Se potlakele ho etsa litšepiso
1Ha u e-ea ka tlung ea Molimo, hlokomela mehato ea hao. Atamela haufi, u mamele, ho e-na le ho ea etsa nyehelo ea mahlabelo joaloka lithoto tse sa tsebeng hore li etsa sebe.
2Se potlakele ho ahlamisa molomo,
pelo ea hao e se ke ea ba lehala
ho bua ho hong kapel'a Molimo.
Molimo o leholimong,
uena u lefatšeng,
kahoo polelo tsa hao li se be kae.
3Joalokaha toro
e tsoaloa ke metouto,
polelo tsa sethoto
li tsoaloa ke ho bua haholo.
4Ha u etsetsa Molimo kano, u se ke ua lieha ho e phethahatsa, hobane Molimo ha a khahloe ke lithoto. Phethahatsa seo u ikanetseng sona. 5Ho molemo ha u ke ke ua etsa kano, ho e-na le hore u e etse, ebe ha u e phethahatse. 6Se lumelle leleme la hao ho u khannela sebeng, ebe joale u re ho morōmuoa oa Molimo: “Ke entse phoso!” Eba u etsetsa'ng hore Molimo a halefisoe ke lipolelo tsa hao, ebe o felisa mosebetsi oa matsoho a hao? 7Litoro tse ngata le lipolelo tse ngata ke mafeela, empa uena eka khona u tšabe Molimo.
Maruo ha a na thuso
8Ha u bona mofutsana a hatelloa, a amohuoa toka le litokelo tsa hae naheng ea heno, tseo li se ke tsa u makatsa, hobane mookameli o na le ea mo okametseng, 'me baokameli le bona ba na le mookameli e moholo. 9Se molemo ho sechaba sohle ke khosi e thahasellang temo.
10Ea ratang chelete
ha e k'e b'e mo lekane,
ea ratang leruo
kamehla oa le halala;
hona le hona e sa le lefeela.
11Ha leruo le ata,
bafepuoa baa ata;
ebe le thusa mong'a lona ka eng,
haese ho 'na a le boha kamehla?
12Mosebeletsi o robala boroko,
ebang oa lapa kapa oa khōra,
empa morui ea hafang ka nkatana
ha a bo hlōthe ke maruo a hae!
13Ho na le bobe bo otlang pelo, boo ke bo boneng mona lefatšeng:
Motho o bokella leruo
le tlise bosōtō,
14kapa ka bomalimabe
ebe lea senyeha,
mor'a hae
a qetelle a sa fumana lefa.
15Joalokaha motho eo
a tsoetsoe a le feela,
o tla ea lebitleng
a nts'a le feela.
Har'a tsohle
tseo a li sebelitseng,
a ke ke a nka le e 'ngoe
ka letsoho la hae.
16Hona le hona
ke bobe bo otlang pelo:
Motho o ikela a le feela
sa ha a tsoaloa;
ebe o fumane'ng
ka ho sebeletsa lelea?
17Tšiu tsa hae tsohle
o li qeta har'a lefifi,
a soabile haholo,
a kula, a halefile!
18Eaba ke bona hore ho molemo, ho bile ho lokile hore ka matsatsi a seng makae a bophelo, ao Molimo a mo neileng 'ona, motho a je, a noe, a ithabise ka tsohle tsa mosebetsi oa matsoho a hae mona lefatšeng, hobane hoo ke eona kabelo ea hae. 19Hape ke mpho ea Molimo ho motho ka mong eo Molimo a mo fileng leruo le matlotlo le matla hore a ithabise ka 'ona, 'me o lokela ho amohela kabelo eo ea hae, a ithabise ka tsa mosebetsi oa matsoho a hae. 20Motho ha a ke a nahana bokhutšoanyane ba bophelo ba hae, hobane Molimo o mo phelisa ka nyakallo.
