LIKETSO 22

₁“Banna ba heso, le lōna bo-ntate, mamelang boikarabello ba ka ho lōna.”

₂Ha ba utloa hore o bua le bona ka Seheberu, ba khutsa le ho feta pele, 'me a re: ₃“'Na ke monna oa Mojuda ea tsoaletsoeng Tarasuse e Silesia, empa ke hōliselitsoe motseng ona, ke le morutoana oa Gamaleele, ka rutoa ka nepisiso Molao oa bo-ntat'a rōna, ka chesehella Molimo joaloka lōna bohle, kajeno. ₄Ka ikakhela ka setōtsoana ho hlorisa balateli ba Tsela ena ea Morena, ka tlama banna le basali, ka ba isa chankaneng. ₅Le Moprista e Moholo le lekhotla lohle la baholo ba ka mpaka. Ba ile ba mpha mangolo a ngoletsoeng Bajuda baheso ba Damaseka. Ka ea teng hore ke tlise ba Tsela ena Jerusalema ba tlamiloe, hore ba tle ba otloe.

₆“Ha ke le tseleng, 'me ke atametse Damaseka, e batla e e-ba har'a mpa ea motšeare, hang-hang ka teeloa hare ke leseli le leholo le tsoang leholimong. ₇Ka oela fatše, 'me ka utloa lentsoe le re ho 'na: ‘Saule! Saule! U ntlhorisetsa'ng na?’

₈“Ka araba, ka re: ‘U mang, Morena?’

“Eaba o re ho 'na: ‘Ke 'na Jesu oa Nasaretha, eo u mo hlorisang.’ ₉Ba neng ba e-na le 'na ba ile ba bona leseli, empa ha ba ea ka ba utloisisa hore na ea buang le 'na o reng.

₁₀“Ka re: ‘Ke etse joang, Morena?’

“Morena a re ho 'na: ‘Tsoha, u kene Damaseka, 'me teng u tla bolelloa tsohle tseo Molimo a rerileng hore u li etse.’ ₁₁Kaha ke ne ke foufalitsoe ke khanya ea leseli leo, bao ke neng ke e-na le bona ba ntataisa ka letsoho, 'me ka ea fihla Damaseka.

₁₂“Joale monna e mong ea bitsoang Ananiase, ea hlomphang Molimo ho ea ka Molao, ea pakoang ke Bajuda bohle ba ahileng moo, ₁₃a tla ho 'na, 'me a ema pel'a ka, a re: ‘Saule, ngoan'eso, boela u bone!’ Ka eona nako eo ka boela ka foufoloha, 'me ka 'mona.

₁₄“A re: ‘Molimo oa bo-ntat'a rōna o u khethile hore u tsebe thato ea hae, u bone Ea Lokileng, 'me u utloe lentsoe le tsoang molomong oa hae, ₁₅hobane u tla ba paki ea hae ho batho bohle, u pake tseo u li boneng, le tseo u li utloileng. ₁₆'Joale u liehela'ng? Ema, u kolobetsoe, u hlatsuoe libe tsa hao ka ho rapela lebitso la hae.’

₁₇“Ha ke khutletse Jerusalema, 'me ke ntse ke rapela ka Tempeleng, ka ba le pono. ₁₈Ka bona Morena, 'me a re ho 'na: ‘Phakisa u tlohe Jerusalema kapele-pele, hobane ha ba ka ke ba amohela bopaki boo u mpakang ka bona.’

₁₉“Ka re: ‘Morena, baa tseba hore ba lumelang ho uena ke ne ke ba hlahlela chankaneng, ke ba shapela ka matlung a thapelo. ₂₀Ha ho tšolloa mali a paki ea hao, Setefane, ke ne ke le teng ka sebele, ke lumela, 'me ke lebetse liaparo tsa ba 'molaeang.’

₂₁“A re ho 'na: ‘E-ea, hobane ke tla u rōma hōle, lichabeng!’ ”

₂₂Ba mo mamela ho fihlela a bolela polelo ena, ba nt'o hōoa, ba re: “Tlosang motho ea tjena lefatšeng, hobane ha a lokele ho phela.”

₂₃Ha ba ntse ba hōoeletsa, ba hlobola liaparo tsa bona, ba khophola marōle. ₂₄Eaba molaoli oa ba sekete o laela hore Paulosi a kenngoe ka qhobosheaneng. A re hape a hlōkōfatsoe ka ho shapuoa, hore a tle a tsebe hantle lebaka leo ba mo tlakang ka lona hakaalo. ₂₅Empa eare ha ba mo tlama ka marapo, Paulosi a re ho molaoli oa ba lekholo, ea emeng moo: “Na hoa lumelleha hore le shape motho eo e leng Moroma, a e-s'o ka a ahlōloa na?”

₂₆Eare ha molaoli oa ba lekholo a utloa hona, a ea ho molaoli oa ba sekete, a mo tsebisa, a re: “Motho enoa ke Moroma! U etsa'ng?”

₂₇Molaoli oa ba sekete a atamela, a re ho Paulosi: “Mpolelle, na u Moroma?”

A re: “E.”

₂₈Molaoli a araba, a re: “'Na ke rekile Boroma bona ka chelete e ngata!”

Paulosi a re: “'Na ke Moroma ka tsoalo!”

₂₉Ba neng ba le lekhatheng la ho mo hlōkōfatsa, ba sutha hang-hang ho eena. Le molaoli a tšoha ha a utloa hore Paulosi ke Moroma, hobane o ne a se a mo tlamile.

₃₀Ka la hosasane, kaha a ne a lakatsa ho tseba hantle hore na Paulosi o qōsoa ka'ng ke Bajuda, a mo lokolla, a laela hore baprista ba baholo, le lekhotla lohle, ba phuthehe, a nt'o tlisa Paulosi, a mo emisa kapele ho bona.