongata ba maruo a hae, le kamoo bara ba hae ba leng bangata kateng, le mesebetsi eohle eo khosi e mo phahamiselitseng ho eona, le kamoo e 'meileng ho okamela mahosana le bahlanka ba khosi kateng. 12Eaba Hamane o re: “Mofumahali Esetere le eena ha aa ka a lumella motho ho tla le khosi moketeng oo a neng a o lokisitse, haese 'na feela. Le hosasane 'na, hammoho le khosi, ke sa memetsoe moketeng oa hae. 13Empa tsena tsohle ha li nthuse ka letho, ha feela ke ntse ke bona Moredekai oa Mojuda a lutse monyakong oa ntlo ea khosi.”
14Bo-Sereshe, mosali oa hae, le metsoalle eohle ea hae, ba re ho eena: “A re hlomeng sefate seo ho fanyehoang batho ho sona, se bophahamo ba limethara tse mashome a mabeli a metso e 'meli, 'me hosasane u bue le khosi hore Moredekai a fanyehoe ho sona, ebe joale u ea moketeng le khosi, ho ea ithabisa.” Taba ena ea khahla Hamane, a ba a re ho hlongoe sefate seo ho fanyehoang batho ho sona.
