Paulosi o ipiletsa ho Sesare
1Eare hoba Fesetose a fihle naheng eo, ha feta matsatsi a mararo, eaba o tloha Sesaria o nyolohela Jerusalema. 2Baprista ba baholo le baetapele ba Bajuda ba qōsa Paulosi. Ba rapela Fesetose, 3ba mo kōpa hore a ba tsoele molemo oa hore Paulosi a rōmeloe Jerusalema, kaha ba ne ba rerile ho mo lalla tseleng, ba 'molaee. 4Empa Fesetose a araba ka ho re Paulosi o tla bōlōkoa Sesaria, 'me le eena o rerile ho etela teng haufinyane. 5Hape a re: “Ba ka bang le hona har'a lōna ba theohe le 'na, 'me haeba ho e-na le letho le phoso ho monna eo, ba mo qōse.”
6Eare hoba a hlole le bona matsatsi a ka bang robeli, kapa a leshome, a theohela Sesaria. Ka le hlahlamang a lula setulong sa boahlōli, a laela hore Paulosi a tlisoe. 7Ha a fihlile, Bajuda ba neng ba theoha Jerusalema ba mo teela hare, ba mo qōsa ka liqōso tse ngata, tse boima, empa tseo ba neng ba sitoa ho li pakahatsa.
8Paulosi a ikarabella ka ho re: “Ha kea siteloa Molao oa Sejuda, kapa Tempele, esita le Sesare.”
9Empa Fesetose, ka ho rata ho khahlisa Bajuda, a botsa Paulosi, a re: “Na u lakatsa ho nyolohela Jerusalema ho ea ahlōleloa liqōso tsee kapele ho 'na na?”
10Paulosi a re: “Ke eme kapele ho lekhotla la Sesare la boahlōli, moo ke lokelang ho ahlōleloa teng. Ha kea fosetsa Bajuda ka letho, joalokaha le uena u tseba hantle. 11Haeba ke fositse, 'me ke entse ho hong ho lokeloang ke lefu, ha ke hane ho shoa. Empa haeba ho se 'nete tabeng tseo bana ba nqōsang ka tsona, ha ho motho ea ka 'neelang bona. Ke ipiletsa ho Sesare.”
12Hoba Fesetose a buisane le lekhotlana la hae, a re: “U ipilelitse ho Sesare; u tla ea kapele ho Sesare.”
Paulosi o tlisoa kapele ho Ageripa le Berenike
13Ha ho fetile matsatsi a seng makae, khosi Ageripa le Berenike ba fihla Sesaria, ba ea boka likhomo ho Fesetose. 14Ha ba qetile matsatsi a mangata ba le moo, Fesetose a bolella khosi litaba tse amanang le Paulosi, a re: “Ho na le monna e mong eo Felekise a mo siileng e le motšoaruoa. 15Ha ke le Jerusalema, baprista ba baholo le baholo ba Bajuda ba ile ba mo qōsa, 'me ba kōpa hore a ahlōloe.
16“Ke ile ka ba araba ka ho re hase moetlo oa Baroma ho neelana ka moqōsuoa a e-s'o thulanngoe le baqōsi ba hae, le ho neoa sebaka sa ho ikarabella qōsong ea hae. 17Ka le hlahlamang, ha ba se ba tlile koano, ke ile ka lula setulong sa boahlōli ntle ho tika-tiko, 'me ka laela hore monna eo a tlisoe. 18Ha baqōsi ba ema ba sitoa ho hlahisa le e 'ngoe ea liqōso tse mpe, tseo ke neng ke li nahanne. 19Ba phehisana khang le eena ka taba tse itseng tsa bolumeli ba bona, le ka e mong eo ho thoeng ke Jesu, ea neng a shoe, empa eo Paulosi a tiisang hore oa phela. 20Ka ho tsietsoa ke taba tsena, ka re na a ka rata ho ea Jerusalema, hore taba tsena li e'o ahlōleloa teng. 21Empa Paulosi a ipiletsa hore a bōlōkoe chankaneng, a emele kahlōlo ea Motlotlehi. Ke ile ka laela hore a bōlōkoe ho fihlela nka mo rōmela ho Sesare.”
22Ageripa a re ho Fesetose: “Le 'na nka rata ho utloa motho eo.”
Fesetose a re ho eena: “U tla mo utloa hosasane.”
23Ka tsatsi le hlahlamang, Ageripa le Berenike ba fihla ba aperoe ke balaoli ba ba sekete, le banna ba motse ba ka sehloohong, ba kena ka tlung ea lekhotla. Ka taelo ea Fesetose, Paulosi a tlisoa. 24Fesetose a re: “Khosi Ageripa, le lōna banna bohle ba teng mona, le bona monna enoa, eo sechaba sohle sa Bajuda se ipilelitseng ho 'na ka eena ke le Jerusalema leha ke le mona, sa hōoa, sa re ha a sa tšoanetse ho 'na a phela. 25Empa ha kea fumana a entse letho le lokeloang ke lefu. Eitse eena ha a ipiletsa ho Motlotlehi, ka rera ho mo rōmela teng. 26Ha ho letho le tiileng leo nka le ngollang khosi ea ka. Ka baka leo, ke mo tlisitse kapele ho lōna, haholo-holo kapele ho uena, khosi Ageripa, e le hore, ha ho se ho entsoe hlahlobo ke tle ke be le seo nka se ngolang. 27Ho 'na ho bonahala eka e ka ba ho hloka kelello ho rōmela motšoaruoa ke sa bontše melato eo a qōsoang ka eona.”
