Mehla ea bofelo
1“Ka eona nako eo, Mikaele, khosana e kholo, mosireletsi oa sechaba sa heno, o tla fihla. Mohlang oo ho tla ba le litlokotsi tse e-s'ong ho ka li bonoa, haesale lichaba li e-ba teng ho fihlela kajeno. Ha nako eo e fihla, bohle ba sechaba sa heno ba ngotsoeng Bukeng, ba tla lopolloa. 2Ba bangata ba seng ba shoele ba tla boela ba tsoha: Ba bang ba tsohele bophelo ba kamehla eohle, ba bang ba tsohele hore ba hlajoe ke lihlong, ba nyelisehe kamehla eohle. 3Bahlalefi ba tla phatsima joaloka lōapi la leholimo, 'me ba rutileng batho ba bangata ho etsa ho lokileng ba tla phatsima joaloka linaleli kamehla le mehla. 4Empa uena Daniele, mantsoe a Buka ena u a etse pinyane, u e bitiele ho fihlela mehla ea bofelo. Ba bangata ba tla e phenya-phenya, kahoo tsebo ea bona e eketsehe.”
5Eaba 'na Daniele, kea talima, 'me ka bona banna ba bang ba babeli ba eme, e mong a le lebōpong le ka mose oane ho nōka, e mong a le lebōpong le ka koano ho nōka. 6E mong oa bona a botsa monna ea apereng seaparo se entsoeng ka lene, ea neng a emeletse holingoana ho nōka, a re: “Lintho tsee tse makatsang li tla etsahala neng?”
7Monna ea apereng seaparo se entsoeng ka lene, ea emeletseng holingoana ho nōka, a phahamisetsa matsoho a hae a mabeli leholimong, a hlapanya ka Molimo ea phelang kamehla le mehla, 'me ka utloa a re: “E tla ba ka lilemo tse tharo le halofo. Ha matla a sechaba se halalelang a se a felisitsoe, lintho tsena tsohle li tla etsahala.”
8Ka utloa, empa ka se ke ka utloisisa. Kahoo ka botsa, ka re: “Joale, moren'a ka, lintho tsee li tla fella joang?”
9Eena a nkaraba, a re: “Ikele, Daniele, hobane mantsoe ana ke pinyane, a bitietsoe ho fihlela mehla ea bofelo e fihla. 10Ba bangata ba tla hloekisoa, ba ntlafatsoe, ba lekoe. Ba khopo bona ba tla 'ne ba etse bokhopo. Ha ho le ea mong oa ba khopo ea tla utloisisa, empa ba bohlale bona ba tla utloisisa.
11“Ho tloha mohla ho felisoang sehlabelo sa letsatsi le letsatsi, ho beoa Manyala a Tšenyeho, e tla ba matsatsi a sekete le makholo a mabeli le mashome a robong. 12Ho lehlohonolo ea tla mamella ho fihlela matsatsi a sekete le makholo a mararo le mashome a mararo a metso e mehlano a fela.
13“Empa uena Daniele, u mamelle ho isa qetellong. U tla shoa, empa u tla tsoha mohl'a letsatsi la bofelo, u neoe lefa leo u le abetsoeng.”
