Sechaba se memeloa ho baka
1Lōna ba ntlo ea Iseraele, mamelang!
Ena ke koli-ea-malla
eo ke e binelang lōna:
2“O oele Moroetsana, Iseraele,
o oele, a ke ke a hlola a tsoha;
o lahliloe kherehloa naheng ea habo,
o lahliloe, ha ho ea mo tsosang.”
3Morena Molimo o bua tjena:
“Motse oa Iseraele,
o futuhang ka bahlabani,
bahlabani ba le sekete,
o tla salloa ke ba lekholo feela;
motsana o futuhang ka ba lekholo,
o tla salloa ke ba leshome feela.”
4Morena a bua tjena ho ba ntlo ea Iseraele, o re:
“Mpatleng, le tle le phele.
5Le se mpatle Bethele,
le Gilegale le se kene,
leha e le ho fetela Beeresheba,
hoba Gilegale e tla fela e thōptjoe,
Bethele eona e fetohe nanaola.”
6Batlang Morena, le tle le phele,
esere a ikakhela
kahar'a ntlo ea Josefa,
a ikakhela sa mollo o chesa Bethele,
o chesa Bethele,
ho se ea ka o timang.
7Le malimabe lōna ba sothang toka,
ba e sothang, ba e fetole leshokhoa,
ba e fetole, ba lahlele ho loka fatše!
8Ea entseng Selemela le Makolobe,
a fetola lefifi a le etsa meso,
a fifatsa motšeare a o etsa bosiu,
a bitsa metsi a leoatle
a a nesa holim'a lefatše,
lebitso la hae ke Morena.
9O lihela koluoa holim'a linatla,
motse o hahelelitsoeng
a o fetole lesupi.
10Le hloile ea loanelang toka,
a e loanela ka makhotleng,
le bile le nyelisa ea buang 'nete.
11Kaha le hatakela mofutsana,
le mo qōbelle ho le fa mabele a hae,
le ke ke la lula kahar'a matlo
le a hahile,
le a hahile ka majoe, le a betlile;
le masimo a morara o motle
le a lemme,
empa le ke ke la noa veine ea oona!
12Ke tseba palo ea litlōlo tsa lōna,
le boholo ba libe tsa lōna
kea bo tseba:
Le tuba ea lokileng,
le tjotjo le e amohele,
ha le ahlōlele mofutsana
ka toka makhotleng.
13Mohlang oo ea bohlale
o tla ikhutsetsa,
hobane mehla
e tla b'e le e mahlōnōkō.
14Batlang tse molemo
e seng tse khopo,
e le hore le tle le phele;
ke moo Morena
Molimo oa mabōtho,
a tla ba le lōna joalokaha le bolela.
15Hloeang bokhopo,
le rate tse molemo,
ka makhotlong le ahlōle ka toka,
mohlomong Morena,
Morena Molimo oa mabōtho,
a ka hauhela masalla a Josefa.
16Ka baka leo, Morena Molimo oa mabōtho, o bua tjena:
“Ho tla utloahala liboko
litseleng kahohle,
le lillo tsa mahlomola
mabaleng 'ohle a motse.
Balemi ba tla memeloa ho tla lla,
ba tsebang koli-ea-malla ba bokolle.
17Masimong 'ohle a morara
ho tla lluoa,
hoba ke tla feta kahar'a lōna,”
ho rialo Morena.
Letsatsi la Morena
18Ho malimabe lōna
ba hlōlōhetsoeng tsatsi la Morena!
Ke hobane'ng
le hlōlōhetsoeng tsatsi la Morena?
Tsatsi leo e tla ba la lefifi,
ha e na ho ba tsatsi la leseli!
19Ho tla ba joalokaha motho
a baleha tau,
ere a e baleha a khahlane le bèrè;
kapa joalokaha a kena ka tlung,
ere a phōphōletsa leboteng
a lōngoe ke nōha.
20Na tsatsi la Morena
ha e tl'o ba la lefifi,
la lefifi le letšo, la bo-nka-ntjana?
21“Mekete ea lōna ea borapeli
ke e hloile, ke bile kea e nyonya;
le phutheho tsa lōna
ha ke li thabele.
22Leha le ka nketsetsa
linyehelo tsa secheso,
la ntlisetsa le linyehelo tsa lijo,
tsena nke ke be ka li amohela.
Leha le ka nketsetsa
linyehelo tsa teboho,
la nketsetsa tsona
ka linonneng tsa lōna,
le tsona nke ke ba ka li talima.
23Lerata la lipina tsa lōna le ke le fele!
'Mino oa harepa tsa lōna oa ntena!
24Empa toka e ke e phalle,
e phalle joaloka nōka,
ho loka ho ke ho be
joaloka molatsoana,
ho ke molatsoana
o phallang kamehla.
25“Lōna ba ntlo ea Iseraele,
na le 'nyeheletse ka tse hlabiloeng,
la nketsetsa le tsona linyehelo
ka lemo tse mashome a mane,
la li etsa lehoatateng?
26Le ile la jara Sikute, khosi ea lōna,
le Kiune, molingoana oa lōna,
le molingoana oa lōna oa linaleli
e leng eo le iketselitseng eona.
27Kahoo ke tla le fallisa,
ke le fallisetse
ka nq'ane ho Damaseka,”
ho rialo Morena, lebitso la hae ke Molimo oa mabōtho.
