Khetho le thōmo ea Baranabase le Saule
1Kerekeng ea Antiokia ho ne ho e-na le baporofeta le baruti, e leng Baranabase le Simeone, ea neng a bitsoa Botšo, le Lōsaniase oa Sirene, le Manaene, ea hōlisitsoeng le khosi Heroda, le Saule. 2Ha ba ntse ba phetha tšebeletso ea Morena Jesu, 'me ba itima lijo, Moea o Halalelang oa re: “Nkhetheleng Baranabase le Saule bakeng sa mosebetsi oo ke ba bitselitseng oona.” 3Eare hoba ba itime lijo, 'me ba rapele, ba ba bea matsoho, ba re ba tsamaee.
Baapostola ba ruta sehlekehlekeng sa Sipera
4Kaha ba ne ba rōmiloe ke Moea o Halalelang, ba theohela Selekose; ho tloha moo ba tšelela Sipera ka sekepe. 5Eare ha ba fihla Salamise, ba phatlalatsa lentsoe la Molimo matlung a thapelo a Bajuda. Ba ne ba e-na le Johanne, e le mothusi oa bona.
6Ha ba se ba tsamaile le sehlekehleke sohle ho ea fihla Pafose, ba fumana monna e mong oa senohe, e le moporofeta oa bohata, oa Mojuda, ea bitsoang Barejesu. 7E ne e le lehlahana la 'musisi Seregiose Paulosi, monna ea seli. 'Musisi enoa a bitsa Baranabase le Saule, hobane a ne a rata ho utloa lentsoe la Molimo. 8Empa Elemase oa senohe, kaha lebitso la hae le hlalosoa joalo, a ba hanyetsa, a batla ho khelosa 'musisi tumelong. 9Joale Saule, ea bileng a bitsoang Paulosi, a tletse Moea o Halalelang, a mo talimisisa, a re: 10“Ngoan'a Diabolosi! Uena ea tletseng thetso le bokhopo bohle! Sera sa toka eohle! Na ha u sa tla khaotsa ho khopamisa litsela tse lokileng tsa Morena? 11Joale, bona, letsoho la Morena lea u otla: u tla foufala, u se ke ua bona letsatsi ka nako e itseng.”
Hang-hang moholi le lefifi tsa mo aparela, 'me a 'na a phōphōletsa ho batla ea ka mo tataisang ka letsoho. 12Eare ha 'musisi a bona se etsahetseng, a lumela, a makalla thuto ea Morena.
Paulosi le Baranabase ba ea Antiokia e Pisidia
13Paulosi le ba nang le eena ba tloha Pafose ka sekepe, ba ea fihla Perege e Pamfilea. Johanne a khaohana le bona, a khutlela Jerusalema. 14Bona ba phunyeletsa ho tloha Perege, ho ea fihla Antiokia e Pisidia. Ba kena ka tlung ea thapelo ka letsatsi la Sabatha, ba lula fatše. 15Eare hoba ba bale Molao le Baporofeta, baokameli ba ntlo ea thapelo ba rōmela ho bona, ba re: “Banna ba heso, haeba le e-na le lentsoe le leng la ho khothatsa batho bana, buang.”
16Paulosi a ema, a phōka ka letsoho, a re: “Banna ba Iseraele, le lōna ba tšabang Molimo, mamelang! 17Molimo oa sechaba sena sa Iseraele a na a khetha bo-ntat'a rōna moholo, a ba etsa sechaba se seholo ha ba ntse ba jakile naheng ea Egepeta, 'me a ba ntša teng ka letsoho le matla. 18Ka lilemo tse ka bang mashome a mane a mamella mekhoa ea bona ha ba le lehoatateng. 19Ha a se a timelitse lichaba tse supileng naheng ea Kanana, a ba nea naha eo hore e be lefa la bona 20ka lilemo tse ka bang makholo a mane le mashome a mahlano.
“Kamora' tsena a ba nea baahlōli, ho fihlela mehleng ea moporofeta Samuele. 21Ho tloha moo ba ikōpela ho fuoa khosi, 'me Molimo a ba nea Saule, mora oa Kishe, oa lelōko la Benjamine, ea ileng a busa ka lilemo tse mashome a mane. 22Ha Molimo a se a mo tlositse, a bea Davida ho ba khosi ea bona, eo a bileng a mo paka, a re: ‘Ke fumane Davida, mora oa Jese, e le monna eo ke mo ratang, ea tla phetha thato ea ka eohle.’
23“Ke ka litlōhōlō tsa monna enoa Molimo a ileng a tlisetsa Iseraele Mopholosi, e leng Jesu, ho ea ka tšepiso ea hae. 24Jesu a e-s'o tle, Johanne o ne a ile a ruta batho bohle ba Iseraele hore ba bake, ba kolobetsoe. 25Ha Johanne a qetile tsa thōmo ea hae a re: ‘Le lekanya hore 'na ke mang? Ha ke Eena, empa bonang, kamora' ka ho tla eo ke sa tšoanelang ho lokolla meqathatso maotong a hae.’
26“Banna ba heso, bana ba Aborahama, le lōna ba tšabang Molimo, lentsoe lena la pholoho le rōmetsoe ho rōna, 27hobane ba ahileng Jerusalema le babusi ba bona ba ne ba sa tsebe monna enoa le mantsoe a baporofeta, a neng a baloa ka Sabatha se seng le se seng, empa ba a phethahalitse ka ho mo ahlōla. 28Leha ba sa ka ba fumana a e-na le molato o lokelang lefu, ba kōpa Pilato hore a bolaoe. 29Ha ba se ba phethile tsohle tse ngotsoeng ka eena, ba mo theola sefapanong, ba 'mea ka lebitleng. 30Empa Molimo a mo tsosa bafung. 31Ka matsatsi a mangata a iponahatsa ho ba neng ba nyolohile le eena ho tloha Galelea ho tla Jerusalema, bao joale e leng lipaki tsa hae ho batho.
32“Rōna re le bolella molaetsa o molemo: Seo Molimo a neng a se tšepisitse bo-ntat'a rōna, 33o se phethahalitse ho rōna, bana ba bona, ka ho tsosa Jesu bafung, joalokaha ho ngotsoe Pesalemeng ea bobeli, ho thoe:
“ ‘U Mora oa ka,
kajeno ke u tsoetse;’
34“le hore Molimo o mo tsositse bafung, hore a se ke a hlola a boela ho boleng, ke seo a se boletseng ha a re:
“ ‘Ke tla le nea mahlohonolo
a halalelang a sebele,
a tiisitsoeng a Davida.’
35“Hape sebakeng se seng o re:
“ ‘Ha u ka ke
ua tlohella Ea Halalelang oa hao
hore a bole.’
36“Efela Davida hoba a sebeletse mōlōko oa hae, a phethe thato ea Molimo bophelong ba hae, o ile a ithoballa, a epeloa pel'a bo-ntat'ae, a bola. 37Athe ea tsositsoeng bafung ke Molimo ha aa ka a bola.
38“Ka baka leo, tsebang he, bana beso, hore ka Jesu le phatlalletsoa tšoarelo ea libe. Le linthong tsohle tseo le neng le sitoa ho fumanoa le se molato ho tsona ka Molao oa Moshe, 39mang le mang ea lumelang ho Jesu o fumanoa a se molato ho tsona. 40Ka baka leo, hlokomelang, esere la hlaheloa ke se neng se boleloe ke baporofeta:
41“ ‘Talimang, lōna banyelisi ting!
Makalang, le be le timele!
Ke etsa ho hong
mehleng ena ea hao;
ke etsa hoo o neng
o ke ke oa ho lumela,
leha o ne o ka ba oa ho bolelloa.’ ”
42Eare ha ba e-tsoa, batho ba ba kōpa hore ba tle ba ba bolelle litaba tseo le ka Sabatha se latelang. 43Joale ha phutheho e se e qhalane, Bajuda ba bangata le basokolohi ba hlomphang Molimo, ba sala Paulosi le Baranabase morao. Bona ba bua le bona, ba ba khothaletsa ho tiisetsa mohaung oa Molimo.
44Ka Sabatha se hlahlamang motse oa batla o phutheha kaofela ho tla utloa lentsoe la Molimo. 45Empa Bajuda ha ba bona matšoele, ba kenoa ke mōna, ba hanyetsa tse builoeng ke Paulosi, ba mo nyefola.
46Eaba Paulosi le Baranabase ba bua ka sebete, ba re: “Ho ne ho tšoanetse hore lentsoe la Molimo le boleloe ho lōna pele, empa erekaha le le hana, le ikahlōla hore ha le lokeloe ke bophelo bo sa feleng; bonang, re ea ho balichaba. 47Morena o re laetse tjena:
“ ‘Ke u entse leseli la lichaba,
hore u ise pholoho
le lipheletsong tsa lefatše!’ ”
48Eare ha balichaba ba utloa ba thaba, 'me ba tlotlisa lentsoe la Morena. Bohle ba khethetsoeng bophelo bo sa feleng ba lumela.
49Lentsoe la Molimo la anetsoa sebakeng seo. 50Empa Bajuda ba kenya moea ho basali ba hlomphehang, ba hlomphang Molimo, le ho banna ba ka sehloohong ba motse, hore ba hlorise Paulosi le Baranabase 'me ba ba leleka naheng ea bona. 51Eaba bona ba ba hlōhlōrela lerōle le maotong a bona, ba ea Ikonione. 52Ha e le barutuoa bona ba tlala thabo le Moea o Halalelang.
