Molaetsa oa Nathane ho Davida
1Morena a rōmela Nathane ho Davida. Nathane a fihla ho eena, a re: “Motseng o mong ho ne ho e-na le banna ba babeli, e mong a ruile, e mong a futsanehile. 2Morui o ne a e-na le mehlape-hlape ea likhutšoane le ea likhomo; 3athe mofutsana eena o ne a se na letho, haese konyanyana e le 'ngoe feela, e tšehali, eo a neng a e rekile, a e hlokometse haholo. E ne e hōlela ha hae le bana ba hae, e e-ja lijo tsa hae, e noella senoelong sa hae, a e sika sefubeng sa hae joalokaha eka ke morali oa hae.
4“Ha fihla moeti ha monna oa morui. Morui enoa a ba lekhōnatha ho nka phoofolo mohlapeng oa hae oa likhutšoane, kapa mohlapeng oa hae oa likhomo, ho hlabela moeti enoa oa hae. Empa a nka konyana ea sethole ea mofutsana, 'me a e hlabela moeti ea chaketseng ha hae.”
5Khalefo ea Davida ea tlōkōmela monna enoa oa morui, a re ho Nathane: “Ke hlapanya ka Morena ea phelang, monna enoa ea entseng ntho ena o lokeloa ke ho bolaoa; 6a be a lefe konyana eo ka tse 'ne, hobane a hlokile mohau, a entse ntho ena e mpe.”
Kotlo ea Davida
7Nathane a re ho Davida: “Monna eo ke uena. Morena Molimo oa Iseraele, o bua tjena: ‘Ke u tlotselitse hore u be khosi ea Iseraele, ke u lopolotse matsohong a Saule. 8Ke u neile morali oa mong'a hao, le basali ba mong'a hao ke u neile bona. Ke u neile 'muso oa Iseraele, le 'muso oa Juda. Hoja tseo li ne li fokola, nkabe ke u ekelelitse le ho feta moo. 9Joale ke ka baka la'ng u nyelisitseng lentsoe la Morena, hore ebe u entse ntho e fahlang Morena? U bolaile Uriea oa Mohete ka sabole, ua inkela mosali oa hae hore e be mosali oa hao, monna oa hae u 'molaile ka sabole ea Baamone. 10Ka baka leo, sabole e tla bolaea ba lelapa la hao kamehla eohle, hobane u 'nyelisitse, ua inkela mosali oa Uriea oa Mohete, hore e be mosali oa hao.’
11“Morena o bua tjena: ‘Bona, ke tla u hlahisetsa bobe kahare ho ntlo ea hao. Ke tla nka basali ba hao moo u ntseng u bona, ke ba nee ea ahisaneng le uena, 'me eo o tla robala le bona letsatsi le chabile. 12Hoo u ho entseng u ho entse ka lekunutu, empa 'na ntho ena ke tla e etsa moo Baiseraele bohle ba ntseng ba bona tsatsi le chabile.’ ”
Davida oa inyatsa
13Davida a re ho Nathane: “Ke sitetsoe Morena.”
Eaba Nathane o re ho Davida: “Le Morena o hlakotse sebe sa hao; ha u na ho shoa. 14Leha ho le joalo, ka lebaka la hobane u nyelisitse Morena ka ho etsa ntho ena, ngoana enoa eo u tla mo tsoalloa, eena o tla shoa.” 15Eaba Nathane o ikela tlung ea hae.
Mora oa Davida oa shoa
Morena a otla ngoana eo mosali oa Uriea a ileng a mo tsoalla Davida. Ngoana eo a kula haholo. 16Davida a rapella ngoana eo ho Molimo, a itima lijo. Bosiu, ha a robala, o ne a robala fatše. 17Baholo ba ntlo ea hae ba ne ba ee ba tle, ba eme pel'a hae, hore ba mo phahamise fatše. Empa a se ke a phahama, le ho ja le bona a se ke a e-ja.
18Ka letsatsi la bosupa ngoana a shoa. Bahlanka ba Davida ba tšaba ho 'molella hore ngoana o shoele, hobane ba ne ba re: “Bonang, ha ngoana a ne a sa phela, re ne re ee re bue le eena, ebe ha a re mamele. Ekaba joale re tla 'molella joang hore ngoana o shoele? A ka tšoha a intša kotsi!”
19Empa Davida a elelloa hore bahlanka ba hae ba ntse ba hoesheletsana, 'me a utloisisa hore ngoana o shoele. Eaba Davida o re ho bahlanka ba hae: “Na ngoana o shoele?”
Ba re: “E, o shoele.”
20Davida a phahama fatše, a itlhatsoa, a itlotsa, a apara liaparo lisele, a ea tlung ea Morena, 'me a rapela. Joale a khutlela tlung ea hae, a kōpa lijo, ba mo ngoathela, a ja.
21Joale bahlanka ba hae ba re ho eena: “Ke ntho 'ngoe ee eo u e entseng? Ha ngoana a sa phela u ile ua itima lijo, ua lla, empa joale ha ngoana a shoele ua phahama, 'me ua ja.”
22Davida a re ho bona: “Ha ngoana a ne a sa phela ke ile ka itima lijo, ka lla, hobane ke ne ke re: ‘Ke mang ea tsebang haeba mohlomong Morena a ka tšoha a nkhauhela, 'me ngoana a phela?’ 23Empa joale ngoana o shoele; nka itima lijo ka lebaka lefe? Na nka boela ka mo khutlisa? Ke 'na ea tla ea ho eena, empa eena a ke ke a tla ho 'na.”
Tsoalo ea Solomone
24Davida a tšelisa mosali oa hae Batesheba. A kena likobong tsa hae, a robala le eena. Batesheba a tsoala mora, 'me Davida a mo rea lebitso la Solomone. Morena a rata Solomone. 25Morena a rōma moporofeta Nathane, hore a e'o mo reela ngoana eo lebitso la Jedideea.
Davida o hapa Raba
26Joabe a futuhela Raba, motse oa Baamone oa bokhosi, 'me a o hapa. 27Eaba o rōma maqōsa ho Davida, o re: “Ke futuhetse motse oa Raba, ke hapile le liliba tsa oona. 28Ka baka leo he, khōbōkanya bahlabani ba setseng, u tl'o etsetsa motse ona thibella, u o hape, esere 'na ka o hapa, 'me oa reelloa ka 'na.”
29Eaba Davida o khōbōkanya bahlabani bohle, o ea Raba, oa e futuhela, oa e hapa. 30A rōlisa khosi ea motse oo mofapahlooho oa eona oa khauta, oo boima ba oona e neng e ka ba likilo tse mashome a mararo a metso e mehlano. O ne o khabisitsoe ka lehakoe la bohlokoa, 'me Davida a ithoesa oona. Davida a tsoa motseng oo a haharile khapo e ngata. 31A hapa le baahi ba motse oo. A ba sebelisa ka lisakha, le ka lipeke, le ka lilepe; a ba sebelisa le libōping tse besang setene. Metse eohle ea Baamone o ne a ee a e etse tjena. Eaba Davida o khutlela Jerusalema le bahlabani bohle.
