Puo ea Setefane
1Eaba Moprista e Moholo o re: “Na ke tsona?”
2Setefane a re: “Banna ba heso, le lōna bo-ntate, mamelang! Molimo ea tlōtlehang o ile a iponahatsa ho ntat'a rōna Aborahama ha a sa le Mesopotamia, a e-s'o ahe Kharane; 3a re ho eena: ‘Tloha naheng ea heno le ho bang ka uena, u ee naheng eo ke tla u supisa eona.’
4“Joale a tloha naheng ea Bakalatiea a tla aha Kharane. Hoba ntat'ae a shoe, Molimo a mo fallisetsa naheng ena eo le ahileng ho eona kajeno. 5Teng ha aa ka a mo fa sebaka seo e leng sa hae, leha e le ho lekanang bohato ba leoto, empa a mo tšepisa hore o tla mo nea eona, e be leruo la hae le la litlōhōlō tsa hae kamora' lefu la hae, le hoja a n'a se na ngoana. 6Molimo a bua tjena, a re: ‘Litlōhōlō tsa hao e tla ba bajaki naheng ea balichaba, 'me li tla etsoa makhoba, li sotloe ka lilemo tse makholo a mane. 7Empa sechaba se tla li etsa makhoba ke tla se ahlōla,’ ha rialo Molimo, ‘'me kamorao ho tsena li tla tloha, li tl'o ntšebeletsa sebakeng sena.’ 8Eaba Molimo o etsa selekane le eena, pontšo ea sona e le lebōllo. Eare hoba Aborahama a tsoale Isaka, a 'mōlōtsa ka tsatsi la borobeli. Isaka a bōlōtsa Jakobo, 'me Jakobo a bōlōtsa baholo-holo ba leshome le metso e 'meli.
9“Baholo-holo ba hōnōhela Josefa, ba mo rekisa Egepeta, empa Molimo o ne a e-na le eena, 10a mo namolela matšoenyehong 'ohle a hae. Molimo a mo nea leseho le bohlale pel'a Faro, khosi ea Egepeta, 'me Faro a mo khetha ho ba 'musisi oa Egepeta le oa ntlo ea hae eohle.
11“Joale tlala ea oela Egepeta eohle le Kanana, matšoenyeho a e-ba maholo, 'me bo-ntat'a rōna ba hloka lijo. 12Eitse ha Jakobo a utloa hore lijo li teng Egepeta, a rōma bo-ntat'a rōna khetlo la pele. 13Ka khetlo la bobeli Josefa a itsebisa bana babo, 'me Faro a tseba lelōko la Josefa. 14Eaba Josefa o rōmela ho bitsa ntat'ae Jakobo le bang ka eena bohle, e le batho ba mashome a supileng a metso e mehlano. 15Jakobo a theohela Egepeta, moo eena le bo-ntat'a rōna ba hlokahaletseng teng. 16Litōpō tsa bona tsa tlisoa Shekeme, 'me tsa epeloa lebitleng leo Aborahama a neng a le reke Shekeme ka silefera, ho bara ba Hemore.
17“Eare ha nako ea tšepiso eo Molimo a e etselitseng Aborahama e atamela, sechaba sa ata, sa ngatafala Egepeta, 18ho fihlela ha ho busa khosi e 'ngoe e neng e sa ka ea tseba Josefa. 19Eo ea sebetsa lelōko la rōna ka mano, ea sōtla bo-ntat'a rōna, ea ba lahlisa masea a bona, hore a tle a se ke a phela.
20“Ke ka nako ena Moshe a ileng a tsoaloa, 'me a khahleha ho Molimo. A hōlisetsoa habo ka khoeli tse tharo. 21Ha a se a lahliloe, morali oa Faro a mo thola, a ikhōlisetsa eena joaloka hoja e le mora oa hae. 22Moshe a rutoa bohlale bohle ba Baegepeta, 'me a ba matla lipolelong le mesebetsing ea hae.
23“Ha a e-na le lilemo tse mashome a mane, pelong ea hae ha e-ba le takatso ea ho chakela bana babo, bana ba Iseraele. 24Eare ha a bona e mong a etsoa hampe, a mo thusetsa; a pheteletsa ea tlatlapuoang ka ho bolaea Moegepeta. 25Joale a hopola hore bana babo ba tla utloisisa hore Molimo o tla ba pholosa ka letsoho la hae, empa ha baa ka ba utloisisa. 26Ka letsatsi le hlahlamang, a fumana ba bang ba loana, a leka ho ba boelanya hore ba etse khotso, a re: ‘Banna, le bana ba motho; le etsetsana'ng hampe?’
27“Empa ea neng a etsa oa habo hampe a sutumeletsa Moshe thōko, a re: ‘Ke mang ea u entseng 'musi le moahlōli holim'a rōna? 28U s'u rata ho mpolaea joalokaha u bolaile Moegepeta maobane?’ 29Moshe ha a utloa polelo ena, a baleha, ea e-ba mojaki naheng ea Midiane, moo a ileng a tsoalla bara ba babeli teng.
30“Ha ho fetile lilemo tse mashome a mane, lengeloi la iponahatsa ho eena lehoatateng la thaba ea Sinai, le le har'a malakabe a sehlahla se meutloa, se tukang. 31Moshe ha a bona pono eo a e makalla. Ha a atamela ho shebisisa, lentsoe la Morena la utloahala, la re: 32‘Ke 'na Molimo oa bo-ntat'ao, Molimo oa Aborahama, le oa Isaka, le oa Jakobo.’ Eaba Moshe oa thōthōmela, o hloka le sebete sa ho shebisisa.
33“Morena a re ho eena: ‘Rōla meqathatso ea hao, hobane sebaka seo u emeng ho sona sea halalela. 34Ruri ke bone tšotleho ea sechaba sa ka se Egepeta, ke utloile ho lumaela ha sona, 'me ke theohetse lefatšeng ke hona ho tla se lopolla; joale tloo, ke tla u rōma Egepeta.’
35“Moshe enoa, eo ba neng ba mo latole, ba re: ‘Ke mang ea u entseng 'musi le moahlōli?’ ke eena eo Molimo a mo rōmileng ka thuso ea lengeloi, le iponahalitseng sehlahleng, ho ba 'musi le molopolli. 36Ke eena ea ba ntšitseng Egepeta, a etsa limakatso le mehlolo naheng eo, le Leoatleng le Lefubelu, le lehoatateng, ka lilemo tse mashome a mane. 37Ke eena Moshe enoa ea itseng ho bana ba Iseraele: ‘Har'a bana babo lōna, Molimo o tla le hlahisetsa Moporofeta ea kang 'na.’ 38Ke eena ea ileng a ba teng phuthehong e lehoatateng, a e-na le lengeloi le neng le bua le eena Thabeng ea Sinai, a ntse a e-na le bo-ntat'a rōna; ke eena ea amohetseng lipolelo tse phelisang ho le nea tsona.
39“Empa bo-ntat'a rōna ba ile ba hana ho mo mamela, ba mo sutumeletsa thōko, lipelo tsa bona tsa khutlela Egepeta, 40ba re ho Arone: ‘Re etsetse melimo e tla re etella pele, hobane Moshe enoa, ea re ntšitseng naheng ea Egepeta, ha re tsebe se mo hlahetseng.’ 41Matsatsing ao ba bōpa namane, ba tlisetsa setšoantšo seo sehlabelo, ba thabela mesebetsi ea matsoho a bona. 42Eaba Molimo oa ba furalla, o neelana ka bona ho sebeletsa lebōtho la leholimo, joalokaha ho ngotsoe bukeng ea baporofeta, ho thoe:
“ ‘Na lōna ba ntlo ea Iseraele,
le 'nyeheletse ka tse hlabiloeng
le ka linyehelo
ka lilemo tse mashome a mane
lehoatateng?
43Le ile la jara tente ea Moloke,
le naleli ea molimo
o bitsoang Refane,
e leng litšoantšo
tseo le li etselitseng
ho li khumamela.
Kahoo ke tla le fallisetsa
ka nq'ane ho Babilona.’
44“Bo-ntat'a rōna ba ne ba e-na le Tente e pakang boteng ba Molimo lehoatateng, kamoo ho laetseng ea neng a bua le Moshe kateng, hore a e etse joaloka setšoantšo seo a ileng a se bona. 45Bo-ntat'a rōna ba e amohela. Tlas'a tsamaiso ea Joshua, ba tla le eona naheng ea balichaba, bao Molimo a ileng a ba leleka pel'a bo-ntat'a rōna, ho fihlela mehleng ea Davida. 46Davida a ratoa ke Molimo, 'me a kōpa ho fumanela Molimo oa Jakobo ntlo. 47Empa ke Solomone ea ileng a mo hahela ntlo eo.
48“Feela Ea Holimo-limo ha a lule matlung a hahiloeng ka matsoho, joalokaha moporofeta a re:
49“ ‘Leholimo ke terone ea ka,
lefatše ke bonamelo
ba maoto a ka;
lōna le tla nkhahela ntlo e joang,
ho rialo Morena,
kapa sebaka ke sefe
seo nka phomolang ho sona?
50Na tsee tsohle ha lia etsoa
ke letsoho la ka na?’
51“Lōna ba manganga, ba pelo li thata, le tsèbè tse sa mameleng joaloka tsa bahedene, kamehla le lōna le hlola le hanyetsa Moea o Halalelang, joaloka bo-ntat'a lōna! 52Ke ofe oa baporofeta ea sa kang a hlorisoa ke bo-ntat'a lōna? Ba bolaile ba neng ba bolele pele ho tla ha Ea Lokileng, eo le lōna le bileng baeki le babolai ba hae; 53lōna ba amohetseng Molao oo le o neelelitsoeng ke mangeloi, empa la se ka la o bōlōka.”
Setefane o tlepetsoa ka majoe
54Eare ha ba utloa tsena, lipelo tsa bona tsa hlabeha, 'me ba mo tsikitlanyetsa meno. 55Empa kaha a ne a tletse Moea o Halalelang, a talima leholimong, a bona khanya ea Molimo le Jesu a eme ka letsohong le letona la Molimo, 56'me a re: “Bonang! Ke bona maholimo a butsoe, le Mor'a Motho a eme ka letsohong le letona la Molimo.”
57Joale ba hōoa ka mantsoe a phahameng, ba ithiba litsebe, ba mo rutlōlōhela hong. 58Ba mo kharameletsa kantle ho motse, ba mo tlepetsa ka majoe. Lipaki tsa bea liaparo tsa tsona maotong a mohlankana ea bitsoang Saule.
59Ba tlepetsa Setefane ka majoe, a ntse a rapela, a re: “Morena Jesu, amohela moea oa ka!” 60Eaba oa khumama, o hōoa ka lentsoe le phahameng, o re: “Morena, u se ke ua ba balla sebe sena.” Hoba a rialo, a ithoballa.
