Ho tsoa lefung, ho kena bophelong
1Le ne le shoele ka baka la litšito le libe tsa lōna, 2tseo le neng le phela ho tsona pele, ho ea ka mokhoa oa lefatše lena, ho ea ka 'musi ea renang sebakeng, e leng moea o sebetsang joale bathong ba sa mameleng. 3Pele, le rōna bohle, re ne re balelloa har'a bona, re latela litakatso tsa rōna tsa botho, re phetha thato ea tsona le ea maikutlo a rōna. Ho ea ka tlhaho, re ne re le batho ba lokeloang ke khalefo ea Molimo, joaloka ba bang bohle. 4Empa, erekaha Molimo a le mohau haholo, ka baka la lerato leo a re ratang ka lona, 5o re tsositse bafung le Kreste, ha re ne re shoele ka baka la litšito tsa rōna. Hopolang hè, hore ke ka mohau oa hae le pholositsoeng. 6Molimo o re tsositse le Kreste, a re bea 'moho le eena maholimong. 7Hona o ho entse hore mehleng e tlang a tle a bonahatse mohau oa hae o moholo ka ho fetisisa, ka mosa oo a re etselitseng oona ho Kreste Jesu, 8hobane ke ka mohau le pholositsoeng ka ho lumela. Hona hase ho tsoang ho lōna, ke mpho ea Molimo; 9hase ho tsoang mesebetsing ea lōna, esere e mong oa lōna a ithorisa. 10Re libōpuoa tsa Molimo, ka Kreste Jesu o re bōpetse ho etsa mesebetsi e metle, eo a neng a e lokise e sa le pele hore re tle re e etse.
Sechaba se le seng ho Kreste
11Hopolang hore pele le ne le le balichaba ka tsoalo, lōna ba bitsoang maqai ke Bajuda, bona ba ipitsang ba bōlōtseng, ka baka la lebōllo le entsoeng nameng ke batho. 12Ka nako eo le ne le se na Kreste, le se monamane oa sechaba sa Iseraele ho hang, le se na kabelo lilekaneng le litšepisong, le se na tšepo, le se na Molimo lefatšeng lena. 13Empa joale, kaha le le ho Kreste Jesu, lōna bao pele le neng le le hōle, le atamelitsoe ka mali a Kreste.
14Ke eena khotso ea rōna, ea entseng Bajuda le balichaba sechaba se le seng, eo ka 'mele oa hae a helelitseng lerako la bōra le lipakeng tsa bona. 15O felisitse melaoana le litaelo tsa Molao oa Moshe. O bōpile khotso ka ho kopanya Mojuda le molichaba, a ba etsa motho e mocha ho eena. 16E ne e le hore a tle a ba boelanye le Molimo, ba babeli a ba etse 'mele o le mong ka sefapano, a felise bōra ka sona. 17O tlile ho bolela molaetsa o molemo oa khotso ho lōna ba leng hōle, le ho ba leng haufi. 18Ke ka eena, rōna bohle, Bajuda le balichaba, re nang le tokelo ea ho atamela ho Ntate ka Moea o le mong.
19Ha ho le joalo, ha le sa le melata kapa bajaki, empa le se le le baahi ba sebele hammoho le bahalaleli, 'me le ba lelapa la Molimo. 20Le hahiloe holim'a mothèo oo e leng baapostola le baporofeta, oo Kreste Jesu ka sebele e leng lejoe la mantlha la oona. 21Ke ho eena mohaho oohle o kopantsoeng hammoho, 'me o hōlang, o fetohang tempele e halalelang ea Morena. 22Ho eena le lōna le haheletsoe hammoho le ba bang, hore le be leaho la Molimo la Moea.
