Tumeliso
1'Na Paulosi, moapostola oa Kreste Jesu ka thato ea Molimo, ke lumelisa balumeli ba leng Efese, ba tšepahalang ho Kreste Jesu, ke re: 2Mohau le khotso ea Molimo Ntat'a rōna, le ea Morena Jesu Kreste, li ke li be le lōna.
Mahlohonolo a moea a fumanoang ho Kreste
3Ho ke ho bokoe Molimo, Ntat'a Morena oa rōna Jesu Kreste, ea re hlohonolofalitseng ka Kreste ka mahlohonolo 'ohle a moea, a tsoang maholimong. 4Molimo o ikhethetse rōna ka Kreste lefatše le e-s'o theoe, hore re halalele, re hloke sekoli pel'a hae, re be le lerato. 5A rera e sa le pele hore, ka Jesu Kreste, re be bana ba hae, ho ea ka ho rata ha hae le ka ho khahloa ha hae, 6e le hore re rorise mohau o tlōtlehang oa hae, oo a re hauhetseng ka oona, ka Mora oa hae ea ratoang. 7Ke ka eena, ka mali a hae, re lopolotsoeng, ra tšoareloa libe, ka baka la boholo ba mohau oa hae. 8Molimo o re atiselitse mohau oo haholo, ka ho re fa bohlale le kutloisiso eohle. 9O re tsebisitse sephiri sa thato ea hae, e leng morero o mo khahlileng e sa le pele. 10Morero oo Molimo a tla o phatlalatsa, ha nako e beiloeng e fihlile, ke oa ho kopanya tsohle tse maholimong le lefatšeng tlas'a Kreste.
11Ka eena re abetsoe lefa. Ho ea ka morero oa ea sebetsang tsohle ka thato ea hae, re khethiloe e sa le pele, 12e le hore ka rōna, bao re bileng ba pele ho tšepa Kreste, ho tle ho bonahatsoe tlōtla ea Molimo. 13Ke ka Kreste le lōna le utloileng lentsoe la 'nete, molaetsa o molemo o le pholosang. Ke eena eo le bileng la lumela ho eena, la ba la tšoauoa ka letšoao la Moea o Halalelang, oo le neng le o tšepisitsoe. 14Moea oo re o filoe e le ho tiisa hore re tla ja lefa, 'me ke tšepiso ea ho lopolloa ha bao e leng leruo la Molimo, ho tle ho bonahatsoe tlōtla ea hae.
Paulosi o rapella Baefese
15Ka baka leo le 'na, ha ke se ke utloile tsa tumelo ea lōna ho Morena Jesu, le lerato leo le ratang balumeli bohle ka lona, 16ha ke phetse ho leboha Molimo ka baka la lōna ha ke le rapella. 17Ke kōpa Molimo oa Morena oa rōna Jesu Kreste, Ntate ea tlōtlehang, hore a ke a le fe moea oa bohlale o le senolelang eena, le tle le mo tsebe. 18Molimo a ke a elise mahlo a lōna a moea, le tle le tsebe seo pitso ea hae e le tšepisang sona, seo boholo ba tlōtla bo leng sona, e leng tlōtla eo le tla e ja lefa 'moho le bahalaleli, 19le seo boholo bo fetisisang ba matla a hae bo leng sona ho rōna ba lumelang. Ka 'ona matla ao a hae a maholo, 20o sebelitse ho Kreste, ha a mo tsosa bafung, 'me a 'mea ka letsohong la hae le letona, maholimong, 21hore a tle a be kaholimo ho puso eohle, bookameli bohle, matla 'ohle, le borena bohle ba meea e busang: kaholimo ho mang kapa mang, mehleng ena kapa mehleng e tlang. 22Molimo o bile o beile tsohle katlas'a maoto a hae, 'me ka ho 'mea holim'a tsohle, o mo entse hlooho ea kereke, 23eo e leng 'mele oa hae, o phelisoang ke eena ka ho tlala, eena ea phelisoang ke Molimo ka ho tlala.
