1Eaba Elisha o re: “Mamela mantsoe a Morena! O bua tjena: ‘Hosasane, ka eona nako ena, mono khorong ea motse oa Samaria, likilo tse tharo tsa phofo e thumisehileng ea koro, li tla be li rekisoa chelete ea silefera e etsang boima ba likeramo tse leshome le motso o mong, le likilo tse tšeletseng tsa phofo ea harese li rekisoe chelete ea silefera e etsang boima ba likeramo tse leshome le motso o mong.’ ”
2Joale lehosana leo khosi e neng e itšetlehile ka lona la araba moporofeta oa Molimo, la re: “Hona ho ke ke ha etsahala, esita leha Morena a ka nesa pula hona joale!”
Elisha a re: “Mamela mona! Hoo u tla ho bona ka mahlo a hao, empa lijo tseo uena u ke ke ua li ja!”
Bahlabani ba Baarame baa baleha
3Ho ne ho e-na le banna ba bane, ba tšoeroeng ke lepera, ba lutse khorong ea motse. Banna bao ba buisana, ba re: “Na re tla lula moo ho fihlela re e-shoa? 4Ha re ka re: ‘Re tla kena ka motseng,’ tlala e teng ka motseng, re tla shoela teng. Le teng ha re lula mona, re tla 'ne re shoe. Ka baka lena tloong, re itahleleng har'a lebōtho la Baarame. Haeba lebōtho leo le ka re pholosa, re tla phela; le teng haeba le re bolaea, re tla 'ne re shoe.”
5Ka shoalane banna bao ba ema, ba ea liahelong tsa Baarame. Ha ba fihla qetheng ea liahelo tsa Baarame, ba fumana ho se na motho. 6Morena o ne a ile a etsa hore lebōtho la Baarame le utloe eka ho na le lerata la likariki tsa ntoa, le lekitikiti la lipere, le molumo oa lebōtho le leholo. Ke ha ba buisana, ba re: “Bonang, khosi ea Iseraele e hirile likhosi tsa Bahete le likhosi tsa Baegepeta ho tla re loantša.” 7Ka baka leo, ha shoalane e tšoara, ba baleha, ba siea litente tsa bona, le lipere tsa bona, le litonki tsa bona hona moo. Liahelo tsa sala li ntse li le joalo, ba baleha hore ba ipholose.
8Ha balepera bana ba fihla qetheng ea liahelo, ba kena ka tenteng e 'ngoe; ba fihla ba e-ja, ba e-noa, ba nka silefera, le khauta, le liaparo, ba tsamaea, ba ea pata lintho tsena. Ba khutlela liahelong hape, ba kena ka tenteng e 'ngoe hape, le teng ba thōtha, ba ea pata.
9Eaba baa buisana, ba re: “Koana ha re etse hantle. Letsatsi lena ke letsatsi la litaba tse monate, empa ha re e-s'o bolelle motho. Haeba re ka lieha ho bolela, bosiu ba ba ba e-sa, re tla hlaheloa ke tsietsi. Ka baka lena, a re eeng, re e'o bolella ba lelapa la khosi.”
10Ke ha ba e-ea, ba fihla ba bitsa molebeli oa motse, ba 'molella, ba re: “Re ile ra fihla liahelong tsa Baarame, ra fumana ho se na motho, ho sa utloahale le lentsoe la motho, empa lipere tsona li ne li ntse li hōlehiloe, le litonki li ntse li hōlehiloe, le litente li setse li le joalo.”
11Molebeli eo a bitsa balebeli ba bang, 'me ba ea bolella lelapa la khosi. 12Khosi ea tsoha har'a bosiu, ea re ho bahlanka ba eona: “Joale ke tla le bolella seo Baarame ba re entseng sona. Baa tseba hore rea lapa; ka baka leo, ba tlohile liahelong tsa bona, ba ea ipata har'a naha, ba re: ‘Etlare ha ba e-tsoa motseng re ba tšoare ba ntse ba phela, ebe re kena motseng.’ ”
13Empa e mong oa bahlanka ba khosi a araba, a re: “E-reng ba bang ba palame lipere tse hlano tsa tseno tse ntseng li setse mona motseng, re ba rōme, ba e'o bona se etsahetseng. Haeba ba ka phela, ba tla tšoana le Baiseraele ba bang ba ntseng ba phela; le teng haeba ba e-shoa, ba tla 'ne ba tšoane le Baiseraele bohle ba seng ba shoele.”
14Eaba ba pana likariki tse peli tsa ntoa, khosi ea ba rōmela lebōthong la Baarame, ea re: “E-eang, le e'o bona.” 15Ba ba sala morao ho ea fihla Jorodane. Ba fumana liaparo, le lijana tseo Baarame ba ileng ba li lahla ha ba baleha, li entse mohoula tseleng. Maqosa a khutla, a fihla a bolella khosi. 16Eaba sechaba se tsoa motseng, se ea hahara tse ka litenteng tsa Baarame. Ka baka lena, likilo tse tharo tsa phofo e thumisehileng ea koro, tsa rekisoa chelete ea silefera e etsang boima ba likeramo tse leshome le motso o mong, le likilo tse tšeletseng tsa phofo ea harese tsa rekisoa chelete ea silefera e etsang boima ba likeramo tse leshome le motso o mong, joalokaha Morena a ne a ile a bolela.
17Khosi e ne e ile ea khetha lehosana leo e neng e itšetlehile letsohong la lona, hore e be molaoli oa khoro ea motse. Joale sechaba sa le hatakella moo khorong, la ba la e-shoa, joalokaha moporofeta oa Molimo a ne a ile a bolela, ha khosi e ne e theohela ho eena. 18Ha fela ha e-ba joalokaha moporofeta oa Molimo a ne a ile a bolella khosi, a re: “Hosasane, ka eona nako ena, mono khorong ea motse oa Samaria, likilo tse tšeletseng tsa phofo ea harese li tla rekoa ka chelete ea silefera e etsang boima ba likeramo tse leshome le motso o mong, le likilo tse tharo tsa phofo e thumisehileng ea koro li rekoe ka chelete ea silefera e etsang boima ba likeramo tse leshome le motso o mong.”
19Empa lehosana leo le ne le ile la araba moporofeta oa Molimo, la re: “Hona ho ke ke ha etsahala, esita leha Morena a ka nesa pula hona joale!” Elisha o ne a ile a re ho lona: “Mamela mona! Hoo u tla ho bona ka mahlo a hao, empa uena lijo tseo u ke ke ua li ja!”
20Hona ha fela ha etsahala ho lehosana lena, hobane sechaba se ile sa le hatakella moo khorong, la ba la e-shoa.
