Mokete oa Beleshasare oa lijo
1Khosi Beleshasare a etsetsa mahosana a hae a sekete mokete oa lijo, a noa veine moo batho bao ba sekete ba leng teng. 2Ha Beleshasare a nts'a e-noa veine, a laela hore linoelo tsa khauta le tsa silefera, tseo ntat'ae Nebukadenesare, a neng a li nke ka Tempeleng e neng e le Jerusalema, li tlisoe, e le hore khosi le mahosana a eona, le basali ba eona, le basali ba eona ba mafielo, ba tle ba noele ho tsona. 3Eaba ba tlisa linoelo tsa khauta, tse neng le nkiloe ka Tempeleng ea Molimo e neng e le Jerusalema, 'me khosi le mahosana a eona, le basali ba eona, le basali ba eona ba mafielo, ba noela ho tsona. 4Ba noa veine, ba rorisa melimo ea khauta, le ea silefera, le ea lethose, le ea tšepe, le ea lehong, le ea lejoe.
5Ka eona nako eo, ha hlaha menoana ea letsoho la motho, ea ngola leboteng le litsoeng la ntlo ea bokhosi, malebana le seluloana sa lebone, 'me khosi ea bona seatla sa letsoho le ntseng le ngola. 6Khosi ea pulufalloa, ea tšoenyeha haholo maikutlong; letheka la eona la khoehla, le mangoele a eona a otlana.
7Khosi ea hōoeletsa hore ho bitsoe balepi ba linaleli, le Bakalatiea, le balupi. Ea bua le linohe tsa Babilona, ea re: “Mang kapa mang ea ka balang mongolo ona, 'me a ntlhalosetsa seo o se bolelang, o tla apesoa liaparo tse perese, a roesoe sekhama sa khauta molaleng, e be 'musi oa boraro pusong ena ea ka.”
8Eaba bahlalefi bohle ba khosi baa kena, empa ba hlōloa ho bala mongolo, kapa ho hlalosetsa khosi seo o se bolelang. 9Joale khosi Beleshasare a tšoenyeha haholo, a pulufalloa, 'me mahosana a hae a tsieleha.
10Mofumahali ha a utloa lerata la khosi le la mahosana a eona, a kena ka tlung ea mokete oa lijo, a re: “Oho, khosi ea ka, ak'u re phelele! U se ke ua ferekana! U se ke ua pulufalloa! 11'Musong ona oa hao, monna o teng ea nang le moea oa melimo e halalelang ka ho eena. Mehleng ea ntat'ao, monna enoa o ile a ipaka hore o na le kelello e chatsi, le kutloisiso, le bohlale bo kang ba melimo. Khosi Nebukadenesare, ntat'ao, o ile a mo etsa mookameli oa linohe le balepi ba linaleli, le Bakalatiea, le balupi. 12Daniele eena enoa, eo khosi e ileng ea mo rea lebitso la Beleteshasare, o ile a ipaka hore o na le moea o motle le tsebo, le kutloisiso ea ho hlalosa litoro, le ho hlalosa lilōtho, le ho araba lipotso tse thata. E-re Daniele a bitsoe, 'me o tla u hlalosetsa hore na hona ho bolela'ng.”
Daniele o hlalosa mongolo
13Daniele a tlisoa kapele ho khosi, 'me khosi ea bua ho eena, ea re: “Na ke uena Daniele, e mong oa bathōpuoa ba Bajuda bao ntate, eo e neng e le khosi, a neng a ba tlise koano, ba e-tsoa naheng ea Juda? 14Ke utloile ho thoe moea oa melimo o teng ka ho uena, le hore u na le kelello e chatsi, le kutloisiso, le bohlale bo hlollang. 15Bahlalefi le balepi ba linaleli ba ile ba tlisoa kapele ho 'na hore ba bale mongolo ona, 'me ba ntlhalosetse seo o se bolelang, empa ba ile ba sitoa ho ntlhalosetsa. 16Ke utloile hore u tseba ho etsa litlhaloso, le ho araba lipotso tse thata. Joale, haeba u ka bala mongolo ona, ua ba ua ntlhalosetsa seo o se bolelang, u tla apesoa liaparo tse perese, u roesoe sekhama sa khauta molaleng, 'me u be 'musi oa boraro pusong ena ea ka.”
17Eaba Daniele o bua sefahla-mahlo ho khosi, o re: “Ipolokele limpho tseo tsa hao, le meputso ea hao u e nee e mong osele. Leha ho le joalo, ke tla balla khosi mongolo ona, 'me ke e hlalosetse seo o se bolelang.
18“Oho, uena khosi, Molimo ea holimo-limo o ne a nee ntat'ao Nebukadenesare, 'muso le botlotlehi le tlōtla le hlompho. 19Ka baka la botlotlehi boo a neng a mo nee bona, batho ba lichaba tsohle, le ba merabe eohle, le ba lipuo tsohle, ba ile ba thōthōmela kapele ho eena, ba mo tšaba. Khosi e ne e bolaea bao e ratang ho ba bolaea; bao e ratang ho ba hauhela e ba hauhela; bao e ratang ho ba phahamisa e ba phahamisa; bao e ratang ho ba kokobetsa e ba kokobetsa. 20Empa eitse ha pelo ea eona e qala ho ikhōhōmōsa, e thatafatsoa ke boikakaso ba eona, khosi e ile ea theoloa teroneng ea bokhosi, ea hlobolisoa tlōtla ea eona. 21E ile ea lelekoa har'a batho, 'me pelo ea eona ea tšoana le ea libatana; ea phela le litonki tsa naha, ea e-ja joang joaloka likhomo, 'mele oa eona oa laloa ke phōka ea leholimo, ho fihlela e tseba hore Molimo ea holimo-limo ke eena ea laolang 'muso oa batho, 'me o o nea ofe le ofe eo a mo ratang.
22“Le uena Beleshasare, mora oa hae, ha ua ka ua ikokobetsa, le hoja u tsebile tsena tsohle. 23U ikhōhōmōselitse Morena ea leholimong. Ba u tliselitse linoelo tse tsoang ka Tempeleng ea hae, 'me uena le mahosana a hao, le basali ba hao, le basali ba hao ba mafielo, le noeletse veine ka ho tsona. U ile ua rorisa melimo ea silefera, le ea khauta, le ea lethose, le ea tšepe, le ea lehong, le ea lejoe, e sa boneng, e sa utloeng, e sa tsebeng letho. Empa ha ua ka ua tlotlisa Molimo eo bophelo ba hao le metsamao eohle ea hao e leng ka letsohong la hae. 24Letsoho lena le ngotseng mongolo ona le tsoa ho eena.
25“Mantsoe a ngotsoeng ke ana:
MENE MENE TEKELE PARESINE.
26“Tlhaloso ea mantsoe ana ke ena: MENE ke ho re: Molimo o balile matsatsi a 'muso oa hao, 'me o o felisitse. 27TEKELE ke ho re: U beiloe sekaleng, 'me u fumanoe u le bobèbè. 28PARESINE ke ho re: 'Muso oa hao o arotsoe, o neiloe Bamede le Maperesiea.”
29Eaba Beleshasare o laela hore Daniele a apesoe liaparo tse perese, a roesoe sekhama sa khauta molaleng, 'me ho phatlalatsoe hore e tla ba 'musi oa boraro pusong ea hae.
30Hona bosuing boo, Beleshasare, khosi ea Bakalatiea, a bolaoa, 31'me Dariuse oa Momede ea e-ba khosi, a le lilemo tse mashome a tšeletseng a metso e 'meli.
