LIPOLELO 25

₁“Ha ho e-na le tsekisano pakeng tsa banna, ba tla tla lekhotleng la boahlōli, 'me baahlōli ba ba ahlōlele. Ba tla lokolla ea se nang molato, ba ahlōle ea molato. ₂Haeba ea molato a lokela ho shapuoa, moahlōli o tla mo paqamisa, 'me moo moahlōli a ntseng a bona, motho eo a shapuoe lithupa tse lekanang molato oa hae. ₃Moahlōli a ka mo ahlōlela lithupa tse mashome a mane, e seng ho feta moo, esere haeba li ka feta moo, a shapuoa lithupa tse ngata ho feta tsena, ngoan'eno a tlontlolleha mahlong a hao.

₄“E pōlang u se ke ua e tlama molomo.

₅“Ha bana ba motho ba ahile 'moho, 'me e mong oa bona a e-shoa a se na mora, mosali oa mofu a se ke a nyaloa ke eo e seng oa lelapa. Ngoan'abo monna oa hae o tla mo kenela, a mo nke, e be mosali oa hae, a phethe tšoanelo ea ngoan'abo monna. ₆Mora oa matsibolo eo a tla 'meleha, o tla reelloa ka mofu, e le hore lebitso la hae le se ke la timela har'a Baiseraele.

₇“Haeba monna eo a sa rate ho kenela mohats'a ngoan'abo, mosali eo oa ngoan'abo o tla ea khorong ea motse, ho baholo, 'me a re: ‘Ngoan'abo monna oa ka o hana ho tsosa lebitso la ngoan'abo sechabeng sa Iseraele; ha a batle ho phetha tšoanelo ea hae ho 'na.’ ₈Joale baholo ba motse oa habo ba tla 'mitsa, ba bue le eena. Haeba a ngangella, a re: ‘Ha ke rate ho mo kenela,’ ₉mohats'a ngoan'abo o tla atamela ho eena, moo baholo ba ntseng ba bona, a mo rōlise seeta leotong, a mo tšoele ka mathe sefahlehong, a arabele, a re: ‘Ho etsoa tjena ka monna ea hanang ho tsosa ntlo ea ngoan'abo!’ ₁₀Sechabeng sa Iseraele o tla reoa lebitso la ‘Lelapa la monna ea rōlisitsoeng seeta.’ ”

₁₁“Ha banna ba babeli ba loana, 'me mosali oa e mong a kena lipakeng ho namolela monna oa hae, ha a ntse a tetekoa ke ea loanang le eena, eba o otlolla letsoho la hae, o mo tšoara ka makoalata, ₁₂u tla khaola letsoho le mosali eo, u se na mohau.

₁₃“Ka mokotleng oa hao u se ke ua ba le mefuta e fapaneng ea majoe a lekanyang boima, ke ho re le leholo le le lenyenyane. ₁₄Ka tlung ea hao u se ke ua ba le mefuta e fapaneng ea mafisoana a methang, ke ho re le leholo le le lenyenyane. ₁₅U be le lejoe le bontšang boima, le nepahetseng, le sa hanyapetseng; u be le lefisoana le methang, le nepahetseng, le sa hanyapetseng, e le hore u tle u phele halelele naheng eo Morena Molimo oa hao, a u neang eona. ₁₆E mong le e mong ea etsang lintho tse tjena, le e mong le e mong ea etsang ho sa lokang, ke manyala ho Morena Molimo oa hao.”

₁₇“Hopolang seo Baamaleke ba neng ba le etse sona, ha le le tseleng, le e-tsoa naheng ea Egepeta, ₁₈kamoo ba neng ba le futuhele tseleng kateng, ba bolaea ba neng ba saletse morao, ba bolaea le bohle ba neng ba fokola, ba le kamorao ho lōna, ha lōna le lapile, le khathetse; ba ba bolaea ba sa tšabe Molimo. ₁₉Etlare ha Morena Molimo oa lōna, a se a le phomolitse lireng tsohle tsa lōna tse le pota-potileng, naheng eo Morena Molimo oa lōna, a le neang eona e le lefa, hore e be ea lōna, le felise lebitso la Baamaleke lefatšeng. Le se ke la ba la lebala!”