Davida o bēhèloa lefu la Saule
1Kamora' lefu la Saule, ha Davida a tsoa hlōla Baamaleke, a qeta matsatsi a mabeli Sikelage. 2Ka letsatsi la boraro a bona ho fihla monna ea tsoang liahelong tsa Saule tsa ntoa, liaparo tsa hae li harasoane, hloohong a itšetse ka mobu. Eare ha a fihla ho Davida a itihela fatše ho isa hlompho.
3Davida a re ho eena: “U tsoa kae?”
Monna eo a re ho Davida: “Ke e mong oa bahlabani ba Baiseraele ea phonyohileng.”
4Davida a re ho eena: “Ho etsahetse'ng? Ak'u mpolelle!”
Eo a re: “Bahlabani ba balehile ntoeng, 'me ba bangata ba bona ba bolailoe. Bo-Saule le mora oa hae Jonathane le bona ba bolailoe.”
5Davida a re ho mohlankana ea 'mēhèlang litaba tsena: “U tseba joang hore bo-Saule le mora oa hae Jonathane ba shoele?”
6Eaba mohlankana ea 'mēhèlang litaba o re: “Ke ile ka oela Saule holim'a thaba ea Gileboa a itšetlehile ka lerumo la hae, 'me ka bona likariki tsa ntoa le bahlabani ba lipere ba mo petelitse habohlōkō. 7Ha a hetla a mpona, eaba oa mpitsa, 'me 'na ka re: ‘Ke 'na enoa!’
8“A re ho 'na: ‘U mang?’
“Eaba ke re ho eena: ‘Ke Moamaleke.’
9“Eena a re ho 'na: ‘Kea u rapela: Tloo koano, u nqetele. Ke tšoeroe ke litlokotsi tsa lefu, le hoja ke sa ntsane ke phefumoloha.’
10“Eaba ke ea ho eena, kea mo qetela, hobane ke ne ke tseba hore ha a e-oa a ke ke a hlola a phela. Ka nka mofapahlooho oo a neng a o roetse, le sepetja se neng se le letsohong la hae, 'me ke li tlisitse mona ho uena, mong'a ka.”
11Eaba Davida o tšoara liaparo tsa hae, oa li tabola. Le banna bohle ba neng ba e-na le eena ba etsa joalo. 12Ba hlomoha, ba lla, ba itima lijo ho fihlela ka phirimana, ka baka la Saule le mora oa hae Jonathane, le sechaba sa Morena, le ntlo ea Iseraele, hobane ba ne ba bolailoe ka sabole.
13Davida a re ho mohlankana ea 'mēhetseng litaba: “U oa hokae?”
Mohlankana a araba, a re: “Ke mora oa monna oa Moamaleke ea jakileng mona.”
14Davida a re ho eena: “Ha ua ka ua utloa u tšaba ho phahamisa letsoho la hao, u bolaea motlotsuoa oa Morena?”
15Davida a bitsa e mong oa bahlankana, a re ho eena: “Tl'u 'molaee!” Eo a mo phehletsa, a shoa.
16Eaba Davida o re ho 'molauoa: “Ke uena ea ipolaileng, hobane u boletse ka molomo oa hao, ua re: ‘Ke bolaile motlotsuoa oa Morena!’ ”
Koli-ea-malla e llelang Saule le Jonathane
17Joale Davida a bina koli-ea-malla ena e llelang Saule le mora oa hae Jonathane. 18E ngotsoe bukeng ea Jashare, 'me Davida o ile a laela hore e rutoe bana ba Juda.
19“Khabane ea hao, uena Iseraele,
e bolaetsoe holim'a thaba tsa hao;
bona kamoo
linatla li oeleng kateng!
20“Le se ke la e bolela Gate,
le se e phatlalatse
terateng tsa Ashekelone,
esere barali ba Bafilesita
ba nyakalla,
barali ba maqai ba lilietsa.
21“Lōna, thaba tsa Gileboa,
le se laloe ke phōka,
la neloa ke pula;
masimo a lōna a fetohe matsoatlare,
hoba thèbè tsa linatla
li silafalitsoe,
thèbè ea Saule ha e sa tla tlotsoa,
ea tlotsoa ka ole!
22Metsu ea Jonathane e ne e nepa,
sabole ea Saule e sa khutle e benya,
li e-noa mali a babolauoa,
li tlola mafura a bahlabani.
23“Saule le Jonathane,
likhabane le baratehi,
ha baa arohana
ha ba phela leha ba shoele;
belo la bona le ne le feta la ntsu,
matla a bona a feta a lekakuba.
24“Lōna, barali ba Iseraele,
llelang Saule!
O le apesitse masela a mafubelu,
a le apesa le mekhabiso,
a hōma aparo tsa lōna
ka mabenyane a khauta.
25“Bona kamoo linatla li oeleng,
li oeleng thekong ea ntoa!
Jonathane o bolailoe,
o bolaetsoe thabeng tsa hao!
26Jonathane, mor'eso,
ke pelo-tlhomohi ka uena,
ho 'na u n'u rateha hakaakang!
Rato la hao ho 'na e n'e le mohlolo,
le la basali lea shaitsa.
27“Bona kamoo
linatla li oeleng kateng!
Kamoo hlomo tsa ntoa
li setseng soalabahla!”
