Puso ea Hesekiea, khosi ea Juda
1Hesekiea, mora oa Akase, khosi ea Juda, o ne a qale ho busa ka selemo sa boraro sa puso ea Hoshea, mora oa Ela, khosi ea Iseraele. 2O ne a e-na le lilemo tse mashome a mabeli a metso e mehlano ha a qala ho busa, 'me a busa ka lilemo tse mashome a mabeli a metso e robong, a le Jerusalema. Lebitso la 'm'ae e ne e le Abi, morali oa Sakariea. 3Hesekiea a etsa tse lokileng mahlong a Morena, joalokaha Davida, ntat'ae-moholo, a ne a ile a etsa.
4A felisa libaka tseo ho rapelloang melimo ea bohata ho tsona, a pshatla lifika tseo ba li khumamelang, a rathaka le litšoantšo tsa Ashera. A pshatla le nōha ea lethose e neng e etsoe ke Moshe, a e etsa mokungoane, hobane ho fihlela mohlang oo, sechaba sa Iseraele se ne se chesetsa nōha eo mokubetso. Nōha eo e ne e reiloe lebitso la Nehushetane. 5Hesekiea a tšepa Morena Molimo oa Iseraele. Har'a likhosi tsa Juda tse ileng tsa mo hlahlama, esita le tse bileng teng pele ho eena, ha hoa ka ha e-ba le khosi le e 'ngoe e kileng ea tšoana le eena. 6O ne a khomaretse Morena, a sa phetse ho mo latela. A bōlōka melao eo Morena a neng a e laetse Moshe. 7Morena a ba le Hesekiea, 'me a atleha ho tsohle tseo a neng a li etsa. Eaba Hesekiea o fetohela khosi ea Asiria, o hana ho e sebeletsa. 8A hlōla Bafilesita ho ea fihla Gasa, a hapa metse le metsana eohle ea eona.
9Ka selemo sa bone sa puso ea khosi Hesekiea, seo e neng e le sa bosupa sa puso ea Hoshea, mora oa Ela, khosi ea Iseraele, Salemanesere, khosi ea Asiria, a futuhela Samaria, a e etsetsa thibella. 10Kamora' lilemo tse tharo a e hapa. Samaria ea hapuoa ka selemo sa botšelela sa puso ea Hesekiea, e leng sa borobong sa puso ea Hoshea, khosi ea Iseraele. 11Khosi ea Asiria ea thōpa Baiseraele, ea ba isa naheng ea Asiria. Ea ba bea Hala, le pel'a nōka ea Habore, e Gosane; ea ba bea le metseng ea Bamede. 12Tsena li ile tsa etsahala hobane Baiseraele ba ne ba sa ka ba mamela lentsoe la Morena Molimo oa bona. Ba ne ile ba roba selekane sa Morena; le tsohle tseo Moshe, mohlanka oa Morena, a neng a ba laetse tsona ba ne ba sa ka ba li mamela, leha e le ho li phetha.
Baasiria ba sokela baahi ba Jerusalema
13Ka selemo sa leshome le metso e mene sa puso ea khosi Hesekiea, Saneheribe, khosi ea Asiria, a futuhela metse eohle ea Juda, e neng e hahelelitsoe, 'me a e hapa. 14Hesekiea, khosi ea Juda, a rōmela molaetsa Lakishe, ho khosi ea Asiria, a re: “Ke sitiloe; kea u kōpa: Ak'u khaotse ho mphutuhela, 'me ke tla ntša lekhetho leo u le batlang.” Khosi ea Asiria ea re ho khosi ea Juda e ntše lekhetho la silefera e boima ba likilo tse likete tse leshome, le khauta e boima ba likilo tse sekete. 15Hesekiea a mo nea silefera eohle e neng e le ka Tempeleng ea Morena, le e neng e le ka letlōleng la ntlo ea khosi.
16Ka eona nako eo, Hesekiea, khosi ea Juda, a manolla khauta eo a neng a e manehile mamating a Tempele ea Morena, le holim'a likosene, a e rōmela ho khosi ea Asiria.
17Joale khosi ea Asiria ea rōmela lebōtho le leholo, le tlohang Lakishe, ho ea futuhela khosi Hesekiea, a le Jerusalema. Lebōtho leo le ne le tsoile le mookameli oa balaoli, le molaoli oa mabōtho, le molaoli oa ntoa. Ba nyolohela Jerusalema, ba fihla ba emisa moseleng oa letšana le kaholimo, pel'a 'mila o eang setšeng sa Mohlatsoi oa Masela. 18Eare hoba ba bitse khosi, ha tla ho bona Eliakime, mora oa Hilekiea, eo e neng e le mookameli oa lelapa la khosi, le Shebena, eo e neng e le mongoli oa lekhotla, le Jōoa, mora oa Asafo, eo e neng e le mongoli oa liketsahalo.
19Molaoli oa ntoa a re ho bona: “Bolellang Hesekiea, le re ho eena: ‘Khosi e kholo, khosi ea Asiria, e bua tjena, e re: Ntšepeli-ea-ntšèpè, eo u nang le eona khotolieeng, ke efe? 20U re u na le boeletsi le bonatla ntoeng, empa polelo ena ke ea molomo feela. Ebe u tšepile mang, ha u mphetohetse tjee? 21Bona mona, u tšepile Egepeta, e leng lere la lehlaka le pèpèraneng, le hlabang seatla sa motho ea itšetlehang ka lona. Faro, khosi ea Egepeta, o joalo ho bohle ba mo tšepileng. 22Empa haeba u re ho 'na: Re tšepile Morena Molimo oa rōna, na hase eena eo Hesekiea a helelitseng libaka tsa hae tsa borapeli, le lialetare tsa hae, a ba a re ho baahi ba Juda le ho ba Jerusalema: Le tla rapella kapele ho aletare ee, le le Jerusalema?
23“ ‘Ka baka leo, ke u tsoela khomo: Etsa litumellano le mong'a ka, khosi ea Asiria, 'me ke tla u nea lipere tse likete tse peli, haeba u na le ba ka li palamang. 24Haeba u tšepile hore Egepeta e tla u nea likariki tsa ntoa le bapalami, ebe u ka tseba ho phekhōla molaoli leha a le mong feela oa bahlanka ba eisehang ba mong'a ka? 25Na ke futuhetse naha ee, ho tla e timetsa, e se ka taelo ea Morena? Morena o ile a re ho 'na: Futuhela naha ena, u e timetse!’ ”
26Joale bo-Eliakime, mora oa Hilekiea, le Shebena, le Jōoa, ba re ho molaoli oa ntoa: “Rea u kōpa: Ak'u bue Searame le bahlanka ba hao, hobane rea se tseba. U se ke ua bua Seheberu moo batho bana ba lerakong ba ntseng ba utloa.”
27Empa molaoli oa ntoa a re ho bona: “Na mong'a ka o nthōmme ho mong'a lōna, le ho lōna feela, ho tla bua mantsoe aa? Che, o nthōmme le ho banna bano ba lutseng holim'a lerako, ba tla ja masepa a bona, ba noe le morōto oa bona, joalokaha le lōna le tla etsa joalo.”
28Eaba molaoli oa ntoa oa ema, o hōoeletsa haholo ka puo ea Seheberu, o re: “Mamelang polelo ea khosi e kholo, khosi ea Asiria! 29Khosi e bua tjena: ‘Le se ke la thetsoa ke Hesekiea, hobane a ke ke a le pholosa matsohong a ka. 30Le se ke la lumela ha Hesekiea a re le tšepe Morena, a re: Morena o tla fela a re namolele, le motse ona o ke ke oa neoa khosi ea Asiria.’
31“Le se ke la mamela Hesekiea, hobane khosi ea Asiria e bua tjena: ‘Etsang selekane le 'na, le ineele, ebe le tla ho 'na. Motho ka mong o tla ja morara oa hae, motho ka mong a je feiee ea hae, motho ka mong a noe le metsi a seliba sa hae, 32ho fihlela ke le isa naheng e kang ea lōna, e leng naha e nang le koro le veine e ncha; naha e nang le lijo le masimo a morara; naha e nang le ole ea mohloaare le mahe a linotši, hore le tle le phele, le se ke la shoa.
“ ‘Le se ke la mamela Hesekiea ha a ntse a le thetsa, a re: Morena o tla re namolela! 33Har'a melimo ea lichaba tsee, na o teng o kileng oa lopolla naha ea oona matsohong a khosi ea Asiria? 34E kae melimo ea Hamate le ea Arepade? E kae melimo ea Safarafaime, le Hena, le Ifa? Na e namoletse Samaria matsohong a ka? 35Ke molimo ofe, har'a melimo ea linaha tsee, o kileng oa lopolla naha ea oona matsohong a ka, hoo joale le hopolang hore Morena o tla lopolla Jerusalema matsohong a ka?’ ”
36Empa sechaba sa khutsa tu! sa se ke sa mo araba, hobane taelo ea khosi e ne e itse: “Le se ke la mo araba!”
37Joale bo-Eliakime, mora oa Hilekiea, eo e neng e le mookameli oa lelapa la khosi, le Shebena, eo e neng e le mongoli oa lekhotla, le Jōoa, mora oa Asafo, eo e neng e le mongoli oa liketsahalo, ba fihla ho Hesekiea, ba hahotse liaparo tsa bona, 'me ba mo phetela lipolelo tsa molaoli oa ntoa.
