2 LIKHOSI 23

₁Khosi Josiea a rōma maqōsa, ho mo memela baholo bohle ba Juda le ba Jerusalema. ₂Eaba o nyolohela Tempeleng ea Morena, a e-na le banna bohle ba Juda, le baahi bohle ba Jerusalema, le baprista, le baporofeta, le sechaba sohle sa ba baholo le ba banyenyane. Moo ba ntseng ba utloa a ba balla mantsoe 'ohle a Buka ea Selekane, e ileng ea fumanoa ka Tempeleng ea Morena.

₃Khosi ea ema pel'a tšiea, ea nchafatsa selekane kapele ho Morena, e leng sa ho latela Morena, le ho bōlōka litaelo tsa hae, le litemōso tsa hae, le melao ea hae, ka pelo ea eona eohle, le ka moea oa eona oohle, le ho phethisa mantsoe a ngotsoeng bukeng ena. Batho bohle ba itlama ka selekane seo.

₄Khosi Josiea a laela Hilekiea, Moprista e Moholo, le baprista ba mokhetho oa bobeli, le balebeli ba monyako, ho ntšetsa kantle ho Tempele ea Morena, lintho tsohle tse neng li etselitsoe Baale, le Ashera, le letsatsi, le khoeli, le linaleli, ea li chesetsa kantle ho Jerusalema, molatsoaneng oa Kiderone, 'me molora oa tsona oa isoa Bethele. ₅A leleka baprista ba bohata, bao likhosi tsa Juda li ileng tsa ba hlomamisa ho chesa mokubetso libakeng tseo ho rapelloang melimo ea bohata ho tsona, metseng ea Juda, le libakeng tse pota-potileng Jerusalema. A leleka le ba neng ba chesetsa Baale mokubetso ba o chesetsa le letsatsi, le khoeli, le linaleli, e leng tšoeu tsohle tsa leholimo. ₆A ntša setšoantšo sa Ashera ka Tempeleng ea Morena e Jerusalema, a se isa molatsoaneng oa Kiderone, a se chesetsa teng, a se etsa thuèthuè, 'me molora oa sona a o qhalla holim'a mabitla a motse. ₇A heletsa matlo a banna ba khethetsoeng ho etsa bohlola, a neng a le ka Tempeleng ea Morena, e leng moo basali ba neng ba lōhela masela a etsang liaparo tsa Ashera.

₈Khosi Josiea a leleka baprista bohle metseng ea Juda, a silafatsa libaka tseo ho rapelloang melimo ea bohata ho tsona, moo baprista bao ba neng ba chesetsa mokubetso teng, e leng ho tloha Geba ho ea fihla Beeresheba. A heletsa libaka tsa borapeli tse likhorong tsa metse eo, e leng monyakong oa Khoro ea Joshua, mookameli oa motse, e neng e le ka letsohong le letšehali la khoro ea motse. ₉Leha ho le joalo, baprista ba libaka tseo ho rapelloang melimo ea bohata ho tsona, ha baa ka baa atamela aletare ea Morena e Jerusalema, empa ba 'na ba e-ja bohobe bo sa lomosoang, 'moho le baprista ba bang.

₁₀A silafatsa Tofete e ka khohlong ea bana ba Hinome, e le hore ho se be motho ea ka etsetsang Moloke sehlabelo sa secheso ka mora kapa ka morali oa hae. ₁₁A tlosa lipere tseo likhosi tsa Juda li neng li li abetse letsatsi, tse neng li le monyako oa Tempele ea Morena, pel'a kamore ea Nathane-Meleke oa lehaole, mohlanka oa khosi. Kamore ena e ne e le lebaleng la Tempele. Khosi ea chesa likariki tsa ntoa, tse neng li etselitsoe letsatsi.

₁₂Lialetare tse neng li le holim'a marulelo a ntlo e kaholimo, ea Akase, tse neng li hahiloe ke likhosi tsa Juda, le lialetare tseo Manase a neng a li hahile mabaleng a mabeli a Tempele ea Morena, khosi ea li heletsa, ea li thua, ea lahlela kumōkumō ea tsona ka molatsoaneng oa Kiderone. ₁₃Libaka tseo ho rapelloang melimo ea bohata ho tsona, tse neng li le pel'a Jerusalema, ka letsohong le letona ho Thaba ea Tšenyeho, tseo Solomone, khosi ea Iseraele, a neng a li hahetse Asetarote, manyala a Basidone; le Kemoshe, manyala a Bamoabe; le Milekome, manyala a bana ba Amone; tsena tsohle ea li silafatsa. ₁₄A thua lifika tseo ba li khumamelang, a liha litšoantšo tsa Ashera, 'me moo li neng li le hona teng a qhalla masapo a batho.

₁₅Le aletare e neng e le Bethele, le sebaka seo ho rapelloang melimo ea bohata ho sona, se neng se hahoe ke Jeroboame, mora oa Nebate, ea neng a etse hore Baiseraele ba etse sebe, le eona, hammoho le sebaka seo sa borapeli, a li thua, a chesa sebaka seo ho rapelloang melimo ea bohata ho sona, a se etsa thuèthuè; a chesa le litšoantšo tsa Ashera.

₁₆Eitse ha Josiea a reteleha, a bona mabitla mosikong oa thaba, 'me a rōma maqosa hore a e'o epōlla masapo ka mabitleng ao. Masapo ao a a chesetsa holim'a aletare, a e silafatsa, ho ea ka lentsoe la Morena, leo moporofeta oa Molimo a neng a ile a le bolela ha a phatlalatsa lintho tsena.

₁₇Joale Josiea a re: “Ke lebitla la mang leo, leo ke le bonang?”

Banna ba motse ba 'molella, ba re: “Ke lebitla la moporofeta oa Molimo, ea neng a e-tsoa Juda, 'me a bolela lintho tsena tseo uena u li entseng ka aletare ea Bethele.”

₁₈Eaba Josiea o re: “Mo tloheleng, ho se be motho ea epōllang masapo a hae.” Kahoo ba tlohela masapo a hae, le masapo a moporofeta ea neng a e-tsoa Samaria.

₁₉Le litempelana tse neng li le libakeng tseo ho rapelloang melimo ea bohata ho tsona, tseo likhosi tsa Iseraele li neng li halefise Morena ka ho li haha metseng ea Samaria, Josiea a li heletsa, a li etsa seo a ileng a se etsa Bethele. ₂₀Baprista bohle ba libaka tseo ho rapelloang melimo ea bohata ho tsona, ba neng ba le moo, a ba bolaela holim'a lialetare tseo, a chesetsa le masapo a batho holim'a tsona, a nt'o khutlela Jerusalema.

₂₁Khosi Josiea a laela sechaba sohle, a re: “Etsang mokete oa Paseka ea Morena Molimo oa lōna, joalokaha ho ngotsoe Bukeng ena ea Selekane.” ₂₂Ruri ho ne ho e-s'o ka ho etsoa mokete oa Paseka o joalo, ho tloha mehleng ea Baahlōli ba neng ba ahlōlela Baiseraele; esita le mehleng ea likhosi tsa Iseraele, kapa mehleng ea likhosi tsa Juda. ₂₃Empa ka selemo sa leshome le metso e robeli, sa puso ea khosi Josiea, Morena a etsetsoa Paseka e joalo, Jerusalema.

₂₄Kaholim'a mona, linohe, le baloi, le melingoana ea malapa, le melimo ea bohata, le lintho tsohle tse nyonyehang, tse neng li le teng naheng ea Juda le Jerusalema, Josiea a li felisa, e le hore a phethahatse mantsoe a Molao, a neng a ngotsoe bukeng eo Hilekiea a ileng a e fumana ka Tempeleng ea Morena. ₂₅Pele ho eena ho ne ho e-s'o ka ho e-ba le khosi e kileng ea sebeletsa Morena joaloka eena. A sebeletsa Morena ka pelo ea hae eohle, le ka moea oa hae 'ohle, le ka matla a hae 'ohle, ho ea ka Molao oohle oa Moshe. Le ho bahlahlami ba hae ha hoa ka ha e-ba le ea kang eena.

₂₆Leha ho le joalo, Morena ha aa ka a khutla khalefong ea hae e tšabehang, eo a neng a halefetse Juda ka eona, ka baka la mekhoa eohle eo Manase a ileng a mo phephetsa ka eona. ₂₇Morena a re: “Ke tla hleka Juda kapele ho sefahleho sa ka, joalokaha ke ile ka hleka Iseraele, le motse ona oa Jerusalema, oo ke o khethileng, ka re: ‘Ke tla khumamelloa ho oona,’ le oona ke tla o lahla.”

₂₈Liketso tse ling tsa Josiea, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda.

₂₉Mehleng ea Josiea, Faro Neko, khosi ea Egepeta, a nyolohela nōkeng ea Euferatese ho ea thusa khosi ea Asiria. Eaba khosi Josiea oa mo khaoletsa. Ba kopana Megido, 'me Josiea a bolaeloa hona moo. ₃₀Bahlanka ba hae ba nka setōpō sa hae Megido, ka kariki ea ntoa, ba se isa Jerusalema, ba se epela lebitleng la hae. Sechaba sa naha eo sa tlotsa Jehōoakase, mora oa hae, sa 'mea hore e be khosi, a hlahlame ntat'ae.

₃₁Jehōoakase o ne a e-na le lilemo tse mashome a mabeli a metso e meraro, ha a qala ho busa. A busa ka likhoeli tse tharo, a le Jerusalema. Lebitso la 'm'ae e ne e le Hamutale, morali oa Jeremia, ea tsoang motseng oa Lebena. ₃₂Jehōoakase a etsa bobe mahlong a Morena, ka ho etsa tsohle tseo bo-ntat'ae-moholo ba neng ba li etse. ₃₃Empa Faro Neko a mo kenya chankaneng Ribela, naheng ea Hamate, e le hore a se ke a busa Jerusalema. A ntšisa naha eo lekhetho la silefera e boima ba likilo tse likete tse tharo le makholo a mane, le khauta e boima ba likilo tse mashome a mararo a metso e mene. ₃₄Faro Neko a bea Eliakime, mora oa Josiea, hore a hlahlame ntat'ae. A mo rea lebitso la Jehoeakime. A isa Jehōoakase naheng ea Egepeta, moo a ileng a shoela teng.

₃₅Jehoeakime a thèlla Faro ka silefera le ka khauta, 'me a khethisa sechaba ho ea kamoo Faro a neng a laetse hore se ntše lekhetho kateng. A pēpēta sechaba sa naha eo silefera le khauta, ho ea kamoo motho ka mong a lekanyelitsoeng kateng, hore e tle e neoe Faro Neko. ₃₆Jehoeakime o ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse leshome le motso o mong, a le Jerusalema. Lebitso la 'm'ae e ne e le Sebuda, morali oa Pedaea, ea tsoang motseng oa Ruma. ₃₇Jehoeakime a etsa bobe mahlong a Morena, ka ho etsa tsohle tseo bo-ntat'ae-moholo ba neng ba li etse.