Elia o nkeloa leholimong
1Mohla Morena a tla nkela Elia leholimong ka setsokotsane, Elia o ne a ntse a tsamaea le Elisha, ba e-tsoa Gilegale. 2Eaba Elia o re ho Elisha: “Kea u rapela: Sala mona, hobane Morena o nthōmile Bethele.”
Empa Elisha a re ho eena: “Ke hlapanya ka Morena ea phelang, le ka uena, hore nke ke ka khaohana le uena.” Kahoo ba theohela Bethele.
3Sehlopha sa baporofeta, se neng se le moo Bethele, sa khahlanyetsa Elisha, sa re ho eena: “Na ua tseba hore hona kajeno Morena o tla u amoha mong'a hao?”
Elisha a re ho bona: “E, kea tseba. Khutsang!”
4Elia a re ho Elisha: “Elisha, sala mona, kea u rapela, hobane Morena o nthōmile Jeriko.”
Empa Elisha a re: “Ke hlapanya ka Morena ea phelang, le ka uena, hore nke ke ka khaohana le uena.” Eaba ba ea Jeriko.
5Sehlopha sa baporofeta, se neng se le moo Jeriko, sa khahlanyetsa Elisha, sa re ho eena: “Na ua tseba hore hona kajeno Morena o tla u amoha mong'a hao?”
Elisha a re ho bona: “E, kea tseba. Khutsang!”
6Eaba Elia o re ho Elisha: “Kea u rapela: Sala mona, hobane Morena o nthōmile Jorodane.”
Elisha a re: “Ke hlapanya ka Morena ea phelang, le ka uena, hore nke ke ka khaohana le uena.” Ba tsoela pele bobeli ba bona.
7Banna ba mashome a mahlano, ba sehlopha sa baporofeta, ba ema sebakana, ba talima ha ba babeli bao ba empa pel'a Jorodane. 8Elia a hlōbōla seaparo sa hae, a se phutha, 'me a phutla metsi ka sona. Metsi a arohana, 'me bobeli ba bona ba tšela mobung o ommeng.
Elisha o hlahlama Elia
9Ha ba se ba tšetse, Elia a re ho Elisha: “Kōpa seo u ratang hore ke u etsetse sona ke e-s'o tlosoe ho uena.”
Elisha a re: “Kea u rapela: Ak'u 'nee karolo ea matla a hao, ke tle ke be mohlanka oa hao.” 10Elia a re ho eena: “U kōpile ntho e thata. Leha ho le joalo, haeba u ka mpona ha ke tlosoa ho uena, kōpo ea hao e tla phethahatsoa empa haeba u ke ke ua mpona, e ke ke ea phethahala.” 11Eare ha ba ntse ba tsamaea, ba buisana, ba bona ho hlaha kariki ea ntoa e tukang malakabe, e huloang ke lipere tse tukang malakabe, ea fihla ea kena pakeng tsa bona. Elia a nyolleloa leholimong ka setsokotsane. 12Ha Elisha a bona hona a hōoeletsa, a re: “Ntate! Ntate! Uena mohlabaneli le thèbè ea Iseraele!” Eare ha a se a sa 'mone, a tšoara liaparo tsa hae, a li tabola ka lehare.
13Elisha a nka seaparo sa Elia, se ileng sa oa, eaba oa khutla, o fihla a ema holim'a lebōpo la Jorodane. 14A nka sona seaparo seo sa Elia, se ileng sa oa, a phutla metsi ka sona, a re: “O hokae Morena Molimo oa Elia?” Elisha le eena ha a phutla metsi, metsi ao a arohana, 'me a tšela.
15Ha sehlopha sane sa baporofeta ba neng ba lula Jeriko, ba neng ba ntse ba mo shebile, ba bona hoo, ba re: “Matla a Elia a theohetse holim'a Elisha.” Ba tla ho mo khahlanyetsa, ba obamela fatše kapele ho eena. 16Ba re ho eena: “Bona mona, rōna bahlanka ba hao re na le banna ba mashome a mahlano ba linatla. Rea u rapela: Ak'u ba lumelle ba e'o batla mong'a hao. Mohlomong Moea oa Molimo o ile oa mo nkela holimo, oa ea mo lahlela holim'a thaba e 'ngoe, kapa kahar'a khohlo e 'ngoe.”
Empa Elisha a re ho bona: “Le se ke la ba rōma!”
17Ha ba ntse ba mo qopheletse, ho fihlela a be a hlajoa ke lihlong, a re: “Ba rōmeng!” Ka lebaka leo, ba rōma banna ba mashome a mahlano. Ba 'matla ka matsatsi a mararo, empa ba se ke ba mo fumana. 18Ha ba boetse ba khutlela ho Elisha, ea neng a ntse a setse Jeriko, a re ho bona: “Na ha kea ka ka re ho lōna: ‘Se keng la ea’?”
Elisha o ngaka metsi
19Banna ba motse oa Jeriko ba re ho Elisha: “Joalokaha le uena, mong'a rōna, u bona, motse ona o lutse botleng, empa metsi a oona a mabe, le naha ena ke letsoatlare.”
20Elisha a re ho bona: “Ntlisetseng sekotlolo se secha, le tšèlè letsoai ka ho sona.” Ba mo tlisetsa sona.
21A ea mohloling oa seliba, a tšèla letsoai ka ho oona, a re: “Morena o bua tjena: ‘Ke ngakile metsi ana. Ho tloha joale a ke ke a hlola a bolaea, kapa a etsa hore naha e be letsoatlare.’ ” 22Ho ea ka polelo eo Elisha a neng a e bue, metsi ao haesale a ngakeha ho fihlela kajeno-ea-bokajeno.
Moporofeta o rōhaka bashanyana
23Ho tloha moo Elisha a nyolohela Bethele. Ha a ntse a nyoloha ka tsela, bashanyana ba tsoang motseng ba mo soma, ba re ho eena: “Nyoloha, ralefatla tooe! Nyoloha, ralefatla tooe!” 24A reteleha, a ba talima, a ba rōhaka ka lebitso la Morena. Libèrè tse peli tse tšehali, tsa tsoa morung, tsa harola ba mashome a mane a metso e 'meli ba bashanyana bao. 25Ho tloha mo a ea thabeng ea Karamele, 'me ha a tloha teng a khutlela Samaria.
