2 SAMUELE 22

“Morena ke lehaha la ka,

ke qhobosheane ea ka,

ke monamoleli oa ka.

₃Molimo ke lefika la ka,

leo ke tšabelang ho lona,

ke thèbè ea ka,

ke lenaka la ka le mpholosang,

ke seqhobo sa ka,

ke setšabelo sa ka,

ke Mopholosi oa ka,

u mpholosa khatellong.

₄Ke ipiletsa ho Morena

ea lokelang ho rorisoa,

'me ke pholosoa lireng tsa ka.

₅“Maqhubu a lefu

a ne a ntikile,

phororo tsa timelo

li ne li nkukile.

₆Maraba a lefu

a ne a mpota-potile,

lifi tsa lefu

li ne li nchehile.

₇Makaqabetsing a ka

ka ipiletsa ho Morena,

e, ka ipiletsa ho Morena oa ka,

a utloa lentsoe la ka

a le ka Tempeleng ea hae,

sello sa ka sa fihla tsebeng tsa hae.

₈“Lefatše la reketla, la thōthōmela,

methèo ea leholimo ea tsukutleha,

ea reketla hobane a halefile.

₉Mosi oa fōqōha ka nkong tsa hae,

mollo o timetsang

oa betseha ka hanong la hae,

mashala a hlenneng

a tsoa ho eena.

₁₀A phetla maholimo,

a theohela fatše,

leru le letšo le le maotong a hae.

₁₁A fofa a palame kerubime,

a hoballa a le mapheong a moea.

₁₂Lefifi a le etsa lesira la hae,

maru a matšo, a lusang pula,

'ona a a etsa tente ea hae.

₁₃Maru a apoloa ke khanya

e mo etellang pele,

ha na sefako sa mashala a tukang.

₁₄Morena a thoathoaretsa,

a thoathoaretsa a le maholimong,

Ea Holimo-limo

a utloahatsa lentsoe la hae.

₁₅A fula ka metsu ea hae,

lira tsa qhalana,

a betsa mahalima,

'me tsa phasaphasa.

₁₆Maliba a maoatle

a bonahala tlase-tlase,

methèo ea lefatše

ea phetleha

ha ho omana uena Morena,

ha ho fōka moea

o tsoang ka nkong tsa hao.

₁₇“Morena a 'nanabela a le holimo,

a 'nanabela, a ntšoara,

a nkinola metsing a leoatle.

₁₈A 'namolela

sereng sa ka se matla,

ho ba ntlhoileng,

ba neng ba mphekisa.

₁₉Ba mphutuhela mohla tlokotsi ea ka,

empa Morena a nthusetsa.

₂₀A nkisa bakeng se batsi,

a ntokolla hobane a nthata.

₂₁“Morena o mputsitse

ho ea ka ho loka ha ka,

o mpuselelitse

ho ea ka ho hloka molato ha ka.

₂₂Ke tiiselitse tseleng ea Morena,

ha kea etsa bokhopo,

ka arohana le Molimo oa ka.

₂₃Ke falimehetse

likahlōlo tsa hae tsohle,

ha kea qhelela

taelo tsa hae kathōko.

₂₄Mahlong a hae ha ke na koli,

ke ipōlokile ke se na molato.

₂₅Morena o mputsitse

ho ea ka ho loka ha ka,

hobane oa bona

hore ke hloekile.

₂₆“Ho ea tšepahalang, ua tšepahala;

ho ea se nang koli, o hloka koli.

₂₇Ho ba hloekileng, u hloekile,

empa ho molotsana u masene.

₂₈Ke uena ea pholosang

sechaba se hlōphehileng,

empa u kokobetsa baikhōhōmosi.

₂₉Morena, ke uena lebone la ka,

Morena o bonesa lefifi la ka.

₃₀Ka thuso ea hae

ke thula lira tsa ka,

ka thuso ea Molimo oa ka

nka tlōla lerako.

₃₁“Tsela tsa Molimo li phethehile,

tšepiso tsa Molimo ke tsa 'nete,

eena ke thèbè ea bohle

ba tšabelang ho eena.

₃₂Molimo ke mang,

haese Morena?

Lefika ke mang,

haese Molimo oa rōna?

₃₃Ke eena Molimo ea 'matlafatsang,

ea ntsamaisang tseleng e ntle.

₃₄O potlakisa maoto a ka

joaloka a khama,

o mpea holim'a lihlaba.

₃₅O nthuta ho loana,

o nthuta

le ho hula seqha sa lethose.

₃₆U 'neile thèbè ea hao e pholosang,

paballo ea hao ea nkhōlisa.

₃₇U ntlhèkèla tsela e batsi,

maoto a ka ha a thelle.

₃₈“Ke lelekisitse lira tsa ka,

ka ba ka li tšoara,

ha kea ka ka khutla

ke e-s'o li timetse.

₃₉Ke li hlathile,

hoo li ke keng tsa tsoha,

e, li oetse tlas'a maoto a ka.

₄₀U 'matlafaletsa ntoa,

ba ntoantšang u ba bea tlas'a ka.

₄₁U etsa hore lira tsa ka

li ntšupe ka lirethe,

ba ntlhoileng kea ba timetsa.

₄₂Ba llela thuso,

ba hloka mopholosi,

ba llela Morena,

ha a ba arabe.

₄₃Ke ba thumisa joaloka lerōle,

joaloka lerōle la lefatše,

ka ba hatakela joaloka seretse,

joaloka seretse se tseleng.

₄₄“U 'namoletse

meferefereng ea sechaba,

ua nketsa 'musi oa lichaba,

lichaba lia ntšebeletsa,

lichaba tseo ke neng ke sa li tsebe.

₄₅Hang ha li nkutloa, lia 'mamela,

li ipea tlas'a puso ea ka

ha li mpona.

₄₆Lichaba li khathala matla,

li tsoa li thōthōmela

qhobosheaneng tsa tsona.

₄₇“Morena oa phela!

Ho bokoe Lefika la ka!

Molimo, Mopholosi oa ka,

a ke a thōhōletsoe!

₄₈Molimo ea ntšitsang ka liphetetso,

ea beang lichaba tlas'a ka,

₄₉ea 'namolelang lireng tsa ka,

ea mphahamisetsang kaholimo,

kaholimo ho ba ntoantšang,

o 'namolela

liatleng tsa ba sehlōhō.

₅₀“Ka baka leo,

ke tla u boka har'a lichaba,

ke roke lebitso la hao, Morena.

₅₁Uena ea neang khosi ea hao,

ea e neang tlhōlo e kholo,

ea bontšang mohau

ho motlotsuoa oa hao,

ho Davida le litlōhōlō tsa hae

kamehla le mehla.”