Daniele o lora a bona libatana tse 'ne
1Ka selemo sa pele sa puso ea Beleshasare, khosi ea Babilona, Daniele o ile a lora toro, 'me a bona lipono ka kelellong ea hae, ha a ntse a robetse liphateng tsa hae. Eaba o ngola toro ena, o pheta litaba tsa eona.
2Daniele a bua, a re: “Bosiu, ponong ea ka, ke ile ka bona sefefo se matla, se tsoang liqoleng tse 'ne tsa lefatše, se tuluanya leoatle le leholo. 3Eaba libatana tse 'ne, tse kholo, tse sa tšoaneng, li bitoha har'a leoatle.
4“Sebatana sa pele se ne se tšoana le tau, empa se e-na le mapheo a kang a ntsu. Ka se talima ho fihlela ha se khaoloa mapheo, se phahamisetsoa holimo, se emisoa ka maoto joaloka motho, se bile se neoa kelello e kang ea motho.
5“Ka bona sebatana sa bobeli, se tšoanang le bèrè, se eme ka maoto a morao. Se ne se lōmme mahōpo a mararo ka meno a sona. Eaba ho thoe ho sona: ‘Ema, u harele nama e ngata!’
6“Ha ke ntse ke talimile ka bona sebatana se seng, se tšoanang le lengau, se neng se e-na le mapheo a mane, a kang a nonyana, mokokotlong oa sona. Sebatana sena se ne se e-na le lihlooho tse 'ne, 'me sona sa neoa matla a ho busa.
7“Kamora' tsena, liponong tsa ka tsa bosiu, ka boela ka bona sebatana sa bone, se tšabehang, se tšosang, se matla ka ho fetisisa. Se ne se e-na le meno a maholo, a tšepe. Sa harola, sa tsekolla, 'me ho setseng sa ho hatakela ka maoto a sona. Se ne se sa tšoane le libatana tse ling tseo ke neng ke ile ka li bona pele, se bile se e-na le manaka a leshome.
8“Ha ke ntse ke talimile manaka ana, ka bona lenakana le leng le runya pakeng tsa a mang, 'me le runyōla a mararo a pele. Lenakana lena le ne le e-na le mahlo a kang a motho, le molomo o buang ka boikakaso.”
Ea phelang kamehla eohle
9“Ha ke ntse ke talimile:
Ka bona literone li beoa malulong,
Moholo oa Matsatsi
a lula holim'a ea hae.
Aparo tsa hae
li ne li le tšoeu sa lehloa,
moriri oa hae
o re bja! joaloka boea,
terone ea hae e n'e tuka malakabe,
mabili a eona a ka mollo o tukang.
10Mollo o tsoang ho eena
o n'o phalla sa nōka,
kete-kete tsa batho li mo sebeletsa,
boieane bo sa baloeng
bo eme kapele ho eena.
Lekhotla la Moahlōli la buloa,
libuka le tsona tsa phetloa.
11“Eaba ke ntse ke talimile ka baka la lipolelo tsa boikakaso tse buuoang ke lenakana lane. Ka talima ho fihlela ke bona ha sebatana sena se bolaoa, setōpō sa sona se senyeha, se akheloa har'a malakabe. 12Ha e le libatana tse ling tsona, li ile tsa amohuoa matla a tsona, empa tsa ekeletsoa nakoana ea ho phela.
13“Ponong ea ka ea bosiu ka bona e mong ea kang Mor'a Motho, a e-tla a le holim'a maru, a e-tla ho Moholo oa Matsatsi, 'me ba mo atametsa kapele ho eena. 14Eaba o neoa puso, le tlōtla, le 'muso, e le hore ba lichaba tsohle, le ba merabe eohle, le ba lipuo tsohle ba mo sebeletse. Puso ea hae ke puso ea kamehla eohle, e ke keng ea fela, 'me 'muso oa hae o ke ke oa timetsoa.”
Lipono lia hlalosoa
15“ 'Na Daniele, moea oa ka o ile oa utloa bohlōkō, 'me lipono tseo ke li boneng kelellong ea ka tsa ntšoenya haholo. 16Eaba ke atamela ho e mong oa ba neng ba eme moo, ka 'motsa hore na tseo li bolela'ng.
“Eena a mpolella, a ntlhalosetsa se boleloang ke lintho tsena, a re: 17‘Libatana tsena tse kholo, tse 'ne, ke likhosi tse 'ne tse tla ba teng lefatšeng. 18Empa bahalaleli ba Ea Holimo-limo ba tla nka 'muso e be oa bona kamehla; e, kamehla le mehla.’
19“Joale ka batla ho tseba litaba tsa sebatana sa bone, se sa tšoaneng le tsohle tse ling, se tšabehang ka ho fetisisa, se meno a tšepe le linala tsa lethose, se harolang, se tsekolle, 'me se hatakele ka maoto a sona hoo se ho siileng. 20Ka batla ho tseba le tsa manaka a leshome a hloohong ea sona, le tsa lenakana le ileng la runyōla a mang a mararo, le nang le mahlo le molomo o buang ka boikakaso, le neng le feta manaka a mang a habo lona. 21Ka bona lona lenaka leo le loantša bahalaleli, le ba hlōla. 22Eaba ho fihla Moholo oa Matsatsi, a ahlōlela bahalaleli ba Ea Holimo-limo. Joale nako ea fihla ea hore 'muso o neoe bahalaleli.
23“Monna eo a re: ‘Sebatana sa bone e tla ba 'muso oa bone lefatšeng, o sa tl'o tšoana le mebuso e meng eohle. O tla timetsa lefatše lohle, o le hatakele, o le robokele. 24Manaka a leshome a tsoang 'musong ona, 'ona ke likhosi tse leshome tse tla ba teng. Khosi e 'ngoe, e sa tšoaneng le tseo tsa pele, e tla li hlahlama, 'me e hlōle likhosi tse tharo. 25E tla bua ka boikakaso ho Ea Holimo-limo, e hlorise bahalaleli ba Ea Holimo-limo. E tla leka ho fetola linako tsa selemo le melao. Ho tla neelanoa ka bahalaleli matsohong a eona ka nako e etsang lilemo tse tharo le halofo.
26“ ‘Empa lekhotla la kahlōlo le tla lula, khosi ena e amohuoe matla a eona a puso, 'me e felisoe, e timeletsoe ruri. 27'Muso le matla a puso, le botumo ba mebuso eohle e lefatšeng, tsena li tla neoa sechaba sa bahalaleli ba Ea Holimo-limo, eo 'muso oa hae e leng 'muso oa kamehla eohle, eo babusi bohle ba tla mo sebeletsa, ba mo hlomphe.’
28“Lipolelo tsena li fella mona. Ha e le 'na Daniele, ke ile ka tšoenngoa haholo ke menahano ea ka, ka pulufalloa, empa tsena ea e-ba sephiri sa ka.”
