Elia le khosi Akasiea
1Hoba khosi Akabe a shoe, Bamoabe ba fetohela Baiseraele. 2Khosi Akasiea a oela a le lethuleng la fesetere ea kamore ea hae, e kaholimo, Samaria, a tsoa kotsi e tšabehang. A rōma maqōsa, a re ho 'ona: “Tsamaeang, le e'o botsa Baale-Sebube, molimo oa Ekerone, hore na ke tla fola.”
3Empa lengeloi la Morena la laela moporofeta Elia oa Tishebe, la re: “Ema, nyoloha, u e'o khahlanyetsa maqōsa a khosi ea Samaria. U fihle u a botse, u re: ‘Na Molimo ha a eo moo naheng ea Iseraele, ha e le moo le il'o lisetsa ho Baale-Sebube, molimo oa Ekerone? 4Ka lebaka lena, Morena o bua tjena: U ke ke ua hlola u tsoha liphateng tsa hao, hobane kea u tiisetsa u tla shoa.’ ” Eaba Elia oa ikela.
5Maqōsa a khutlela ho khosi, 'me khosi ea a botsa, ea re: “Le khutletse'ng?”
6A re ho eona: “Monna e mong o ile a nyoloha, a re khahlanyetsa tseleng, a re ho rōna: ‘Khutlelang ho khosi e le rōmmeng, 'me le re ho eona, Morena o bua tjena: Na Molimo ha a eo moo naheng ea Iseraele, ha e le moo u rōma maqōsa ho ea lisetsa ho Baale-Sebube, molimo oa Ekerone? Ka baka lena, u ke ke ua hlola u tsoha liphateng tsa hao, hobane kea u tiisetsa u tla shoa.’ ”
7Khosi ea a botsa, ea re: “E ne e le motho ea joang, eo ea ileng a nyoloha ho tla le khahlanyetsa, 'me a le bolella litaba tsee?”
8Maqōsa a re ho eona: “O ne a apere seaparo sa boea, a ikhahlotse letheka ka leqhama la letlalo.”
Eaba khosi e re ho 'ona: “Motho eo ke Elia oa Tishebe!”
9Khosi ea rōma molaoli oa bahlabani ba mashome a mahlano le bahlabani ba hae ba mashome a mahlano ho Elia. Molaoli eo a nyolohela ho Elia, 'me a mo fumana a lutse tlhōrōng ea leralla. Molaoli a re ho eena: “Moporofeta oa Molimo, khosi e u laela hore u theohe.”
10Empa Elia a araba molaoli eo oa ba mashome a mahlano, a re: “Haeba ke fela ke le moporofeta oa Molimo, mollo a o ke o theohe leholimong, o u felise, uena le bahlabani ba hao ba mashome a mahlano.” Mollo oa theoha leholimong, oa mo felisa 'moho le bahlabani ba hae ba mashome a mahlano.
11Khosi ea boela ea rōma molaoli e mong oa bahlabani ba mashome a mahlano, le bahlabani ba hae. Molaoli eo le eena a fihla a re ho Elia: “Oho, moporofeta oa Molimo, taelo ea khosi ke ena: ‘Theoha kapele-pele!’ ”
12Empa Elia a mo araba, a re: “Haeba ke fela ke le moporofeta oa Molimo, mollo a o ke o theohe leholimong, o u felise 'moho le bahlabani ba hao.” Mollo oa Molimo oa theoha leholimong, oa mo felisa 'moho le bahlabani ba hae ba mashome a mahlano.
13Eaba khosi e boela e rōma molaoli oa boraro, oa ba mashome a mahlano. Molaoli enoa oa boraro a nyoloha, a fihla a khumama kapele ho Elia, a mo rapela, a re: “Oho, moporofeta oa Molimo, kea u rapela: Ak'u nqenehele, u qenehele le bahlanka bana ba hao ba mashome a mahlano. 14Mollo o se o ile oa theoha leholimong, oa felisa balaoli ba babeli ba pele, 'moho le bahlabani ba bona ba mashome a mahlano sehlopheng ka seng; ka baka leo, kea u kōpa: Ak'u nqehenehele.”
15Lengeloi la Morena la re ho Elia: “Theoha le eena, u se ke ua mo tšaba.” Eaba Elia oa phahama, o theohela le molaoli eo ho khosi.
16Elia ha a fihla ho khosi, a re: “Morena o bua tjena: ‘Kahobane u rōmetse maqosa ho ea lisetsa ho Baale-Sebube, molimo oa Ekerone, joalokaha eka naheng ena ea Iseraele ha ho na Molimo eo u ka 'motsang, u ke ke ua hlola u tsoha liphateng tsa hao; kea u tiisetsa u tla shoa!’ ”
17Akasiea a shoa ho ea ka polelo eo Morena a neng a e bue ho Elia. Kaha Akasiea a ne a se na mora, Jorame, ngoan'abo, a mo hlahlama, e le ka selemo sa bobeli sa puso ea Jehorame, mora oa Jehoshafate, khosi ea Juda.
18Liketso tse ling tseo Akasiea a ileng a li etsa, li ngotsoe Bukeng ea Liketsahalo tsa Likhosi tsa Iseraele.
