Davida e ba khosi
1Merabe eohle ea Baiseraele ea ea ho Davida a le Heborone, ea bua, ea re: “Bona, re bana beno. 2Mehleng ea ha Saule e ne e le khosi ea rōna, e ne e le uena ea etellang Baiseraele pele ha ba futuha. Morena a na a re ho uena: ‘U tla lisa sechaba sa ka sa Baiseraele, 'me u tla ba khosi ea Iseraele.’ ”
3Eaba baetapele bohle ba Iseraele ba ea ho khosi e le Heborone. Khosi Davida a etsa selekane le bona Heborone, kapele ho Morena, 'me ba mo tlotsa hore e be khosi ea Iseraele.
4Davida ha a qala ho busa o ne a e-na le lilemo tse mashome a mararo, 'me a busa ka lilemo tse mashome a mane. 5A busa morabe oa Juda ka lilemo tse supileng le likhoeli tse tšeletseng a ntse a le Heborone, 'me a busa Iseraele eohle le Juda eohle ka lilemo tse mashome a mararo a metso e meraro a le Jerusalema.
Davida o hapa Sione
6Khosi le banna ba eona ba ea Jerusalema, ba futuhela Bajebuse bao e neng e le baahi ba naha eo. Bajebuse ba re ho Davida: “U ke ke ua kena mona; lifofu le liritsa li tla u thiba.” Ka ho rialo ba ne ba re: “Davida a ke ke a kena mona.” 7Leha ho le joalo, Davida a hapa qhobosheane ea Sione, e leng eona motse oa Davida.
8Ka lona letsatsi leo Davida a re: “Mang kapa mang ea ratang ho bolaea Mojebuse, eka khona a nyolohe ka mosèlè oa metsi, a bolaee lihlotsa tseno le lifofu tseno, e leng tsona lira tse kholo tsa Davida.” Ke ka hona ba reng: “Lifofu le lihlotsa li ke ke tsa kena motseng.”
9Davida a aha qhobosheaneng eo, 'me a e bitsa motse oa Davida. Eaba Davida o haha motse o pota-potileng qhobosheane eo, ho tloha Milo ho ea qhobosheaneng. 10Davida a 'na a tsoela pele ho matlafala, 'me Morena Molimo oa mabōtho, a ba le eena.
11Hirame, khosi ea Tire, a rōma maqōsa ho Davida. A rōmela lifate tsa likedare, le libetli, le lihahi, 'me tsa hahela Davida ntlo. 12Joale Davida a bona hore efela Morena o mo hlomamisitse hore e be khosi ea Iseraele, le hore o hōlisitse 'muso oa hae ka baka la sechaba sa hae sa Baiseraele.
Ho hōla ha lelapa la Davida
13Hoba Davida a tlohe Heborone, a fihle Jerusalema, a boela a nka basali ba mafielo, a nyala le basali, 'me a boela a tsoalloa bara le barali. 14Ana ke mabitso a bao a ileng a ba tsoalloa ha a le Jerusalema: Shamua, le Shobabe, le Nathane, le Solomone, 15le Jibehare, le Eleshua, le Nefege, le Jafia, 16le Eleshama, le Eleada, le Elefelede.
Bafilesita baa ripitloa
17Ha Bafilesita ba utloa hore Davida o tlotsitsoe hore e be khosi ea Iseraele, ba futuha bohle, ba ea tsōma Davida. Ha Davida a utloa hona, a theohela qhobosheaneng. 18Bafilesita ba fihla, ba hoaramana ka khohlong ea Refaime. 19Davida a botsa Morena, a re: “Na nka futuhela Bafilesita? Na u tla neelana ka bona matsohong a ka?”
Morena a re ho Davida: “Futuha, hobane ke tla fela ke neelane ka Bafilesita matsohong a hao.”
20Eaba Davida o ea Baale-Perasime, o bolaela Bafilesita hona teng, 'me a re: “Morena o ripitlile lira tsa ka joalokaha eka li hōhōloa ke metsi.” Ka lebaka leo a rea sebaka seo Baale-Perasime. 21Ha Bafilesita ba baleha ba siea melimo ea bona hona moo, Davida le banna ba hae ba e nka.
22Bafilesita ba boela ba nyoloha, ba fihla ba hoaramana ka khohlong ea Refaime. 23Davida a boela a botsa Morena, 'me Morena a re: “U se ke ua ba futuhela u ba tobile; u ba pote kamorao, u ba futuhele u se u hlaha pel'a lifate tsa monōkōtšoai. 24Etlare ha u utloa lesoahla-soahla holim'a lifate tsa monōkōtšoai, ebe ua futuha, hobane Morena o tla be a u eteletse pele ho ea bolaea lebōtho la Bafilesita.” 25Davida a etsa joalokaha Morena a mo laetse, a bolaea Bafilesita ho tloha Geba ho ea fihla Gesere.
