Ho ntšoa selepe se oetseng metsing
1Sehlopha sa baporofeta sa re ho Elisha: “Bona mona, sebaka seo rōna le uena re phelang ho sona ha se re lekane. 2Rea u kōpa: Ak'u re lumelle re ee Jorodane, 'me motho ka mong a rèmè sefate, re ikhahele moo re tla lula teng.”
Elisha a araba, a re: “E-eang!”
3E mong oa bona a re: “Kea u kōpa: Ak'u ee le bahlanka ba hao.”
Eena a araba, a re: “Ke tla ea.”
4Eaba o ea le bona.
Ha ba fihla Jorodane, ba rèma lifate. 5Empa eare ha e mong a ntse a ratha sefate, selepe sa pshemoha mofenng, sa oela ka metsing. Eo a hōoa, a re: “A 'na eloa, mong'a ka! Selepe sena se ne se alimiloe!”
6Moporofeta oa Molimo a re: “Se oetse hokae?” Eo a 'montša moo se oetseng teng. Elisha a rèma thupa, a e akhela hona moo, 'me selepe sa phaphamala holim'a metsi. 7Eaba Elisha o re: “Se nke!” Monna eo a nanabetsa letsoho, a se nka.
Elisha o senola merero ea Baarame
8Ha khosi ea Arame e ntse e loantšana le Baiseraele, eaba e eletsana le bahlanka ba eona, e re: “Ke tla hloma liahelo tsa ka sebakeng se itseng.”
9Joale moporofeta oa Molimo a ea ho khosi ea Iseraele, a re: “Hlokomela, u se ke ua feta sebakeng se itseng, hobane Baarame ba tla theoha le hona moo.” 10Khosi ea Iseraele ea rōmela molaetsa ho baahi ba sebaka seo, seo moporofeta oa Molimo a 'moleletseng sona, hore ba lule ba itebetse, khosi e tle e pholohe. Hona ho ile ha etsahala ka makhetlo a mangata, e seng hanngoe kapa habeli feela.
11Ka baka lena, ntho ena ea tšoenya khosi ea Arame haholo; eaba e bitsa bahlanka ba eona, e re ho bona: “Mpolelleng hore na ke ofe, har'a rōna, ea ka lehlakoreng la khosi ea Iseraele!”
12E mong oa bahlanka ba khosi, a re: “Ha a eo, mong'a ka, khosi ea ka! Ke Elisha, moporofeta oa Iseraele, ea bolellang khosi ea Iseraele seo u se buang ka lekunutu.”
13Khosi ea re: “Tsamaeang, le e'o batla hore na o hokae, ke tle ke e'o mo tšoara!” Khosi ea bolelloa, ha thoe: “O motseng oa Dotane.”
Bahlabani ba Baarame baa foufatsoa
14Ka baka lena, khosi ea ntša lipere, le likariki tsa ntoa, le lebōtho le leholo. La fihla motseng oo oa Dotane e le bosiu, la o etsetsa sakana-la-nkōpe.
15Ha mohlanka oa moporofeta oa Molimo a tsoha e sa le ka matjeke, a e-tsoa ka tlung, a bona lebōtho la bahlabani ba lipere, le ba likariki, le etselitse motse sakana-la-nkōpe. Mohlanka enoa a re ho moporofeta: “A rōna bale, mong'a ka! Re tla etsa joang?”
16Moporofeta a mo araba, a re: “U se ke ua tšaba. Ba ka lehlakoreng la rōna ba bangata ho feta ba ka lehlakoreng la bona.”
17Eaba Elisha oa rapela, o re: “Morena, kea u rapela: Ak'u tutubolle mahlo a mohlankana enoa, hore a bone.” Morena a tutubolla mahlo a mohlankana eo, a bona thaba eo Elisha a leng ho eona e tletse lipere le likariki tsa ntoa tse tukang malakabe, li pota-potile Elisha.
18Ha Baarame ba seohela Elisha, eaba o rapela Morena, o re: “Kea u rapela: Ak'u foufatse batho bana.” Morena a ba foufatsa ho ea ka thapelo ea Elisha.
19Eaba Elisha o re ho bona: “Tsela ena hase eona, le motse ona hase oona. Ntateleng, 'me ke tla le isa ho motho eo le 'matlang.” Empa a ba isa Samaria.
20Eare ha ba fihla Samaria, Elisha a re: “Morena, foufolla batho bana, ba boele ba bone.” Morena a ba foufolla, ba boela ba bona. Ba iphumana ba se ba le kahar'a Samaria.
21Ha khosi ea Iseraele e ba bona, ea re ho Elisha: “Ntate, ke ba bolaee? Ke ba bolaee?”
22Elisha a araba, a re: “U se ke ua ba bolaea. Na bao u ba thōpileng ka sabole ea hao, le ka seqha sa hao, u ka ba bolaea? Ba fe lijo le metsi, ba je, ba noe, ba nt'o khutlela ho mong'a bona.” 23Khosi ea ba etsetsa mokete o moholo oa lijo. Ha ba se ba jele, ba noele, ea re ba tsamaee, 'me ba khutlela ho mong'a bona. Eaba mara a Arame ha a sa hlola a futuhela naha ea Iseraele.
Samaria e etsetsoa thibella
24Kamora' tsena, Bene-Hadade, khosi ea Arame, a khōbōkanya mabōtho 'ohle a hae, a nyoloha, a fihla a etsetsa Samaria thibella. 25Tlala e kholo ea e-ba teng moo Samaria. Ba thibella Samaria ho fihlela ha hlooho ea tonki e ba e rekisoa silefera e etsang boima ba kilo, 'me moroho o bitsoang masepa a leeba, o etsang boima ba likeramo tse makholo a mabeli, o rekisoa silefera e etsang boima ba likeramo tse mashome a mahlano a metso e mehlano.
26Ka tsatsi le leng ha khosi e ntse e tsamaea holim'a lerako la motse, mosali e mong a e hōoeletsa, a re: “Mong'a ka, khosi ea ka, nthuse hle!”
27Khosi ea re: “Haeba Morena a sa u thuse, 'na nka u thusa ka eng? Ha ke na koro kapa veine!” 28Khosi ea boela ea re ho eena: “U jeoa ke'ng?”
Mosali eo a araba, a re: “Mosali enoa o itse ho 'na: ‘Tlisa ngoana oa hao, re mo je kajeno; hosasane re tla ja oa ka!’ 29Ra fela ra pheha ngoana oa ka, ra mo ja. Ka la hosasane ka re ho eena: ‘Tlisa ngoana oa hao, re mo je;’ empa joale o patile ngoana oa hae.”
30Ha khosi e utloa lipolelo tsa mosali enoa ea hahōla liaparo tsa eona. Ha e ntse e tsamaea holim'a lerako, batho ba talima, 'me ba bona hore khosi e apere seaparo se mahoashe. 31Joale khosi ea re: “Molimo a nketse tjena le tjena, le ho feta mona, haeba hona kajeno nke ke ka khaola hlooho ea Elisha, mora oa Shafate.”
32Empa Elisha o ne a ntse a ituletse ka tlung ea hae, a e-na le baholo ba sechaba. Khosi ea rōma monna ho Elisha, ho e etella pele, empa eare monna eo a e-s'o ka a fihla ho Elisha, eaba Elisha o re ho baholo ba sechaba: “Na le bona kamoo monna eo oa 'molai a rōmetseng motho ho tla khaola hlooho ea ka kateng? Bonang mona: E tle ere ha leqosa leo le fihla, le koale monyako, le le koalle kantle. Na hoo hase liqi tsa mong'a lona, ea ntseng a le setse morao?”
33Eare a sa ntsane a bua le bona, ba bona khosi e se e fihla ho bona, e re: “Bonang, bomalimabe bona re bo tliselitsoe ke Morena! Nka hlola ke sa lebella eng ho Morena?”
