LIPOLELO 34

₁Moshe a tloha liphuleng tsa Moabe, a nyolohela thabeng ea Nebo, a hloella holim'a tlhoro ea Pisega, e talimaneng le Jeriko. Morena a 'montša naha eohle, ho tloha Gileade ho ea fihla Dane, ₂le naha eohle ea Nafthali, le naha eohle ea Efraime, le ea Manase, le naha eohle ea Juda, ho ea fihla leoatleng le ka bophirimela, ₃le Negebe, le phula ea khohlo ea Jeriko, e leng motse o lifate tsa lipalema, ho ea fihla Sōoare. ₄Morena a re ho eena: “Ena ke naha eo ke ileng ka e hlapanyetsa Aborahama, le Isaka, le Jakobo, ka re: ‘Ke tla e nea litlōhōlō tsa lōna.’ Ke u lumeletse hore u e bone ka mahlo feela, empa u ke ke ua tšelela ho eona.”

₅Eaba Moshe mohlanka oa Morena, o shoella naheng eo ea Moabe, joalokaha Morena a ne a boletse. ₆Morena a mo epela ka khohlong, naheng ea Moabe, malebana le Bete-Peore. Empa ho fihlela le kajeno-ea-bokajeno ha ho motho ea tsebang lebitla la Moshe. ₇Ha Moshe a e-shoa o ne a e-na le lilemo tse lekholo le mashome a mabeli. Empa mahlo a hae a ne a ntse a bona hantle, le matla a hae a ntse a le kaofela. ₈Ka matsatsi a mashome a mararo bana ba Iseraele ba llela Moshe ba le liphuleng tsa Moabe. Matsatsi a bofifi ba ho mo llela, a nt'o fela.

₉Joshua, mora oa Nune, o ne a tletse moea oa bohlale, hobane Moshe o ne a ile a 'mea matsoho. Bana ba Iseraele ba mo mamela, ba etsa joalokaha Morena a ne a laetse Moshe.

₁₀Haesale ho tloha moo, ha ho e-s'o ka ho e-ba le moporofeta ea kang Moshe naheng ea Iseraele, eo Morena a neng a bua le eena lifahleho tsa bona li talimane. ₁₁Ha ho eo Morena a kileng a mo rōmela naheng ea Egepeta ho ea etsa lipontšo tsohle le mehlolo eohle ho Faro, le ho bahlanka ba hae bohle, le ho naha ea hae eohle. ₁₂Ha ho ea kileng a etsa leha e le 'ngoe ea liketso tsohle tse tšabehang, tseo Moshe a ileng a li etsa ka letsoho le matla, moo Baiseraele bohle ba ntseng ba bona.