Ho fana ka matsoho a mabeli
1Bana beso, re le tsebisa mohau oa Molimo o neiloeng likereke tsa Masedonia. 2Li bile har'a teko e matla ea matšoenyeho, empa ka baka la thabo ea tsona e khaphatsehang, li ile tsa fana ka matsoho a mabeli, leha li futsanehile hakaalo. 3Ke paka hore li ile tsa fana ho ea kamoo li nang le hona kateng; e, le ho feta kamoo li nang le hona kateng, 'me e le ka boithaopo. 4Li re qopheletse hore li lumelloe ho kenya letsoho thusong ea balumeli. 5Ka thato ea Molimo, li ile tsa ikabela Molimo pele, tsa nt'o ikabela le rōna, le ho feta kamoo re neng re lebeletse kateng. 6Re bile ra rapela Tite, ea qalileng mosebetsi ona oa mohau, hore a o phethe ho lōna. 7Joalokaha le atetsoe ke tsohle: tumelo, bokheleke, tsebo, mafōlōfōlō 'ohle, le lerato la lōna ho rōna; le ke le atlehe haholo le ketsong ena ea mohau.
8Ha ke rialo ka ho le laela, empa e le ho leka ho fumana bonnete ba lerato la lōna ka mafōlōfōlō a ba bang. 9Le tseba kamoo Morena oa rōna Jesu Kreste a bileng mohau kateng; leha e ne e le morui, o ile a iketsa mofutsana ka baka la lōna, hore ka bofutsana ba hae le tle le be barui.
10Joale ke le nea maikutlo a ka tabeng ena: Ho molemo ho lōna hore seo le se qalileng ngoahola, ka ho rata, le se qetele. 11Tsoelang pele joale, le phethe mosebetsi; le thahaselle ho o phetha ka tseo le nang le tsona, joalokaha le thahaseletse ho o rera. 12Ha thahasello e le teng, ho amoheloa seo motho a nang le sona, e seng seo a se nang sona.
13Taba hase hore le thuse ba bang ka ho ipea tsietsing, empa ke hore ho lekanoe. 14Nakong ea joale nala ea lōna e ba thusa bohloking ba bona, hore le nala ea bona e tle e le thuse bohloking ba lōna. Ka tsela ena ho tla lekanoa, 15joalokaha ho ngotsoe, ho thoe:
“Ea bōkeletseng haholo
ha aa ka a salloa ke letho,
'me ea bōkeletseng hanyenyane
ha aa ka a haelloa ke letho.”
Tite le balekane ba hae
16A re leboheng Molimo ea kentseng mafōlōfōlō a joalo pelong ea Tite, ka baka la lōna, 17hobane o amohetse kōpo ea rōna, o bile o ithaopile ka mafōlōfōlō a maholo ho tla ho lōna. 18Re mo rōmile le ngoan'abo rōna eo botumo ba hae tabeng tsa molaetsa o molemo bo tsejoang ke likereke tsohle. 19Ho feta moo, o bile o khethiloe ke likereke hore a tsamaee le rōna mosebetsing ona oa mohau oo re o etsetsang tlotliso ea Morena, ho bontša thahasello ea rōna. 20Re ntse re leka ho phema hore ho se be ea ka nyatsang tšebeliso ea rōna ea lithusohali tsena, 21hobane re pheella tse molemo, e seng pel'a Morena feela, empa le pel'a batho.
22Re rōmile barōmuoa 'moho le ngoan'abo rōna, eo hangata re fumaneng a le mafōlōfōlō nthong tse ngata; eo joale a leng mafōlōfōlō haholo, kaha a le tšepa haholo. 23Tite ke molekane oa ka eo re le sebeletsang 'moho le eena; ha e le bana babo rōna ke barōmuoa ba likereke, ho tlotlisa Kreste. 24Ka baka leo, ba bontšeng lerato la lōna, le hore re ithorisa ka lōna ka nepo, likerekeng tsohle.
