Meferefere motseng oa Thesalonika
1Ha ba fetile Amfipolese le Apolonia, ba fihla Thesalonika, moo ho neng ho e-na le ntlo ea thapelo ea Bajuda. 2Ho ea ka tloaelo ea hae, Paulosi a kena ho bona, 'me ka Lisabatha tse tharo a buisana le bona ka tsa Mangolo. 3A ba hlalosetsa le ho ba bontša hore ho ne ho tšoanetse hore Mesia a hlōkōfatsoe, 'me a tsohe bafung, le hore “Jesu enoa, eo ke le tsebisang eena, ke Mesia.” 4Ba bang ba bona ba lumela, 'me ba sebelisana le Paulosi le Silase, le bongata bo boholo ba Bagerike ba khumamelang Molimo, le basali ba bangata ba ka sehloohong.
5Empa Bajuda ba e-ba mōna, ba phutha banna ba bang ba khopo, ba lebaleng la motse, ba ea le bona, ba tsosa moferefere motseng; ba futuhela ntlo ea Jasone, ba batla Paulosi le Silase ho ba tlisa kapel'a pitso ea sechaba. 6Ha ba sa ba fumane, ba hulanyetsa Jasone le balumeli ba bang kapel'a bo-ramotse, ba ntse ba hōoa, ba re: “Banna bana ba ferekantseng libaka tsohle, le mona ba tlile, 7'me Jasone o ba amohetse. Batho bana bohle ba etsa se loantšanang le litaelo tsa Sesare, ba re ho na le khosi e 'ngoe, e leng Jesu!” 8Ba ferekanya letšoele le bo-ramotse ba utloang litaba tsena; 9'me eare hoba Jasone le ba bang ba lefe chelete ea tebeletso, ba ba lōkōlla.
Baapostola motseng oa Berea
10Hang-hang balumeli ba thobisetsa Paulosi le Silase Berea, bosiu. Hoba ba fihle teng, ba kena ka tlung ea thapelo ea Bajuda. 11Bao ba ne ba e-na le maikutlo a matle ho feta ba Thesalonika, ba amohela lentsoe la Molimo ka thahasello eohle, ba fuputsa Mangolong ka letsatsi le leng le le leng ho bona hore na litaba tseo li joalo. 12Ka baka leo, ba bangata ba bona ba lumela, le basali ba hlomphehang ba Bagerike, le banna ba bangata.
13Empa Bajuda ba Thesalonika ha ba utloa hore Paulosi o boletse lentsoe la Molimo le Berea, le teng ba ea, ba tsosa moferefere, ba ferekanya matšoele. 14Eaba hang-hang balumeli ba balehisetsa Paulosi leoatleng, empa Silase le Timothea ba sala moo. 15Batho ba felehelitseng Paulosi ba mo fihlisa Athene, 'me hoba ba neoe taelo e eang ho Silase le Timothea, e reng bao ba tle ho Paulosi kapele-pele, ba khutla.
Paulosi motseng oa Athene
16Paulosi ha a ntse a emetse Silase le Timothea, Athene, a fela pelo ha a bona hore motseng ho tletse litšoantšo tsa melimo ea bohata. 17Kahoo ka tsatsi le leng le le leng a buisana le Bajuda ba tšabang Molimo ka tlung ea thapelo, le ba ka tšohang ba e-ba teng lebaleng la motse. 18Joale bahlalefi ba bang ba Baepikure le ba Basetoike ba ngangisana le eena, 'me ba bang ba re: “Ekaba mobera-beri eo o rata ho re'ng?”
Ba bang bona ba re: “E ka ka ke 'muelli oa melimo esele,” hobane o ne a bolela molaetsa o molemo oa Jesu le oa tsoho ea bafu. 19Ba mo nka, ba mo isa lekhotleng la Areopagose, ba re: “Na re ka tseba hore na thuto ee e ncha eo u e bolelang ke efe? 20U re tlisetsa litaba ling, tse re hlohlontšang litsebe? Ka baka leo, re rata ho tseba hore na ekaba tsena li bolela eng.” 21Baathene bohle le bajaki ba melata ba ne ba sa etse letho, haese ho bolela kapa ho utloa ho hong ho hocha.
22Joale Paulosi a ema har'a lekhotla la Areopagose, a re: “Banna ba Athene, ke hlokomela hore ka mekhoa eohle le hlompha melimo ea lōna haholo. 23Ha ke ntse ke itsamaela, 'me ke hlahloba moo le rapellang teng, ke ile ka fumana le aletare eo ho ngotsoeng ho eona: ho molimo ea sa tsejoeng. Sena seo le se rapelang le sa se tsebe, ke le tsebisa sona.
24“Molimo ea entseng lefatše le tsohle tse ho lona, eo e leng Morena oa leholimo le oa lefatše, ha a lule litempeleng tse hahiloeng ka matsoho. 25Hape ha a hloke ho sebeletsoa ka matsoho a batho, joaloka hoja a hloka ho hong, hobane ke eena ea neang bohle bophelo, moea le lintho tsohle. 26O entse lichaba tsohle ka mali a motho a le mong, hore li ahe lefatšeng lohle; a li beela linako e sa le pele, le meeli ea boaho ba tsona, 27e le hore li batle Molimo, haeba li ka mo phōphōletsa, tsa mo fumana, le hoja ruri a se hōle le e mong le e mong oa rōna.
28“Re phela ka eena, re tsamaea ka eena, re teng ka eena, joalokaha le baroki ba bang ba lōna ba itse:
“ ‘Hobane re bile re bana ba hae.’
29“Kaha re le bana ba Molimo, ha rea tšoanela ho hopola hore bomolimo bo tšoana le khauta, silefera kapa lejoe le betliloeng ka tsebo le ka bohlale ba motho. 30Molimo o itebalitse linako tsa ho se tsebe ha batho, empa joale o laela hore kahohle batho bohle ba bake, 31hobane o beile letsatsi leo ka lona a tla ahlōla lefatše ka toka, ka monna eo a mo khethileng, 'me o neetse bohle bopaki ka ho mo tsosa bafung.”
32Eare ha ba utloa tsa tsoho ea bafu, ba bang ba soma, ba bang ba re: “Re sa tla u utloa hape ka taba ena.” 33Eaba Paulosi o tloha har'a bona. 34Empa banna ba bang ba mo khomarela, ba lumela. Har'a bona ho ne ho e-na le Dionisiose, setho sa lekhotla la Areopagose, le mosali ea bitsoang Damarise, ba e-na le ba bang.
