Selelekela
1Ana ke mantsoe ao Moshe a ileng a a bua ho Baiseraele bohle, a le ka koano ho Jorodane, lehoatateng, phuleng e mabapa le Sufe, pakeng tsa Parane, le Tofele, le Labane, le Haserote, le Disahaba. 2Ho tloha Horebe ho ea Kadeshe-Barenea, ke tsela e tsamaeang thabeng ea Seire, ke leeto la matsatsi a leshome le motso o mong.
3Ka letsatsi la pele la khoeli ea leshome le motso o mong, selemong sa mashome a mane, Moshe a bua ho bana ba Iseraele, ho ea kamoo Morena a neng a mo laetse kateng mabapa le bona. 4Hoba a hlōle Sihone, khosi ea Baamore, ea neng a ahile Heshebone, le Oge, khosi ea Bashane, ea neng a ahile Ashetarote, mane Ederei, 5ka koano ho Jorodane, naheng ea Moabe, Moshe a qala ho phatlalatsa molao ona, a re:
6“Morena Molimo oa rōna, o ile a bua ho rōna a le Horebe, a re: ‘Le lutse nako e telele thabeng ena. 7Tlohang mona, le tsoele pele leetong la lōna, le ee naheng e maralla ea Baamore, le libakeng tse e pota-potileng, phuleng, le maralleng, le libakeng tse oeleng, ka boroa, pel'a lebōpo la leoatle, naheng ea Bakanana; le Lebanone, ho ea fihla nōkeng e kholo ea Euferatese. 8Bonang, ke le neile naha ena. E-eang, le inkele naha eo Morena a neng a e hlapanyetse bo-ntat'a lōna; a e hlapanyetsa Aborahama, le Isaka, le Jakobo, hore o tla ba nea eona le litlōhōlō tsa bona.’ ”
Moshe o khetha baahlōli
9“Ka nako eo ke ile ka bua ho lōna, ka re: ‘Ke sitoa ho jara boikarabelo tabeng tsa lōna ke le mong. 10Morena Molimo oa lōna, o le ngatafalitse, 'me bonang, kajeno le se le le bangata joaloka linaleli tsa leholimo. 11Morena Molimo oa bo-ntat'a lōna, a ke a le eketse hasekete, a le hlohonolofatse joalokaha a ile a le tšepisa. 12Joale 'na, ke le mong, nka tseba joang ho jara litsietsi tsa lōna, le mejaro ea lōna, le liqabang tsa lōna? 13Merabeng ea lōna khethang banna ba bohlale, ba nang le kutloisiso, ba tumileng, 'me ke tla ba etsa baokameli ba lōna.’
14“Le ile la nkaraba, la re: ‘Sena seo u reng se etsoe se setle.’
15“Kahoo, merabeng ea lōna, ke ile ka nka banna ba bohlale, ba tumileng, bao e leng lihlooho, ka ba etsa baokameli ba lōna: balaoli ba ba likete, le balaoli ba ba makholo, le balaoli ba ba mashome a mahlano, le balaoli ba ba mashome, le bangoli ba merabe ea lōna. 16Ka eona nako eo ka laela baahlōli ba lōna, ka re: ‘Mamelang lipelaelo tsa bana babo lōna, 'me le ahlōle ka toka pakeng tsa motho le ngoan'abo, le pakeng tsa hae le mojaki. 17Le se ke la ahlōla batho ka leeme; le mamele ea eisehang le ea hlomphehang kaho tšoana. Le se ke la tšaba sefahleho sa motho, hobane kahlōlo ke ea Molimo. Taba e tla le thatafalla, le e fetisetse ho 'na, 'me ke tla e mamela.’
18“Ka eona nako eo ka le laela lintho tsohle, tseo le tšoanetseng ho li etsa.”
Lihloela tse leshome le metso e 'meli
19“Joalokaha Morena Molimo oa rōna, a ne a re laetse, ra tsoela pele leetong, ho tloha Horebe; ra feta har'a lehoatata lane le leholo, le tšabehang, leo le ileng la le bona, tseleng e eang naheng e maralla ea Baamore, ra ea fihla Kadeshe-Barenea. 20Eaba ke re ho lōna: ‘Joale le fihlile naheng e maralla ea Baamore, eo Morena Molimo oa rōna, a re neang eona. 21Bonang, Morena Molimo oa lōna, o le neile naha ena. Nyolohang le e'o inkela eona, joalokaha Morena Molimo oa bo-ntat'a lōna, a buile ho lōna. Le se ke la tšaba; le se ke la nyahama lipelo.’
22“Bohle le ile la tla ho 'na, la re: ‘A re ke re rōmeng banna ba re etelle pele, e le hore ba ke ba e'o re hloella naha eo; ba boele ba tl'o re tsebisa tsela eo re tšoanetseng ho tsamaea ka eona, le metse eo re tla fihla ho eona.’
23“Hona ho ile ha nthabisa, 'me ke ile ka nka banna ba leshome le metso e 'meli ho lōna, monna a le mong morabeng o mong le o mong. 24Ba ile ba tsamaea, ba nyolohela naheng e maralla, ba fihla khohlong ea Eshekole, 'me ba e hloela. 25Ba nka tse ling tsa litholoana tsa naha eo, ba re tlisetsa tsona, 'me ba re tsebisa, ba re: ‘Naha eo Morena Molimo oa rōna, a re neang eona, e ntle.’
26“Empa lōna le ile la hana ho nyoloha, la fetohela taelo ea Morena Molimo oa lōna. 27Eaba le korotla le le ka litenteng tsa lōna, le re: ‘Kahobane Morena a re hloile, o re ntšitse naheng ea Egepeta ho tla neelana ka rōna matsohong a Baamore, hore ba re timetse. 28Ekaba re nyolohela kae? Bana babo rōna ba re nyahamisitse lipelo, ba re: Baahi ba moo ke linatla, 'me ba balelele ho re feta. Metse ea bona e meholo, e na le liqhobosheane tse fihlang marung. Le Baanake re ile ra ba bona hona moo.’
29“Eaba ke re ho lōna: ‘Le se ke la tšoha kapa la tšaba batho bao. 30Morena Molimo oa lōna, ea le etellang pele, o tla le loanela, joalokaha a ile a le loanela moo le ntseng le bona, ha le le Egepeta. 31Le lehoatateng, tseleng eohle eo le e tsamaileng, ho tla fihla sebakeng sena, le bone kamoo Morena Molimo oa lōna, a ileng a le pepa kateng, joalokaha monna a pepa mora oa hae.’
32“Empa holim'a tsena tsohle, ha le e-s'o ka le tšepa Morena Molimo oa lōna; 33e leng eena ea le etellang pele leetong, ho le batlela sebaka seo le tla hloma ho sona. Bosiu o le etella pele ka mollo, motšeare ka leru, ho le bontša tsela eo le tla tsamaea ka eona.”
Morena o otla Iseraele
34“Morena o ile a utloa lipolelo tsa lōna, a halefa, 'me a ikana, a re: 35‘Ruri ha ho le ea mong oa banna bana ba molōko ona o khopo, ea tla bona naha e ntle, eo ke ileng ka hlapanya hore ke tla e nea bo-ntat'a lōna. 36Ke Kalebe feela, mora oa Jefune, ea tla e bona, 'me eena le bara ba hae ke tla ba nea naha eo, eo eena a kileng a tsamaea holim'a eona, hobane eena o latetse Morena ka ho tlala.’
37“Le 'na Morena o ile a nkhalefela ka baka la lōna, a re: ‘Le uena u ke ke ua kena naheng eo. 38Empa Joshua, mohlanka oa hao, mora oa Nune, ke eena ea tla kena naheng eo. Mo khothatse, hobane ke eena ea tla etsa hore naha eo e be lefa la Iseraele. 39Masea a lōna, ao le ileng la re e tla ba bathōpuoa, le bana ba lōna, bao kajeno ba e-s'ong ho tsebe botle kapa bobe, ba tla kena naheng eo. Ha e le bona ke tla ba nea eona, 'me e tla ba ea bona. 40Empa ha e le lōna, khutlang, le boele lehoatateng ka tsela ea Leoatle la Lehlaka.’
41“Lōna le ile la araba, la re ho 'na: ‘Re sitetsoe Morena. Re tla nyoloha, 'me re loane joalokaha Morena Molimo oa rōna, a re laetse.’ Monna e mong le e mong oa lōna a hlomela, la re ke ntho e bobebe ho nyolehela naheng e maralla.
42“Empa Morena a re ho 'na: ‘E-re ho bona: Le se ke la nyoloha, 'me le se ke la ea loana, esere la hlōloa ke lira tsa lōna, hobane ha ke eo har'a lōna.’
43“Ke ile ka bua ho lōna, empa ha lea ka la mamela. Le ile la fetohela taelo ea Morena, la ikakasa, 'me la nyolohela naheng e maralla. 44Baamore ba ahileng naheng eo e maralla ba ile ba le futuhela joaloka sekhakhatha sa linotši, ba le leleka, ba le etsa mofela, ho tloha Seire ho ea fihla Horema. 45Le ile la khutla, la llela kapele ho Morena, empa Morena ha aa ka a le mamela, leha e le ho le sekehela tsebe. 46Ke kahoo le ileng la hlola matsatsi a mangata Kadeshe.
