Khetho ea ba supileng
1Matsatsing ao, ha barutuoa ba ntse ba ngatafala, Bajuda ba buang Segerike ba ile ba ipelaetsa ka ba tsoaletsoeng Judea, ka hore bahlolohali ba habo bona ba sekisetsoa kabong ea lithuso tsa letsatsi le letsatsi. 2Eaba ba leshome le metso e 'meli ba bitsa barutuoa bohle, ba re ho bona: “Hase hantle ho tlohela lentsoe la Molimo re ea fepa litafoleng. 3Ka baka leo, bana beso, khethang banna ba supileng har'a lōna, ba botumo bo botle, ba tletseng Moea o Halalelang le bohlale, bao re tla ba nea mosebetsi ona, 4empa ha e le rōna re tla itahlela ka setōtsoana thapelong le tšebeletsong ea lentsoe.”
5Bohle ba amohela tlhahiso ena, 'me ba khetha Setefane, monna ea tletseng tumelo le Moea o Halaleleng, le Filipi, le Porokore, le Nikanore, le Timone, le Paramenase, le Nikola, mosokolohi oa Antiokia. 6Ba ba hlahisa kapele ho baapostola, 'me ha ba se ba rapetse, ba ba bea matsoho.
7Lentsoe la Molimo la anafala, le palo ea barutuoa ea ngatafala haholo Jerusalema, le sehlophahali sa baprista sa amohela tumelo.
Setefane oa tšoaroa
8Setefane, monna ea nang le lineo tse ngata le matla a maholo, a etsa limakatso le mehlolo e meholo har'a sechaba. 9Joale ha hlaha ba bang ba ntlo ea thapelo e bitsoang ea Balokolloa, e leng ba Sirene, le ba Alekesanderia, le ba tsoang Silesia le Asia, ba phehisana khang le Setefane. 10Empa ba ne ba sitoa ho hlōla bohlale le moea oo a neng a bua ka oona.
11Eaba ba reka banna ba bang hore ba tle ba re: “Re mo utloile a bua lipolelo tse nyefolang Moshe le Molimo.”
12Ba fuluha sechaba, le baholo, le Litsebi tsa Molao, ba khōrōhela Setefane, ba mo tšoara, ba mo isa khotla. 13Ba hlahisa lipaki tsa bohata, tse reng: “Motho enoa ha a phetse ho bua lipolelo tse loantšang Qalo ena e halalelang le Molao. 14Re mo utloile a re: ‘Jesu enoa oa Nasaretha o tla senya Qalo ena, a fetole meetlo eo Moshe a re neileng eona!’ ”
15Bohle ba neng ba lutse ka khotla, ba mo tjametse, ba bona sefahleho sa hae e ka sa lengeloi.
